Ñee caquiiñeluʼ cani cusiidiʼ Jiobá lii biaʼ gándatiʼ la?
1. Xiñee nabé ricá ique Jiobá gusiidiʼ ca xpinni.
1 Para Jiobá, Dios «Ni jma nanna gusiidiʼ», nabé risaca nga gusiidibe ca xpínnibe ni caquiiñecaʼ (Isa. 30:20). Dede dxi bizaʼbe primé Xiiñibe bizulú cusiidibe (Juan 8:28). Ne neca maʼ qué nuzuubaʼ Adán diidxaʼ la? né guendarannaxhii bisiidiruʼ Jiobá ca binni gulené donda (Isa. 48:17, 18; 2 Tim. 3:14, 15).
2. Ximodo caziidiʼ binni de Jiobá yanna riʼ.
2 Qué huayuu dxi gusiidiʼ Jiobá ca xpinni casi cayúnini yanna. Isaías maca guníʼ, millón de binni ni nuu lu guidubi naca Guidxilayú cadxíñacaʼ lugar ra zeeda gaca «dani ra zuba lidxi Jiobá» (Isa. 2:2). Xiñee cadxíñacabe lugar riʼ yaʼ. Cayúnicabe ni para guiziidicabe ca neza stiʼ Dios. Zacá nga laani, cadxíñacabe para gusiidiʼ Jiobá laacabe (Isa. 2:3). Lu iza dxiiñaʼ 2010, ca testigu stiʼ Jiobá biquiiñecaʼ 1,600 millón de hora para bicheechecaʼ diidxaʼ ne bisiidicaʼ binni de Biblia. Ne guiráʼ semana biaʼ ti gayuaa gaayuʼ mil neza binni ridagulisaa ni nuu lu guidubi naca Guidxilayú caziidicaʼ de Dios, ne mozo ni nuu xpiaaniʼ ne ni runi jneza cayuni libru ne revista lu jma de gaayuʼ gayuaa diidxaʼ.
3. Ximodo huayacané cani rusiidiʼ Jiobá lii.
3 Caziidiʼ chaahuicabe. ¡Biaa pabiáʼ maʼ huayacané cani rusiidiʼ Dios laanu! Ne pur cani maʼ bizíʼdinu ca nánnanu napa Dios lá ne rizaalaʼdxiʼ laanu (Sal. 83:18; 1 Ped. 5:6, 7). Laaca huayacanebe laanu gánnanu de caadxi cosa nabé risaca ni huanabadiidxanu, casi: Xiñee racananu ne rátinu. Ximodo zanda guibáninu nayecheʼ. Xi pur nabani binni. Ne cadi nga si, laaca rusiidiʼ Jiobá laanu guibáninu nayá ne racanécani laanu cueendunu ni galán lu xquendanabáninu (Jos. 1:8).
4. Gunáʼ nga scuela ni zanda cheluʼ, ne xiñee galán iquiiñenu guiráʼ cani rusiidiʼ Jiobá laanu biaʼ gándatiʼ.
4 Jiobá laaca rusiidiʼ stale de ca xpinni guiráʼ ni naquiiñeʼ gánnacaʼ ti ganda gúnicaʼ jma lu xhiiñabe. Lu yaza 4 dede 6 zeeda ti lista, ne luni zeeda ca scuela ni zanda cheluʼ. Peru pa nuu xiixa ni gucueeza lii ne pur laani qué ganda cheluʼ nin tobi de ca scuela ca la? galán quixhe íqueluʼ guiziidiluʼ biaʼ gándatiʼ cani zanda guiziidiluʼ lu Biblia. Xi zanda guininu de cani nahuiiniʼ yaʼ. Stale biaje nabé rucaa ca maestru sticaʼ ne xcaadxi binni laacaʼ checaʼ scuela roʼ. Lugar de gábinu laacabe gúnicabe nga, ñee racanenu laacabe quixhe íquecabe ugaandacabe xiixa dxiiñaʼ ndaaniʼ xquidxi Dios ne zacá cueendúcabe ni galán de cani rusiidiʼ Jiobá laanu la? Pa iquiiñenu cani rusiidiʼ Jiobá laanu biaʼ gándatiʼ, zacanécani laanu guibáninu nayecheʼ yanna ne ora maʼ gueeda Guidxilayú cubi stiʼ Dios (Sal. 119:105; Juan 17:3).
