Gacanenu cani cucaadiaga laanu guiene chaahuicaʼ
1. Xi jma zacané laanu cueendunu ni galán ora gucheechenu diidxaʼ.
1 Xi jma zacané laanu cueendunu ni galán ora gucheechenu diidxaʼ: gucaʼnu binni gucaadiaga laanu la? o gacanenu laacaʼ guiene chaahuicaʼ ni cusíʼdinu ne zacá gánnacaʼ gunáʼ nga ni jneza. Ni bizéʼtenu últimu ca nga biʼniʼ apóstol Pablu ora guniʼné ca judíu de Tesalónica, ne pur ni bíʼnibe ca «bini cre caadxi de ca binni que» (Hech. 17:2-4). Peru xi naquiiñeʼ gúninu para gusiene chaahuinu binni xiixa yaʼ.
2. Ximodo zanda chinándanu ejemplu stiʼ Pablu ora gucheechenu diidxaʼ.
2 Galán gánnanu xi riníʼ ique binni. Para ganda gacanenu cani cucaadiaga laanu guiene chaahuicaʼ ni caninu la? naquiiñeʼ gánnanu xi riníʼ íquecaʼ. Ora guniʼné Pablu caadxi griegu, ni qué runi cré Dios, ti lugar ra rábicabe Areópago, bizulú guniʼné laacabe de cani runibiáʼcabe ne cani runi crécabe (Hech. 17:22-31). Zacaca nga naquiiñeʼ gúninu ora maʼ cayuʼnu listu para gucheechenu diidxaʼ, galán guiníʼ íquenu ni runi cré ca binni ni nabeza neza ra rucheechenu diidxaʼ ne gánnanu gunáʼ nga ca cosa ni qué riuuláʼdxicabe (1 Cor. 9:19-22). Pa guiníʼ binni xiixa para cadi gucaadiaga laanu la? naquiiñeʼ guzulú guinínenu laacaʼ de cani runibiaʼcaʼ.
3. Pa guiníʼ ique chaahuinu xi guinabadiidxanu binni, ximodo zanda gacaneni laanu gusiénenu xiixa.
3 Guiníʼ ique chaahuinu xi chiguinabadiidxanu binni. Pa racaláʼdxinu gusiénenu pur teléfono tuuxa binni ni zeʼ paxaraa xi neza zanda cheʼ la? qué zanda diʼ gúninu ni purtiʼ qué gánnanu pa neza zebe. Zacaca nga raca nagana para laanu gacanenu cani cucaadiaga laanu guiénecaʼ xii nga ni jneza pa qué gánnanu xi riníʼ íquecaʼ. Ante gusiene Jesús xiixa ca binni ni cucaadiaga laa, gunabadiidxabe laacaʼ para gánnabe xi riníʼ íquecaʼ. Casi dxi gunabadiidxaʼ tuuxa laabe: «Xi gune para gapa enda nabani ni qué zaluxe», ante guicábibe hombre que biyúbibe gánnabe xi riníʼ ique de laani (Luc. 10:25-28). Sti dxi, ora guníʼ Pedru ti cosa ni cadi jneza, guníʼ ique chaahuiʼ Jesús xi guinabadiidxaʼ laabe para gunda bisihuinni cadi jneza ni guniʼbe (Mat. 17:24-26). Nga runi, ora gabi cani cucaadiaga laanu xiixa ni huaxiéʼ runi crecaʼ o gábicaʼ laanu xiixa ni cadi jneza, galán iquiiñenu xiixa guendarinabadiidxaʼ para gacanenu laacaʼ guiénecaʼ.
4. Xiñee naquiiñeʼ gacanenu ca binni ni cucaadiaga laanu guiénecaʼ ni cusíʼdinu.
4 Cada biaje gacanenu tuuxa guiene xiixa ni cusíʼdinu, cusihuínninu zinándanu ejemplu stiʼ Jesús, Maestru stinu Ni Jma Nanna Gusiidiʼ ne ejemplu stiʼ xcaadxi binni ni bibani lu primé siglu ni bicheeche diidxaʼ jneza. Ne laaca zusihuínninu runi respetarnu ca binni ni cucaadiaga laanu (1 Ped. 3:15). Ora gúninu zacá, zándaca jma zaná binni chigánnanu laa sti biaje.