Cadi guidxíbiluʼ
1. Pora nga naquiiñeʼ gácaluʼ nadxibalú.
1 Ñee huayuu ora ñándaca niníʼneluʼ tuuxa de Biblia ra scuela peru qué ñúniluʼ ni purtiʼ bidxíbiluʼ ñuni búrlacabe lii la? Ni dxandíʼ nga naquiiñeʼ gácaluʼ nadxibalú para ganda gúniluʼ ni, jmaruʼ si pa nácaluʼ ti binni natuí. Guidúʼyanu xi zanda gacané lii.
2. Ximodo zanda gusihuínniluʼ riníʼ ique chaahuiluʼ ora gucheecheluʼ diidxaʼ ra scuela.
2 Guníʼ ique chaahuiʼ. Nécapeʼ zanda gucheecheluʼ diidxaʼ ra scuela, bietenalaʼdxiʼ cadi guiráʼ binni nga zanda guiníʼneluʼ de Biblia, casi ora rucheecheluʼ diidxaʼ de yoo pur yoo. Galán guiníʼ ique chaahuiluʼ pora nga zanda gucheecheluʼ diidxaʼ (Ecl. 3:1, 7). Zándaca gúʼndaluʼ xiixa tema ra scuela o gusaananécabe lii xiixa tariá ra guiniʼluʼ de cani runi creluʼ. O guinabadiidxaʼ tuuxa de ca xcompañéruluʼ lii xiñee qué rúniluʼ caadxi de ca cosa ni rúnicaʼ. Nuu de ca xpinni Cristu rábicaʼ ca maestru sticaʼ nácacaʼ testigu stiʼ Jiobá cásipeʼ guixeleʼ scuela ne rudiicaʼ laacabe libru ne revista ni cusiene de cani runi crecaʼ. Xcaadxi xpinni Cristu rusaanacaʼ xiixa libru o revista ra ribicaʼ para guʼyaʼ ca xcompañérucaʼ ni ne pur laani guinabadiidxacaʼ laabe xiixa.
3. Ximodo zanda chuʼluʼ listu para gucheecheluʼ diidxaʼ ra scuela.
3 Guyuu listu. Pa chuʼluʼ listu la? qué zadxíbiluʼ gucheecheluʼ diidxaʼ (1 Ped. 3:15). Nga runi galán guiníʼ íqueluʼ xi zándaca guinabadiidxacabe lii ne ximodo zanda guicábiluʼ (Pro. 15:28). Pa ganda la? guzané ti Biblia, ca libru casi Los jóvenes preguntan o Razonamiento, ne xcaadxi libru ne revista ni caníʼ de cani bizáʼ Dios para iquiiñeluʼ cani ora maʼ guieeteʼ de xiixa tema. Laaca zanda gábiluʼ bixhózeluʼ ne jñaaluʼ cueecaʼ ti tiempu huiiniʼ ora maʼ cayuni adorartu Dios né binnilídxitu para guni ensayartu.
4. Xiñee galán gúniluʼ cadi gusaana de gucheecheluʼ diidxaʼ ra scuela.
4 Guníʼ ique zanda gúniluʼ ni. Cadi guiníʼ íqueluʼ zuni burla ca xcompañéruluʼ lii guiráʼ biaje guiníʼneluʼ laacaʼ de Dios. Zándaca ziuu tu guidxagayaa ora guʼyaʼ pabiáʼ nadxibaluluʼ dede gucaadiágacaʼ lii. Peru cadi guireeluʼ gana pa guirutiʼ gulabi lii. Zusiécheluʼ Jiobá ora guʼyaʼ stipa bíʼniluʼ pur guiníʼneluʼ laacabe (Heb. 13:15, 16). Cadi gusaana de guinábaluʼ Jiobá gacané lii gucheecheluʼ diidxaʼ «sin idxibi[luʼ]» (Hech. 4:29; 2 Tim. 1:7, 8). Guníʼ ique pabiáʼ ziécheluʼ ora gucaadiaga tuuxa lii. Zándaca despué gueeda gaca binni ca ti xpinni Jiobá.