Scuela ra riziidiʼ binni guʼndaʼ ne gucaa
• Xi para guca ni: Guca ni para guiziidiʼ binni guʼndaʼ ne gucaa ti ganda gúʼndacaʼ Biblia ne gusiidicaʼ xcaadxi binni de Dios.
• Pabiáʼ rindaa ni: Biaʼ caquiiñeʼ ca binni ni chiguiziidiʼ.
• Ra chigácani: Ra Yoo stiʼ Reinu.
• Cani zanda cheʼ: Tutiica de cani rucheeche diidxaʼ o binni ni maʼ caziidiʼ de Biblia.
• Xi naquiiñeʼ guni binni para cheʼ: Ca binnigola ni nuu ndaaniʼ neza binni ridagulisaa nga ruuyacaʼ pa nuu tu caquiiñeʼ guicaa clase ca ra ridagulisaacaʼ ne laacaʼ riguíxhecaʼ ximodo gácani ne runi invitarcaʼ cani racalaʼdxiʼ cheʼ.
Scuela stiʼ cani Rucheeche Diidxaʼ
• Xi para guca ni: Para gusiidini ca xpinni Cristu gánnacaʼ gucheechecaʼ diidxaʼ jneza, ne gánnacaʼ gusiidicaʼ binni de Dios.
• Pabiáʼ rindaa ni: Qué rusaana de gácani.
• Ra chigácani: Ndaaniʼ Yoo stiʼ Reinu ra ridagulisaatu.
• Cani zanda cheʼ: Guiráʼ cani rucheeche diidxaʼ. Laaca raca invitar ca binni ni qué riaadxaʼ ca guendaridagulisaa, ni runi cré cani rusiidiʼ Biblia ne nabani casi naquiiñeʼ guibani ti xpinni Cristu.
• Xi naquiiñeʼ guni binni para cheʼ: Naquiiñeʼ guiníʼnebe binnigola ni ruuyaʼ modo raca Scuela stiʼ cani Rucheeche Diidxaʼ.
Cursu para guiziidiʼ binni sti diidxaʼ
• Xi para guca ni: Para guiziidiʼ ca xpinni Cristu gucheechecaʼ diidxaʼ lu sti diidxaʼ.
• Pabiáʼ rindaa ni: Tapa o gaayuʼ beeu. Ca clase ca rindaa cani ti hora o chupa hora ne jma raca cani sábadu siadóʼ.
• Ra chigácani: Jma rácani ra Yoo stiʼ Reinu ni riaana gaxha.
• Cani zanda cheʼ: Cani rucheeche diidxaʼ ni galán xpiaʼ ne cani riuulaʼdxiʼ gucheeche diidxaʼ lu sti diidxaʼ.
• Xi naquiiñeʼ guni binni para cheʼ: Betel ruuyaʼ tuu nga cani naquiiñeʼ guicaa cursu ca ne laaca racá riguíxhecabe ximodo gaca ni.
Cani rucuí Yoo stiʼ Reinu
• Xi para guca ni: Para gucuícabe ne guni chaahuicabe ca Yoo stiʼ Reinu. Neca cadi ti cursu ni la? peru riziidiʼ ca xpinni Cristu ca gúnicaʼ gadxé gadxé dxiiñaʼ ni zanda gacané laacaʼ gucuicaʼ Yoo stiʼ Reinu.
• Pabiáʼ rindaa ni: Rindaa ni biaʼ tiempu naʼ binni ni chiguni dxiiñaʼ ca.
• Ra chigácani: Ratiica guseendacabe Grupu de Binnigola ni Ruuyaʼ Cuí Yoo stiʼ Reinu para gúnicaʼ xiixa dxiiñaʼ. Ne ora guizaaca xiixa desgracia la? raca invitar chupa chonna de ca xpinni Cristu ni nuu lu Grupu ni rucuí Yoo stiʼ Reinu para chigacanecaʼ ca lugar ca.
• Xi rinábacabe de binni ni cheʼ: Cani racalaʼdxiʼ chigacané naquiiñeʼ gácacaʼ xpinni Cristu ni maʼ guyuunisa ne ca binnigola nga cani naquiiñeʼ guiníʼ pa zanda chebe. Zanda cheʼ hombre o gunaa neca qué gánnacaʼ gúnicaʼ dxiiñaʼ ca.
