Modo gucheecheluʼ diidxaʼ jma jneza: ni zanda guicábiluʼ ora qué naʼ binni gucaadiaga

Xiñee risaca gúniluʼ ni. Bixuiʼlú gúnnaluʼ zedadxiña ti huracán, ne zati stale binni pa qué guyúbicaʼ ra guilacaʼ. Bireeluʼ yetídxiluʼ ti xpecínuluʼ xi chiguizaaca, peru qué nudii lugar niniʼluʼ ne na nuu xhiiñaʼ. Ñee nudxiidécheluʼ laabe ne maʼ qué lica ñaʼbuʼ ni laabe la? Coʼ, njaʼ. Zacaca nga runi stale binni yanna purtiʼ qué gánnacaʼ pa zanda gacané ca diidxaʼ zinenu ca para guilacaʼ. Zándaca nuu ni naguu xizaa laacabe ora yendanu (Mat. 24:37-39). O zándaca huayunadiágacabe riníʼ binni mal de laanu (Mat. 11:18, 19). Zándaca riníʼ íquecabe laaca runi religión stinu stale cosa ni cadi jneza casi runi xcaadxi (2 Ped. 2:1, 2). Pa qué gucaadiaga binni primé biaje cheluʼ ra nuu la? cadi guireeluʼ gana.

Ximodo zanda gúniluʼ ni:

Galán guiníʼ íqueluʼ ante chigucheecheluʼ diidxaʼ xi zándaca guiníʼ ca binni ni qué racalaʼdxiʼ gucaadiaga ne ximodo zanda guicábiluʼ.
Pa binni ca guiníʼ xiixa ni gusihuinni qué naʼ gucaadiaga la? biyubi guiniʼluʼ diidxaʼ nadóʼ ti ganda güírutu diidxaʼ. Zanda gábiluʼ laabe galán ni cayúnibe ne jneza ni. Casi pa nabe nápabe religión stibe la? zanda gábiluʼ laabe: «Galán nga nuuruʼ binni casi lii, ni rizaalaʼdxiʼ ganna de Dios». Nuu biaje, ora gusihuínninu rizaaláʼdxinu ni cayuni sentir binni caninenu ca o modo nuube laaca zucaani laabe gucaadiágarube laanu. Pa nabe nuu xhiiñabe la? zanda gábiluʼ laabe: «Dxandíʼ nouʼ, peru ante chaaʼ la? ñuuladxeʼ nusaaniáʼ ndiʼ lii». O pa guiniʼbe qué racaláʼdxibe gucaadiágabe la? zanda guinabadiidxaluʼ laabe: «Ñee ni na Biblia ca nga qué riuulaʼdxuʼ gannuʼ la?, o qué riuulaʼdxuʼ ca religión ca».
Guníʼ ique chaahuiʼ xi naquiiñeʼ guʼnuʼ. Gunna qué rucaa diʼ Jiobá binni gucaadiágapeʼ laa (Deut. 30:19). Cada tobi de laanu zabidxi Dios cuenta laa (Gál. 6:5). Ni jma jneza gúninu pa qué lica naʼ binni gucaadiaga laanu nga guireʼnu chuunu. Pa gúʼyabe guni respetarnu laabe la? ora cheʼ sti ni rucheeche diidxaʼ ra nuube zándaca zucaadiágabe laa (1 Ped. 3:15).

Biʼniʼ stipa guʼnuʼ ndiʼ beeu riʼ:

Ora maʼ bireeluʼ ra nuu ti binni ni qué niná nucaadiaga, galán gúʼyaluʼ lii ne xcompañéruluʼ pa nuu sti modo jma jneza nicábitu laabe.