Nabé risaca nga gucheechenu diidxaʼ ra nuu ca hombre ca
1. Tuu nga jma caquiiñeʼ gacanenu yanna para sániruʼ lu xhiiñaʼ Reinu.
1 Cumu nabé caniisi xhiiñaʼ Reinu lu ca últimu dxi riʼ la? nga runi jma caquiiñeʼ chuʼ hombre para sániruʼ lu dxiiñaʼ riʼ (Mar. 4:30-32; Hech. 20:28; 1 Tim. 3:1-13). Peru nuu tiru jma stale gunaa nga rucaadiaga stiidxaʼ Reinu que ca hombre ca. Ne nuu lugar la? ca gunaa ca nga jma ricá íquecaʼ gápacaʼ religión sticaʼ ne laca laacaʼ nga gusiidicaʼ ni xiiñicaʼ. Xi zanda gúninu para gacanenu ca hombre ca gucaa íquecaʼ guiziidicaʼ de Dios ti guni adorarnecaʼ laanu Jiobá yaʼ.
2. Xi guleendú Pablu ne Pedru dxi bicheechecaʼ diidxaʼ ra nuu caadxi hombre.
2 Caquiiñeʼ guyúbinu laacabe. Ora xaíque stiʼ ti familia guzulú guni ni na Jiobá la? xcaadxi binnilídxibe laaca runi zacaca. Casi ni bizaaca Pablu ne Silas dxi guníʼnecabe hombre ni cayapa lidxi guiibaʼ ra deguyoocabe que. Pur ni bíʼnicabe que guyuunisa hombre que ne guiráʼ binnilidxi (Hech. 16:25-34). Pur bicheeche Pablu diidxaʼ ndaaniʼ guidxi Corinto que «bini cre ti hombre lá Crispu, [ni] naca xaíque sti yuʼdu que [Stiidxaʼ Dios], laa ne ca binni lidxi» (Hech. 18:8). Jiobá laaca biquiiñeʼ Pedru para gucheeche diidxaʼ ra nuu Corneliu, ti hombre ni guca oficial stiʼ ca soldadu de Italia, laabe «ridxibi be Dios ne rusisaca be laa». Cásica Corneliu ne ca binnilidxi ne ca xhamigu guyuunísacaʼ (Hech. 10:1-48).
3. Tu binni «ni risaca» zanda guiníʼneluʼ de Stiidxaʼ Dios cásica biʼniʼ Felipe.
3 Ora gucheechenu diidxaʼ ra nuu ca hombre «ni runi mandar» la? zándaca gucaani laacabe gúnicabe ni na Dios despué (1 Tim. 2:1, 2). Ti biaje gudxi ángel stiʼ Dios Felipe cheʼ ra nuu ti hombre «ni risaca», ni rapa xpidxichi reina Candace. Ora «bidxiña Felipe ne bina diaga cayuunda be ni bicaa profeta Isaías» la? bisiene laabe stiidxaʼ Jesús. Hombre que guca discípulo ne zándaca bicheechebe diidxaʼ ora yendabe xquídxibe ne laaca zándaca guníʼnebe reina que de Stiidxaʼ Dios ne ca binni ni runi dxiiñaʼ raqué. Pa qué ñúnibe ni la? nagana ñaca para ca binni que ñánnacaʼ de Stiidxaʼ Dios (Hech. 8:26-39).
4. Xi zanda gúninu para gucheechenu diidxaʼ ra nuu ca hombre ca.
4 Paraa ne ximodo guidxélanu laacabe. Stale hombre jma nga runi dxiiñaʼ ridxí, yanna, ñee zanda quixhe chaahuiluʼ tiempu stiluʼ para gucheecheluʼ diidxaʼ ca huadxí ca, ca sábadu ne ca domingu, ne ca dxi riziilaʼdxiʼ binni pur xiixa saa la? Pa gúniluʼ stipa pur gucheecheluʼ diidxaʼ ra rutoo binni, zándaca guidxeʼluʼ ca hombre ni qué ridxeʼluʼ ralidxi. Ca hombre ni naca Testigu laaca zanda gúnicaʼ stipa pur guiníʼnecaʼ cani runinecaʼ dxiiñaʼ de Stiidxaʼ Dios. Ne ora maʼ zigucheechecabe diidxaʼ de yoo pur yoo zanda guinabadiidxacabe pa nuu xaíque stiʼ familia ca, jma pa nabé rucheechecabe diidxaʼ neza raqué.
5. Xi naquiiñeʼ guni ti gunaa ora maʼ zigucheeche diidxaʼ pa guiniʼné ti hombre ni chuulaʼdxiʼ gucaadiaga stiidxaʼ Reinu.
5 Pa ti gunaa guiniʼné ti hombre ora maʼ zigucheeche diidxaʼ ne chuulaʼdxiʼ hombre ca gucaadiaga stiidxaʼ Reinu la? cadi naquiiñeʼ diʼ chebe laasibe ra nuu sti biaje, sínuque naquiiñeʼ chinebe xheelabe o stobi de cani rucheeche diidxaʼ. Pa gusihuinni binni ca caniisi lu Stiidxaʼ Dios la? jma galán gábibe ti hombre chigusiidiʼ laa.
