Guendaridagulisaa de chupa gubidxa ca zacané laanu guzuhuaʼnu dxiichiʼ lu Stiidxaʼ Dios
1. Ximodo rusiidiʼ Jiobá laanu para ganda gucheechenu ca diidxaʼ nacubi ne galán ca.
1 Jiobá riuulaʼdxiʼ gusiidiʼ laanu, nga runi rudiibe laanu ni guizíʼdinu ne riguube gana laanu para ganda gucheechenu ca diidxaʼ nacubi ne galán ca (Mat. 24:14; 2 Tim. 4:17). Tobi de ca lugar ra rusiidiʼ Jiobá laanu nga ca guendaridagulisaa de chupa gubidxa ca. Ca guendaridagulisaa de chupa gubidxa ni chigaca lu 2009-2010 zieeteʼ ximodo zanda guzuhuaʼnu dxiichiʼ lu Stiidxaʼ Dios. Guiráʼ ni chitiidiʼ luni zareecani lu Romanos 8:5 ne Judas 17-19, ne zuzuluni semana 31 stiʼ agosto 2009.
2. 1) Ximodo zacané guendaridagulisaa de chupa gubidxa ca laanu. 2) Ximodo huayacané xcaadxi guendaridagulisaa de chupa gubidxa lii para ganda gucheecheluʼ diidxaʼ.
2 Ximodo zacaneni laanu. Guiráʼ ni chitiidiʼ luni zaguixhená laanu de ca cosa ni zanda guxheleʼ laanu de Dios, casi cani ribee tiempu stinu ti maʼ cadi gúninu ni jma risaca. Laaca zazíʼdinu cadi guiníʼ íquenu casi binni guidxilayú ne zuzeetecabe ximodo nga ti binni ni nuu dxiichiʼ lu Stiidxaʼ Dios. Domingu ca zadiʼdiʼ caadxi libana ni zusiene xi naquiiñeʼ guni cada tobi de laanu ne xi guni ca binnilídxinu ti ganda chuʼnu jma gaxha de Dios ne gudxíʼlunu ca guendanagana ni rusihuinni pa dxandíʼ nápanu fe, purtiʼ zeʼ dxi jma nagana cani. Guiráʼ ni chiguieeteʼ raqué zacané laanu para gápanu ladxidoʼno ne guzuhuaʼnu dxiichiʼ lu Stiidxaʼ Dios ne guietenaláʼdxinu ca ndaayaʼ sicarú ni chigudiibe ca binni ni nuu gaxha de laabe.
3. Padxí chigaca guendaridagulisaa de chupa gubidxa ne xi naquiiñeʼ gúninu dede ca yanna.
3 Ora maʼ gánnaluʼ padxí ne paraa chigaca guendaridagulisaa de chupa gubidxa ca, galán quixhe chaahuiluʼ guiráʼ ni chigúniluʼ para cheluʼ guiropa gubidxa gaca ni ne gudixhe ique gucaadiaga chaahuiluʼ guiráʼ ni chitiidiʼ luni. Cadi guiaandaʼ lii riguu Jiobá ndaayaʼ ca binni ni riguixhe ique dede ante ni chiguni (Pro. 21:5).
4. Xi zazíʼdinu lu guendaridagulisaa de chupa gubidxa ni chigápanu ca.
4 Jiobá nga chigusiidiʼ laanu lu guendaridagulisaa riʼ. Modo maʼ gudixhe mozo ni nuu xpiaaniʼ gaca guendaridagulisaa riʼ, ngapeʼ nga ni jma caquiiñenu para cadi gusaananu de gúninu dxiiñaʼ ni bisaanané Cristu laanu. Gudiʼnu xquíxepeʼ Jiobá pur guiráʼ cani rusiidiʼ laanu, purtiʼ racanécani laanu «inaaze dxiichi nu ni ma runi cre nu» (Heb. 10:23-25; Sant. 1:17).