«Cadi chuʼ dinde né tu irutiʼ»
1. Xi conseju stiʼ Biblia naquiiñeʼ guietenaláʼdxinu ora qué guidxaagalú binni laanu galán ralidxi.
1 Ca xpinni Jiobá nácacaʼ binni nadóʼ ne ora maʼ zigucheechecaʼ diidxaʼ rusiidicaʼ binni chuʼ tobi si (Is. 52:7). Peru nuu binni ridxiichi ora maʼ zigüínenu laa de stiidxaʼ Dios ralidxi. Guidúʼyanu xi zacané laanu gácanu binni nadóʼ ne cadi guidxiichinu ora gúnicabe laanu zacá (Rom. 12:18).
2. Xiñee naquiiñeʼ guiénenu binni.
2 Guiénenu binni. Nuu binni qué liica racalaʼdxiʼ ganna gastiʼ de stiidxaʼ Dios, nga runi rácacaʼ naduxhuʼ né laanu, peru nuu xcaadxi binni rácacaʼ zacá né laanu peru cadi pur rucheechenu diidxaʼ. Zándaca nuu tiru rindanu ralídxicabe órapeʼ cadxiichicabe o maca nuu xi cuchiichi laacabe. Ne pa ni rusíʼdinu binni nga ruchiichi laacabe la? zándaca rúnicabe ni purtiʼ runi crécabe ni riníʼ xcaadxi binni de ca Testigu (2 Cor. 4:4). Pa guiénenu cadi laanu cadxiichiné binni la? zacaneni laanu para cadi guidxiichinu nagueenda (Prov. 19:11).
3. Ximodo zanda gusihuínninu runi respetarnu ca binni ni gucaadiaga laanu.
3 Guni respetarnu binni. Stale binni ni nabeza neza ra rucheechenu diidxaʼ nabé maʼ gucuaa xcu ni runi crecaʼ ndaaniʼ ladxidoʼcaʼ (2 Cor. 10:4). Dxandipeʼ la? cada binni zanda guʼyaʼ pa zucaadiaga stiidxaʼ Dios o pa coʼ. Nga runi, naquiiñeʼ guni respetarnu cani runi cré binni ne cadi gusihuínninu qué gánnacaʼ gastiʼ. Pa gábicabe laanu guireʼnu de ralídxicabe la? gúninu ni nácabe.
4. Ximodo nga guininu «diidxa jneza, ni guiaba binni» yaʼ.
4 Guininu né diidxaʼ nadóʼ. Neca guchiichicabe laanu, naquiiñeʼ guininu «diidxa jneza, ni guiaba binni» o guininu né diidxaʼ nadóʼ ne gácanu nachaʼhuiʼ (Col. 4:6; 1 Ped. 2:23). Lugar de tindenenu binni, jma galán guyúbinu guinínenu laacaʼ de ni riuuláʼdxicaʼ. Galán guinabadiidxanu binni né diidxaʼ nadóʼ xiñee qué riuulaʼdxiʼ ni cayábinu laa. Peru nuu tiru jma galán uchuʼgunu lu stiidxanu para cadi guidxiichibe jma (Prov. 9:7; 17:14).
5. Xi ndaayaʼ zacaanu pa guininu né diidxaʼ nadóʼ ora gucheechenu diidxaʼ.
5 Pa gácanu binni nadóʼ, qué zusiaandaʼ binni ximodo gunínenu laacaʼ ne zanacaʼ gucaadiágacaʼ ora chuʼ tu guiniʼné laacaʼ de stiidxaʼ Dios sti biaje (Rom. 12:20, 21). Qué gánnanu pa málasi ca binni peʼ ni qué liica riná gucaadiaga stiidxaʼ Dios yanna laapecaʼ gueeda gácacaʼ xpinni Cristu (Gál. 1:13, 14). Peru neca qué naʼ binni gucaadiaga laanu, naquiiñeʼ gánnanu gucueezanu laanu ne cadi tindenenu laacaʼ, zacá zusisácanu Jiobá ne guirutiʼ qué zaníʼ mal de ni rusíʼdinu binni (2 Cor. 6:3).