Modo gucheecheluʼ diidxaʼ jma jneza: biziidiʼ guicábiluʼ tuuxa cadxiichi

Xiñee risaca gúniluʼ ni. Ora maʼ canagucheechenu diidxaʼ ridxélanu binni ni nabé sicarú modo ridxaagalú laanu. Peru Jesús guníʼ ziuu tu zacananalaʼdxiʼ laanu (Juan 17:14). Nga runi, cadi guidxagayaanu pa chuʼ dxi guidxaaganu binni tindené laanu. Pa gúnicabe laanu zacá, naquiiñeʼ guicábinu casi modo riuulaʼdxiʼ Jiobá purtiʼ laa nga Dios stinu (Rom. 12:17-21; 1 Ped. 3:15). Pa guicábinu né diidxaʼ nadóʼ zacanenu guiete xiana stiʼ binni ca. Ne laaca zaníʼ binni ca galán de laanu ne zaqueca cani cayuuyaʼ laanu, ne nga zucaa binni gucaadiaga ca Testigu ora maʼ canagucheechecaʼ diidxaʼ (2 Cor. 6:3).

Ximodo zanda gúniluʼ ni:

Cadi guidxiichiluʼ ne guca nachaʼhuiʼ. Nga zacané binni ca guiete xiana stiʼ. Cadi guiníʼ íqueluʼ lii nga cadxiichiné binni ca (Ecl. 7:9). Zándaca nápabe stale guendanagana o zándaca orapeʼ cadxiichibe yendaluʼ ra nuube. Ne pa cani rusíʼdinu binni ruchiichi laabe la? zándaca rúnibe ni purtiʼ qué ganna chaahuibe xipeʼ nga ni rusíʼdinu (2 Cor. 4:4).
Guníʼ né diidxaʼ nadóʼ (Prov. 15:1). Ñee bicuaaniluʼ binni la? Ñee nuu xhiiñacabe ora yendaluʼ la? Nécapeʼ cadi naquiiñeʼ guinábanu gutiidilaʼdxiʼ binni donda stinu pur dxiiñaʼ cayúninu, peru zanda guinábanu binni gutiidilaʼdxiʼ stóndanu purtiʼ yendanu órapeʼ nuu xhiiñaʼ. Peru, laga pa cadxiichi binni ca purtiʼ gúdxicabe laa xiixa ni cadi dxandíʼ de laanu yaʼ. Zanda gábiluʼ laabe sicaríʼ: «Rieneʼ xiñee cadxiichiluʼ. Peru cadi guiráʼ diʼ ni gúdxicabe lii de laadu ca dxandíʼ. Ñee zudiiluʼ lugar gusieneʼ ni lii la?». Pa qué riuulaʼdxiʼ binni ca caadxi de cani rúninu, casi xiñee ribeecabe tuuxa ndaaniʼ xquidxi Dios o xiñee qué ricanu rini la? zanda gábiluʼ laabe: «Rieneʼ lii. Zacaca huayabi xcaadxi binni laadu. Ñee zanda guluéʼ lii lu Biblia xiñee qué rúnidu zacá la?».
Pa nabé cadxiichi binni ca, zándaca ni jma galán gúniluʼ nga guireeluʼ de ra nuube sin guiniʼluʼ xiixa. Ne pa guinábabe lii cadi lica chiganna ca testigu stiʼ Jiobá laabe la? gudxi laabe zuni respetarnu ni canábabe ca.

Biʼniʼ stipa guʼnuʼ ndiʼ beeu riʼ:

Biʼniʼ ensayarné binnilídxiluʼ ora maʼ cayúnitu adoración en familia.
Despué de guireeluʼ de ra nuu ti binni ni nabé cadxiichi, gunabadiidxaʼ xcompañéruluʼ ximodo nicábiluʼ binni ca jma jneza.