• Xi naquiiñeʼ guni binni para cheʼ: Naquiiñeʼ guinábabe ca binnigola ni ridagulisaanebe guiʼchiʼ ni láʼ Cuestionario para trabajadores voluntarios en Salones del Reino (S-82-S) ne guchabe ni.
Scuela stiʼ ca precursor regular
• Xi para guca ni: Gusiidicabe ca precursor ti ganda gucheechecaʼ diidxaʼ jneza (2 Tim. 4:5).
• Pabiáʼ rindaa ni: Chupa semana.
• Ra chigácani: Betel ribí paraa gácani ne jma rúnicabe ni ndaaniʼ Yoo stiʼ Reinu ni riaana gaxha.
• Xi rinábacabe de binni ni cheʼ: Naquiiñeʼ gápacabe neca ti iza de precursor regular.
• Xi naquiiñeʼ guni binni para cheʼ: Naquiiñeʼ cuézabe dede ora gabi binnigola ni riganna ca binni ridagulisaa laabe, purtiʼ laa maʼ nanna tu laa zanda cheʼ.
Scuela para cani nacubi yendá Betel
• Xi para guca ni: Scuela riʼ racaneni ca betelita ni nacubi yendá para gúnicaʼ xhiiñacaʼ jneza.
• Pabiáʼ rindaa ni: Dieciséis semana, ne rácani ti hora lu cada semana.
• Ra rácani: Betel.
• Xi rinábacabe de binni ni cheʼ: Naquiiñeʼ gácabe betelita o gúnibe dxiiñaʼ Betel ti tiempu (ti iza o jma).
• Xi naquiiñeʼ guni binni para cheʼ: Betel riguixhe padxí cheʼ cada betelita.
Scuela stiʼ Xhiiñaʼ Reinu
• Xi para guca ni: Para gusiidicabe ca binnigola ne ca siervu ministerial gúnicaʼ dxiiñaʼ sticaʼ, cásica quixhe chaahuicaʼ dxiiñaʼ ni raca ndaaniʼ neza binni ridagulisaa, zaqueca gúʼyacaʼ modo gácani (Hech. 20:28). Scuela riʼ rácani ora quixhe Grupu ni Zaniruʼ, ne nuu biaje rindaa chupa chonna iza para gácani.
• Pabiáʼ rindaa ni: Ca binnigola rápacaʼ ni ti dxi arondaʼ ne ca siervu ministerial rápacaʼ ni ti dxi, ne zacá huayácani maʼ raca chupa chonna iza.
• Ra chigácani: Jma nga rácani ndaaniʼ ca Yoo stiʼ Reinu o ndaaniʼ ca Yoo ra raca Guendaridagulisaa roʼ ni riaana jma gaxha.
• Cani zanda cheʼ: Binnigola o siervu ministerial.
• Xi naquiiñeʼ guni binni para cheʼ: Binnigola ni riganna ca binni ridagulisaa nga runi invitar cani cheʼ.
Scuela para ca Binnigola stiʼ neza binni ridagulisaa*
• Xi para guca ni: Para gacaneni ca binnigola gúnicaʼ xhiiñaʼ Dios jma jneza.
• Pabiáʼ rindaa ni: Gaayuʼ gubidxa.
• Ra chigácani: Betel ribí paraa gácani, ne jma rácani ndaaniʼ ca Yoo stiʼ Reinu o ndaaniʼ ca Yoo ra raca Guendaridagulisaa roʼ ni riaana jma gaxha.
• Cani zanda cheʼ: Ca binnigola.
• Xi naquiiñeʼ guni binni para cheʼ: Betel runi invitar cani naquiiñeʼ cheʼ.
Scuela ra rié ca Binnigola ni riganna ca binni ridagulisaa ne Xheelacaʼ*
• Xi para guca ni: Para gacaneni ca binnigola ni riganna ca binni ridagulisaa ne ca binnigola ni riganna ca guendaridagulisaa roʼ, gúnicaʼ xhiiñacaʼ jma jneza, ti cadi gusaananacaʼ «de güi[caʼ] stiidxa Dios ne usiidiʼ[caʼ]» ca binni ni nuu lu nacaʼ gacanecaʼ (1 Tim. 5:17; 1 Ped. 5:2, 3).
