Guisaca lá Dios

1. Ximodo chiguiree lá guendaridagulisaa de chupa gubidxa stiʼ iza dxiiñaʼ 2012, ne paraa bireeni.

¹ Lu iza 1931 biree lanu testigu stiʼ Jiobá, ne dede dxiqué nga gucuaanu ndaayaʼ de chinenu lá Dios ni napa derechu de guni mandar guibáʼ ne lu guidubi naca Guidxilayú. Laaca laabe bidiibe laanu guenda riʼ (Isa. 43:​10). Jesús laaca bisisaca lá Bixhoze, ne pur nga bizeetebe ni primé lu oración stiʼ padrenuestro (Mat. 6:9). Guendaridagulisaa de chupa gubidxa stiʼ iza dxiiñaʼ 2012 zaree lani «Guisaca lá Dios», ne bireeni lu oración ca.

2. Gunáʼ nga ca tema ni chiguieeteʼ lu guendaridagulisaa riʼ.

² Xi chiguieeteʼ luni. Sábadu ca zadiʼdiʼ ti libana ni láʼ «Gusíʼdinu binni lá Dios ra gúninu xhiiñaʼ guidubi dxi», luni zieeteʼ xiñee ruchátipa dxiiñaʼ ca ladxidoʼno. Lu libana de stale ndaa ni láʼ «Cadi guni biidinu lá Jiobá», zacaneni laanu cadi guiábanu lu tapa de ca trampa ni nabé riaba binni. Ne lu libana «Xiñee naquiiñeʼ guisaca lá Dios», zadúʼyanu xi zanda gacané laanu para cueendunu ni galán ora rucheechenu diidxaʼ ne xi zacané laanu para gúninu ni né stale gana neca huaxiéʼ riuulaʼdxiʼ binni gucaadiaga. Domingu ca zucaadiáganu ti libana de tapa ndaa ne luni zusiénecabe ximodo zanda gusisácanu lá Dios pur modo riníʼ íquenu, modo rininu, lu cani quixhe íquenu gúninu ne pur xpiaʼnu. Ne nanna dxíchinu ziuulaʼdxiʼ cani nacubi caziidiʼ gucaadiágacaʼ libana ni láʼ «Zusisaca Jiobá lá lu Armagedón».

3. Xi ndaayaʼ nápanu, ne ximodo zanda gacané cani chiguieeteʼ lu guendaridagulisaa riʼ laanu.

³ Maʼ cadi candaa zusisaca Jiobá lá (Eze. 36:​23). Laga cabézanu gúnibe ni nápanu ti ndaayaʼ naroʼbaʼ, ne laani nga cadi gudiʼnu lugar chuʼ xiixa ni guni biidiʼ lá Dios. Cani chiguieteʼ lu guendaridagulisaa de chupa gubidxa riʼ zacanécani laanu para gánnanu pabiáʼ risaca nga chinenu lá Jiobá.