Ti tema nacubi ni zacané laanu guzulú gúʼndanenu binni Biblia
1. Xi tema nacubi chigueeda lu revista Torre stiʼ ni rapa ni rusaananenu binni, ne xi para gúcani.
1 Revista Torre stiʼ ni rapa ni riree cada chonna beeu riʼ zedaneni ti tema nacubi ni zacané laanu guzulú gúʼndanenu binni Biblia. Zuzulú ni lu númeru stiʼ abril-junio 2011, ne zaree lani: «Cani rusiidiʼ Stiidxaʼ Dios». Nécapeʼ nánnanu ziuulaʼdxiʼ stale binni guʼndaʼ cada tobi de ca revista riʼ, peru ca tema ca gúcacani para cani rucheeche diidxaʼ, ti ganda iquiiñecabe ni para guʼndanécabe ni binni.
2. Bizeeteʼ caadxi cosa ni chigueeda lu tema ca.
2 Cani chigueeda lu tema ca. Ca título ne ca subtítulo stini zeedacani casi guendarinabadiidxaʼ, ne galán iquiiñenu cani ora maʼ cadúʼndanenu binni. Tema riʼ neni textu ni cusiene de laani, peru cadi cá diʼ xiná cani. Zeedani zacá ti ganda cueendú binni ni galán ora guʼndaʼ ni lu Stiidxaʼ Dios. Cadi ziuulaʼ diʼ ca párrafo stini ne gúcacani zacá maca para gúʼndanenu cani binni ra puertaʼ lidxi. Ne cada tema stini ruseendaʼ laanu lu libru Xipeʼ ndiʼ cusiidiʼ Biblia, ti cadi gaca nagana para laanu guzulú gúʼndanenu laabe libru ca ora gúʼyanu maʼ zanda gúninu ni.
3. Ximodo zanda iquiiñenu ca tema ca para guzulú gúʼndanenu binni ra puertaʼ lidxi ora maʼ zigucheechenu diidxaʼ de yoo pur yoo.
3 Ximodo iquiiñenu ca tema ca. Ora gusaananeluʼ ca revista ca binni gunabadiidxaʼ laabe xiixa de tema stícani ni gucaa laabe chuuláʼdxibe gánnabe jma de laacani. Cumu tobi de ca tema ca zuzeeteʼ pabiáʼ risaca Biblia la? zanda guiniʼluʼ: «Ñee rábiluʼ Stiidxaʼ Dios nga Biblia la? o riníʼ íqueluʼ nácani ti libru galán si [guleza guicábibe]. Niaaʼ ti guiʼchiʼ ni cusiene de tema ca». Biluíʼ laabe primé guendarinabadiidxaʼ zeeda luni, biindaʼ primé párrafo stini ne biyubi textu zeeda luni. Biindaʼ guendarinabadiidxaʼ ca sti biaje ne gunabaʼ laabe guicábibe. Biiyaʼ pabiáʼ zanda gúʼndaneluʼ laabe, biquiiñeʼ ca guendarinabadiidxaʼ stini ne yenanda ca númeru stini para guinabadiidxaluʼ laabe. Ante cheluʼ, biluíʼ laabe sti guendarinabadiidxaʼ zeeda luni ne gudixhe ti dxi guibiguétaluʼ para gúʼndatu de laani. Bibiguetaʼ guiráʼ semana para gúʼndatu jma de tema ca dede ora guedandá sti revista. Sti modo zanda gúniluʼ ni nga gábiluʼ binni pa zuundaneluʼ laa de Biblia primeca biaje chigánnaluʼ laa. Zanda iquiiñeluʼ tema stiʼ revista ca para guluiʼluʼ laabe ximodo rúʼndanenu binni Biblia.
4. Ximodo zanda iquiiñenu ca tema riʼ ora chigánnanu binni sti biaje.
4 Laaca zanda gúʼndanenu tema riʼ ca binni ni maca riaanané revista ne ca binni ni rigánnanu sti biaje. Zanda guiniʼluʼ: «Revista Torre stiʼ ni rapa riʼ neni ti tema nacubi. Ñuuladxeʼ nulueeʼ lii xidé caníʼ ni». Rinábadu Jiobá gacané tema nacubi riʼ laatu para ganda gacanetu jma binni «ganna ca ni dxandíʼ» (1 Tim. 2:3-4).