• Pabiáʼ rindaa ni: Chupa beeu.
• Ra chigácani: Betel ruyubi paraa gácani.
• Xi rinábacabe de binni ni cheʼ: Gácacaʼ binnigola ni riganna ca binni ridagulisaa o binnigola ni riganna ca guendaridagulisaa roʼ.
• Xi naquiiñeʼ guni binni para cheʼ: Betel runi invitar ca binnigola riʼ ne xheelacaʼ.
Scuela ra rié ca hombre ni caʼruʼ guichaganáʼ para guiziidicaʼ de Biblia*
• Xi para guca ni: Para gusiidicabe ca binnigola ne ca siervu ministerial ni caʼruʼ guichaganáʼ ti ganda gúnicaʼ xcaadxi dxiiñaʼ ni gudiicabe laacaʼ. Stale de laacaʼ ora guiluxe scuela riʼ ruseendacabe laacaʼ chigacanecaʼ lugar ra caquiiñeʼ tu gucheeche diidxaʼ ndaaniʼ xquídxicaʼ. Xcaadxi de laacaʼ zándaca guseendacabe laacaʼ ndaaniʼ sti guidxi para chigacanecaʼ pa guiniʼcaʼ zanda checaʼ.
• Pabiáʼ rindaa ni: Chupa beeu.
• Ra chigácani: Betel ribí paraa gácani, ne jma nga rácani ndaaniʼ ca Yoo stiʼ Reinu o ndaaniʼ ca Yoo ra raca Guendaridagulisaa roʼ ni riaana jma gaxha.
• Xi rinábacabe de binni ni cheʼ: Naquiiñeʼ gácabe hombre ni caʼruʼ guichaganáʼ ne gápabe dede 23 hasta 62 iza, gácabe nazaaca ne gácabe ti binni ni zaná gacané ca xpinni Cristu ne zaná gucheeche stiidxaʼ Reinu ra caquiiñeʼ tu guni ni (Mar. 10:29, 30). Naquiiñeʼ gácabe binnigola o siervu ministerial neca chupa iza ne qué nusaanabe ni biaʼ tiempu ca.
• Xi naquiiñeʼ guni binni para cheʼ: Ndaaniʼ caadxi guidxi, ora raca ca guendaridagulisaa de chupa gubidxa runi invitárcabe cani racalaʼdxiʼ ganna jma de laani para checaʼ ti guendaridagulisaa ni rúnicabe.
Scuela ra rié ca guendaxheelaʼ para guiziidicaʼ de Biblia*
• Xi para guca ni: Rusiidicabe ca guendaxheelaʼ ca guiráʼ ni naquiiñeʼ gánnacaʼ ti ganda iquiiñeʼ Jiobá laacaʼ jma ne zaqueca xquidxi. Stale de cani riluxe scuela riʼ ruseendacabe laacaʼ ra jma caquiiñeʼ guireeche diidxaʼ ndaaniʼ xquídxicaʼ. Zándaca guseendacabe chupa chonna de laacaʼ ndaaniʼ sti guidxi para chigacanecaʼ pa ruuyacaʼ zanda checaʼ.
• Pabiáʼ rindaa ni: Chupa beeu.
• Ra chigácani: Ca primé cursu riʼ bizulú gúcacani ra scuela ni nuu Patterson (Nueva York). Despué zácaruʼ xcaadxi cursu ca lugar ra cuí Betel gácani, ne zándaca gácani ndaaniʼ ca Yoo stiʼ Reinu o ndaaniʼ ca Yoo ra raca Guendaridagulisaa roʼ.
• Xi rinábacabe de binni ni cheʼ: Guirópacabe naquiiñeʼ gápacabe dede 25 hasta 50 iza, chúʼcabe nazaaca, gácacabe precursor regular neca chupa iza ne qué nusaanacabe ni biaʼ tiempu ca. Ne gusihuínnicabe racaláʼdxicabe gúnicabe dxiiñaʼ ca cásica biʼniʼ Isaías ni, laa guníʼ:«¡Raríʼ nuaa! Biseendaʼ naa» (Isa. 6:8). Naquiiñeʼ gápacabe chupa iza de bichaganácabe ne gastiʼ gucueeza laacabe de chigacanécabe ra jma caquiiñeʼ guireeche diidxaʼ.
