Lachinanda ejemplu stiʼ ca profeta: Joel
1. Ximodo rinándanu ejemplu stiʼ profeta Joel ora rucheechenu diidxaʼ.
1 Tuu nga guca profeta Joel yaʼ. Ni bizeetesibe lu libru ni ziné labe nga xiiñiʼ Petuel laabe (Joel 1:1). Profeta ni qué rudxiibaʼ laca laa riʼ, jma nga bizeetebe ni racalaʼdxiʼ Jiobá ganna binni, que nudxiibabe laca laabe pur dxiiñaʼ ni cayúnibe que. Zacaca nga rúninu ora rucheechenu diidxaʼ, jma nga ruyúbinu gusisaca binni Jiobá ne Stiidxaʼ, que gusisácacaʼ laanu (1 Cor. 9:16; 2 Cor. 3:5). ¡Ne nabé ratadxí ladxidóʼ binni ora ruínenu laacaʼ Stiidxaʼ Dios! Guidúʼyanu chupa chonna cosa zeeda lu ca diidxaʼ riguixhená stiʼ Joel ni zacané laanu gucheechenu diidxaʼ né stale gana ne guiníʼ íquenu de ca cosa sicarú chiguni Dios.
2. Xi naquiiñeʼ gúninu yanna ra maʼ gaxha nuu dxi stiʼ Jiobá riʼ.
2 «Maʼ gaxha nuu dxi stiʼ Jiobá.» (Joel 1:15.) Neca gucuá ca diidxaʼ riʼ raca chonna mil iza, peru ca dxi riʼ nga cayaca guiráʼ niná cani. Ra zidiʼdiʼ dxi zidale guendanagana lu Guidxilayú riʼ, ne laaca stale binni runi burla laanu ora gucheechenu diidxaʼ ne qué rinacaʼ gucaadiágacaʼ laanu. Cani bizéʼtenu ca cusihuínnicani maʼ nabáninu lu ca últimu dxi (2 Tim. 3:1-5; 2 Ped. 3:3, 4). Cumu maʼ gaxha nuu dxi stiʼ Jiobá la? ni jma naquiiñeʼ gúninu lu xquendanabáninu nga gucheechenu diidxaʼ (2 Ped. 3:11, 12).
3. Xiñee cadi naquiiñeʼ gusaana de gucheechenu diidxaʼ yanna ra maʼ zedayuba ca dxi jma nagana riʼ yaʼ.
3 «Jiobá zulá xquidxi.» (Joel 3:16.) Versículo riʼ laaca ruzeeteʼ ni «zaniibi dxacha» guibáʼ ne Guidxilayú, ni na ca diidxaʼ ca nga chiguni juzgar Jiobá binni lu ca dxi jma nagana ca. ¡Galán nga gánnanu zulá Jiobá ca xpinni ni qué rusaana de guni ni na! (Apoc. 7:9, 14.) Ti xpinni Cristu ni qué gusaana de gucheeche diidxaʼ ne guʼyaʼ ximodo rapa Jiobá laa ne ximodo rudiibe stipa laa la? rapa jma fe ne runi huantar. Ne guirópapeʼ guenda ca nga chigacané laanu para ganda gudxíʼlunu ca dxi jma nagana ni zedayuba ca.
4. Xiñee naquiiñeʼ chuʼnu nayecheʼ ne cadi guiaandaʼ laanu zacané Jiobá laanu lu ca dxi jma nagana ni gueeda ca.
4 Neca nuu binni na puru guendananá nga redané guiráʼ ni guníʼ profeta Joel, peru cadi zacá diʼ nga laani purtiʼ laani cayábini laanu chigulá Dios xquidxi (Joel 2:32). Cadi guiaandaʼ laanu zacané Jiobá laanu gudxíʼlunu ca dxi jma nagana ni gueeda ca. Ne cadi gusaana de gucheechenu ca diidxaʼ nacubi ne galán stiʼ Reinu stiʼ Dios né stale gana ne guicaanu invitación stiʼ Joel 2:23, ra na guiechenenu Jiobá, Dios stinu.