Gaca ni na Dios
1 Laanu, ca binni guidxilayú, guyanu purtiʼ nga nga ni na Dios (Apo. 4:11). Nga runi, para guibáninu galán naquiiñeʼ gánnanu xiná Dios ne gúninu ni na. Neca ruluíʼ cadi nagana para gúninu ni, peru nagana ni purtiʼ maʼ biaʼnu gúninu «irá ni na ique nu ne ni na xquenda biaani nu» o «irá ni runi cani qué runibiáʼ Dios» (Efe. 2:3; 1 Ped. 4:3; 2 Ped. 2:10). Pa qué ñacané Dios laanu la? ñándaca ñábanu «lu ná binidxaba [...] para [nuzúʼbanu] stiidxaʼ» (2 Tim. 2:26). Dxi bibí para guidagulisaanu stiʼ iza dxiiñaʼ 2012 zacaneni laanu gúninu guionna cosa ni zeeda lu oración stiʼ padrenuestro (Mat. 6:9, 10). Guendaridagulisaa riʼ zaree lani «Gaca ni na Dios».
1. Ximodo chiguiree lá dxi bibí para guidagulisaanu stiʼ iza dxiiñaʼ 2012, ne xiñee caquiiñeʼ gánnanu de laani.
2 Xi guendarinabadiidxaʼ zacábicabe luni. Ora maʼ cayaca guendaridagulisaa ca bicaadiaga chaahuiʼ modo guicabi cani chigutiidiʼ libana ca guendarinabadiidxaʼ riʼ: Xiruʼ naquiiñeʼ gúninu despué de gucaadiáganu Stiidxaʼ Dios. Xi naquiiñeʼ gúninu para cadi gusaanaʼ de gudiʼnu cuenta xi racalaʼdxiʼ Dios para laanu. Xiñee naquiiñeʼ gacanenu guiráʼ clase binni. Ximodo zanda guibáninu galán ne nayecheʼ. Xi naquiiñeʼ guluíʼ cani nahuiiniʼ Jiobá. Xi ribeendú binni ora runi ni na Dios. Xiñee yanna nga jma caquiiñeʼ gacanenu ca xpinni Cristu para iguidxi fe sticaʼ ne cuʼnu gana laacaʼ.
2. Xi guendarinabadiidxaʼ zacábicabe lu dxi bibí para guidagulisaanu.
3 Biʼniʼ stipa para ganda cheluʼ guendaridagulisaa ca ne gudixhe ique gucaadiágaluʼ guiráʼ ni chitiidiʼ luni. Zándaca guni invitárcabe tuuxa xpinni Cristu de Betel o ti binnigola ni riganna ca binni ridagulisaa para gudii xiixa libana lu guendaridagulisaa ca. Galán gúniluʼ pa güíneluʼ laabe diidxaʼ ante guzuluni o despué de guilúxeni, ne pa maʼ bichaganabe la? laaca zanda güíneluʼ xheelabe diidxaʼ. Para cadi guiaandaʼ lii ni bicaadiágaluʼ, byuiʼné binnilídxiluʼ xi biziiditu ora chindatu yoo (Sant. 1:25). Galán gúʼyaneluʼ ca binnilídxiluʼ ximodo zanda gúnitu jma lu xhiiñaʼ Dios.
3. Ximodo zanda cueendunu stale ni galán lu guendaridagulisaa riʼ.
4 Maʼ cadi candaa zunitilú Jiobá guiráʼ ca binni ni ricá ique guni puru si ni racalaʼdxiʼ ne qué rinacaʼ gúnicaʼ ni nabe (1 Juan 2:17). Nga runi, ¡nabé rudiʼnu xquíxepeʼ Jiobá purtiʼ chigusiidiʼ laanu ni caquiiñenu lu guendaridagulisaa ca! Dxandipeʼ zacaneni laanu quixhe íquenu gúninu ni na Dios primé lu xquendanabáninu.
4. Xiñee naquiiñeʼ quixhe íquenu gúninu ni na Dios primé lu xquendanabáninu.