Ca cosa sicarú bizáʼ Dios rusisácacani laabe

Stale binni nabé riuulaʼdxiʼ guʼyaʼ ca cosa sicarú bizáʼ Dios. Peru huaxiéʼ si de laacaʼ rudiicaʼ cuenta pa racá nga rihuinni xi riníʼ ique Dios ne xi nuu ndaaniʼ ladxidóʼ (Rom. 1:20). Maʼ xadxí guyuu ti hombre láʼ David, laabe binibiaʼbe Jiobá ra biindabe Stiidxaʼ. Peru laaca casi ñaca ñuuyabe Dios ne guyuube gaxha de laa ora biiyabe cani bizáʼ (Sal. 8:3, 4). DVD ni láʼ Las maravillas de la creación revelan la gloria de Dios zanda gacaneni laanu ganna chaahuinu de cani bizáʼ Dios, de ca guenda stibe, ximodo laabe ne zacá ganda chuʼnu gaxha de laabe, ne laaca zanda gacaneni ca xiiñinu ne cani rúʼndanenu Biblia. Despué de gúʼyaluʼ ni, biiyaʼ pa zanda guicábiluʼ ca guendarinabadiidxaʼ riʼ.

1) Ora ridúʼyanu pabiáʼ naroʼbaʼ guiráʼ ni nuu guibáʼ ne modo nexheʼ chaahuiʼ cani, ximodo racané nga laanu gannaxhiinu Jiobá jma (Isa. 40:26). 2) Xi rizíʼdinu de Dios ora ridúʼyanu pabiáʼ jneza modo bizaʼbe nisa (Apo. 14:7). 3) Ora ridúʼyanu pabiáʼ naroʼbaʼ Guidxilayú ne biáʼsipeʼ ra riaana Gubidxa de laani, ximodo rusihuinni nga nabé nuu xpiaaniʼ Jiobá. 4) Xi para guyáʼ beeu (Sal. 89:37). 5) Xi guiráʼ bidii Dios laanu para guibáninu nayecheʼ. 6) Xii nga ADN (Sal. 139:16). 7) Xi rusihuinni maʼ gadxé binni de xcaadxi cosa ni bizáʼ Jiobá (Gén. 1:26). 8) Xi ñuuláʼdxiluʼ ñúniluʼ ndaaniʼ guidxilayú cubi stiʼ Dios.

Extras: 9) Xi raca para guihuinni ca cosa ca de guiráʼ color. 10) Ximodo randa rindá nisa dede punta ca yaga ca ne qué rigubayú gravedad stiʼ Guidxilayú ni. 11) Xi runi nisa lu xcuerpu binni. 12) Bizeeteʼ chupa chonna ejemplu ni rusihuinni ximodo racanesaa ca maniʼ ne ca yaga. 13) Ximodo nanna cada tobi de laacani naquiiñeʼ gacanesaacani. 14) Xii nga ni rábicabe ángulo áureo, ne ximodo rihuinni ni lu cani bizáʼ Dios.

Guʼyaʼ chaahuinu cani bizáʼ Jiobá. Jesús gudxi ca discípulo stiʼ ca diidxaʼ ri: «Laguuya ca mani huiini ni ripapa», ne laaca gúdxibe laacaʼ: «Laguuya modo rigaa ca liriu ni nuu ndaani guiʼxhiʼ» (Mat. 6:26, 28). Pa gúninu ni guníʼ Jesús ca, zaguidxi fe stinu, zucaani laanu guni crenu Jiobá de guidubi ladxidoʼno, zusizácanu laabe purtiʼ nuu xpiaanibe, nápabe poder ne nadxiibe binni. Lugar de gúʼyanu guiráʼ cosa ni maʼ bizáʼ binni guidxilayú, jma galán cueenu tiempu para gúʼyanu guiráʼ cosa sicarú ni bizáʼ Jiobá ne guiníʼ íquenu xi rusiidicani laanu de Dios stinu (Sal. 19:1).