Ndaa ra rinabadiidxaʼ

◼ Pabiáʼ tiempu naquiiñeʼ gúʼndanenu tuuxa ni caniisi lu stiidxaʼ Dios.

Ora guidúʼyanu caniisi ti binni lu stiidxaʼ Dios la? galán gúninu cadi gusaana de gúʼndanenu laabe Biblia dede ra guilúxebe libru: Xipeʼ ndiʼ cusiidiʼ Biblia ne Cadi guixélenu de Dios ni nadxii laanu. Naquiiñeʼ gúʼndanenu laabe guiropaʼ libru ca neca chuʼnísabe ante guilúxebe cani. Ne zándaruʼ gucaʼnu tiempu gúʼndanenu laabe, revisita gúninu ca ne gucaʼnu ridúʼndanenu ti binni. Ne pa chinenu ti ni rucheeche diidxaʼ ne gacané laanu para gúʼndanenu binni ca la? laaca zanda gucaa tiempu ca (biiyaʼ Xhiiñaʼ Reinu ni Rúninu marzo 2009, yaza 2).

Cani nacubi ca naquiiñeʼ guzuhuaa dxiichicaʼ lu stiidxaʼ Dios ante gudiʼnu lugar gúnicaʼ xhiiñaʼ Dios stúbicaʼ. Binni ni cadúʼndanenu ca naquiiñeʼ guicaa «xcu» ne guzuhuaa «dxiichi lu ni runi cre», ti ganda gudxiilú guiráʼ guendanagana ni gueeda gapa (Col. 2:6, 7; 2 Tim. 3:12; 1 Ped. 5:8, 9). Laaca naquiiñeʼ guiziidiʼ chaahuicabe «ni dxandíʼ» ti ganda gusiidiʼ chaahuicabe xcaadxi binni (1 Tim. 2:4). Ora guiluxe guidúʼndanenu binni guiropaʼ libru ca, cayacanenu laacabe para cadi guidxíbicabe sácabe lu neza ni ziné laacabe lu «enda nabani» (Mat. 7:14).

Ante guiníʼ ca binnigola ca zanda chúʼnisa tuuxa la? naquiiñeʼ gúʼyacaʼ pa maʼ riene chaahuibe cani jma naquiiñeʼ gánnabe de lu Biblia ne pa cayúnibe cani caziidibe lu xquendanabánibe. Naquiiñeʼ guʼyaʼ chaahuicabe pa zanda chúʼnisa tuuxa ni cayuʼndanérunu primé libru ca. Pa guʼyaʼ ca binnigola ca qué zanda chúʼnisa tuuxa la? zuyúbicaʼ modo gacanecaʼ laabe para ganda chuʼnísabe despué (biiyaʼ folletu ni láʼ Laché, lagusiidiʼ guiráʼ binni sananda naa ne lacuunisa laacaʼ yaza 56 dede 60).

[Blurb on page 2]

Cani nacubi ca naquiiñeʼ guzuhuaa dxiichicaʼ lu stiidxaʼ Dios