6. Ximodo zanda gúninu casi biʼniʼ Pablu ti guni «ganar[nu] jma stale binni».
6 Xi zanda gúninu para gucaadiágacabe. Apóstol Pablu guníʼ ique tu binni ngue cucaadiaga laa ne guníʼnebe laacaʼ de ni riuuláʼdxicaʼ, bíʼnibe zaqué para guni «ganar[be] jma stale binni» (1 Cor. 9:19-23). Ngaca nga ni gúninu, naquiiñeʼ guiníʼ íquenu xi tema jma ziuulaʼdxiʼ ca hombre ca ne chuʼnu listu para guinínenu laacabe de laani. Stale de laacabe nabé riuucabe xizaa purtiʼ nagana para guni ganárcabe ni caquiiñeʼ binnilídxicabe, racaláʼdxicabe chuʼ ti gobiernu nachaʼhuiʼ ne cadi guizaaca binnilídxicabe xiixa ni guniná laacaʼ. Laaca zándaca guiníʼ íquecabe xi pur nuunu ndaaniʼ Guidxilayú riʼ, xi gácaxa de Guidxilayú riʼ ne xiñee cudii Dios lugar cayacaná binni. Pa guinínenu laacabe de ca tema riʼ, zándaca jma zucaadiágacabe stiidxaʼ Reinu (Pro. 16:23).
7. Ximodo zanda gacané ca binni ridagulisaa xheelaʼ ca gunaa naca xpinni Cristu ora checaʼ ndaaniʼ Yoo stiʼ Reinu.
7 Ximodo zanda gacanenu xheelaʼ ca gunaa ni naca xpinni Cristu. Stale biaje jma racané ca gunaa Testigu ca xheelacaʼ guiziidiʼ de Stiidxaʼ Dios pur modo nácacaʼ ne laacabe. Peru guiráʼ ca binni ridagulisaa laaca zanda gacanecaʼ xheelacabe (1 Ped. 3:1-4). Ora chinécabe xheelacabe ndaaniʼ Yoo stiʼ Reinu la? zanda guidxaagalunu laacabe galán. Ora chécabe ra ridagulisaanu ca rusihuínnicabe riuuláʼdxicabe guiziidicabe de Jiobá, ne dede zándaca guinábacabe chuʼ tu guʼndané laacabe.
8. Xi zanda guni ca hombre ca para gacanecaʼ xheelaʼ ca gunaa naca xpinni Cristu.
8 Laaca nuu caadxi hombre ni huaxiéʼ riuulaʼdxiʼ guiziidiʼ de Dios ora guzulú guinínenu laacaʼ, peru zándaca chaahuiʼ chaahuiʼ maʼ zanacaʼ guiniʼné tuuxa Testigu laacaʼ, tobi ni maʼ runibiaʼcaʼ. Guzéʼtenu de ti familia ni guyuu lade ti neza binni ridagulisaa. Hombre que cadi Testigu diʼ laa, ngue runi ca xpinni Cristu que gudíxhecaʼ chigánnacaʼ laacabe gatigá para guiniʼné ca hombre que de ni riuulaʼdxiʼ. Zaqué gunda guníʼnecabe laabe de Biblia ne yanna maʼ guyuunísabe. Sti xpinni Cristu gucané ti hombre ni cadi Testigu para uguucaʼ leʼ ralídxibe. Guyuulaʼdxiʼ hombre que modo gucanebe laa ne despué maʼ bizulú biindaʼ Biblia (Gál. 6:10; Fili. 2:4). Laatu, ca hombre ni naca Testigu, ñee zanda gúnitu stipa para gacanetu xheelaʼ ca gunaa ni naca xpinni Cristu la?
9. Xi zanda guni ca hombre ca pa gusíʼdinu laacaʼ gúnicaʼ dxiiñaʼ jneza.
9 Naquiiñeʼ gusíʼdinu laacabe. Pa gacanenu ca hombre ni caziidiʼ ca ugaandacaʼ xiixa guenda ndaaniʼ xquidxi Jiobá la? zanda gueeda gácacaʼ binnigola ne iquiiñecaʼ guiráʼ ni nánnacaʼ para gacanecaʼ ca binni ridagulisaa (Efe. 4:8; Sal. 68:18). Zanda gápacabe ca xpinni Dios de guidubi ladxidóʼcabe (1 Ped. 5:2, 3). ¡Zácacabe ti ndaayaʼ naroʼbaʼ para guiráʼ ca xpinni Cristu!
10. Ximodo huayacané ni biʼniʼ Ananías que stale binni purtiʼ guníʼnebe Pablu de stiidxaʼ Reinu.
10 Nápanu ejemplu stiʼ Saulo, laa beeda gaca «apóstol sti cani cadi judíu», neca guzanándabe ca xpinni Cristu dxiqué (Rom. 11:13). Ngue runi, qué niná diʼ Ananías ñé ra nuube para niniʼné laabe de stiidxaʼ Reinu ora biʼniʼ mandar Jesús laa. Peru últimu guyebe, ne despué beeda gunibiáʼ binni hombre que casi apóstol Pablu. Gudiʼdiʼ si caadxi iza, dxiiñaʼ ni biʼniʼ Pablu que gucaneni stale binni. Ne dede yanna rizíʼdinu stale de ca carta ni bicaabe ni zeeda lu Stiidxaʼ Dios (Hech. 9:3-19; 2 Tim. 3:16, 17).
11. Xiñee caquiiñeʼ gúninu intiica cosa para ganda gucheechenu diidxaʼ ra nuu ca hombre ca.
11 Nga runi, galán gúninu intiica cosa para ganda gucheechenu diidxaʼ ra nuu ca hombre ca. Nánnanu zaguu Jiobá ndaayaʼ dxiiñaʼ cayúninu, purtiʼ cayúninu stipa pur gúninu ni nabe ne cayacanenu guiniisi xhiiñaʼ Reinu.