• Xi naquiiñeʼ guni binni para cheʼ: Ndaaniʼ caadxi guidxi, ora raca guendaridagulisaa de ti dxi runi invitárcabe cani racalaʼdxiʼ ganna jma de laani para checaʼ ti guendaridagulisaa ni rúnicabe.
Scuela stiʼ Galaad stiʼ Watchtower
• Xi para guca ni: Rusiidicabe ca precursor ne xcaadxi xpinni Cristu ni runi jma lu xhiiñaʼ Jiobá para gácacaʼ misioneru.
• Pabiáʼ rindaa ni: Gaayuʼ beeu.
• Ra chigácani: Scuela ni nuu Patterson (Nueva York).
• Xi rinábacabe de binni ni cheʼ: Ca guendaxheelaʼ si zanda cheʼ. Primé biaje cúʼcabe xquíʼchicabe, guirópacabe naquiiñeʼ gácacabe precursor chupa iza ne qué nusaanacabe ni biaʼ tiempu ca, gápacabe chonna iza de guyuunísacabe, chupa iza de bichaganácabe ne gápacabe dede 21 hasta 38 iza. Naquiiñeʼ gánnacabe inglés ne gácacabe nazaaca. Laaca zanda guicá lá ca precursor ni cayacané ndaaniʼ sti guidxi pa nápacaʼ guiráʼ ni rinábacabe para cheʼ binni scuela ca (laaca zanda cheʼ cani runi dxiiñaʼ casi misioneru), ca binnigola ni riganna ca binni ridagulisaa, ca betelita, cani maʼ guyé Scuela ra rié ca hombre ni caʼruʼ guichaganáʼ para guiziidicaʼ de Biblia o Scuela ra Riziidicabe Gúnicabe Xhiiñaʼ Dios ne cani maʼ guyé Scuela ra rié ca guendaxheelaʼ para guiziidicaʼ de Biblia.
• Xi naquiiñeʼ guni binni para cheʼ: Ndaaniʼ caadxi guidxi, ora raca guendaridagulisaa de chonna gubidxa runi invitárcabe cani racalaʼdxiʼ ganna jma de laani para checaʼ ti guendaridagulisaa ni rúnicabe. Ne pa qué raca guendaridagulisaa riʼ xquídxiluʼ ne ñuuláʼdxiluʼ ñeluʼ cursu riʼ la? zanda gucaaluʼ Betel ni runi tender lugar ra cayacaneluʼ. Laacaʼ zusiénecaʼ lii jma de laani.
Scuela para Grupu ni Ruuyaʼ Modo Raca Dxiiñaʼ Betel ne Xheelacaʼ
• Xi para guca ni: Para gacaneni cani nuu lu Grupu ni Ruuyaʼ Modo Raca Dxiiñaʼ Betel gúʼyacaʼ gaca ca dxiiñaʼ ni raca ndaaniʼ Yoo Betel jneza ne gúʼyacaʼ modo guireeche diidxaʼ ndaaniʼ ca neza binni ridagulisaa ne gúʼyacaʼ dxiiñaʼ runi ca binnigola ni riganna ca binni ridagulisaa ne ca binnigola ni riganna ca guendaridagulisaa roʼ. Laaca ruuyacabe dxiiñaʼ ni raca ra ribiʼxhiʼ diidxaʼ, ra raca imprimir, ra ruseendacabe libru ne revista sti lugar ne xcaadxi dxiiñaʼ ni raca Betel (Luc. 12:48b).
• Pabiáʼ rindaa ni: Chupa beeu.
• Ra chigácani: Scuela ni nuu Patterson (Nueva York).
• Xi rinábacabe de binni ni cheʼ: Gácacaʼ tobi de cani nuu Grupu ni Ruuyaʼ Modo Raca Dxiiñaʼ Betel o binnigola ni ruuyaʼ modo raca dxiiñaʼ ndaaniʼ ti guidxi o tuuxa ni maʼ guniʼnécabe para guni tobi de ca dxiiñaʼ ca.
• Xi naquiiñeʼ guni binni para cheʼ: Grupu ni Zaniruʼ nga runi invitar ca binnigola riʼ ne xheelacaʼ.
[Epígrafe de la página 4]
Caadxi scuela ra rusiidiʼ xquidxi Jiobá laanu
[Epígrafe de la página 6]
Cadi guiráʼ diʼ guidxi raca ni.