Stiidxa Dios napa poder
1. Xi láʼ guendaridagulisaa de ti dxi ni chigaca lu iza dxiiñaʼ 2014.
1 Gastiʼ nin ti cosa de lade guiráʼ ni huayuni binni guidxilayú jma napa poder que Biblia. Xiñee rininu zacá yaʼ. Purtiʼ libru ca si nga zanda gacané laanu guchaʼnu guidubi naca xquendanabáninu, guchaʼnu modo riníʼ íquenu ne gúninu ni riuulaʼdxiʼ Dios. Peru pabiáʼ poder napa Stiidxaʼ Dios yaʼ. Xi naquiiñeʼ gúninu para guizíʼdinu ni nani biaʼ gándatiʼ yaʼ. Ximodo zanda iquiiñenu ni para gusíʼdinu binni jneza. Ca guendarinabadiidxaʼ riʼ zacábicabe cani lu guendaridagulisaa de ti dxi ni chigaca lu iza dxiiñaʼ 2014. Guendaridagulisaa de ti dxi riʼ zareelá ni «Stiidxa Dios napa poder» ne biree ni lu Hebreos 4:12.
2. Xi guendarinabadiidxaʼ chiguicábicabe lu guendaridagulisaa riʼ.
2 Ca guendarinabadiixaʼ ni chiguicábicabe. Laga cucaadiágaluʼ ca libana ni cadiʼdiʼ lu guendaridagulisaa riʼ, bicaa guiráʼ ni guiníʼcabe ora guicábicabe ca guendarinabadiidxaʼ zeeda raríʼ.
• Xiñee naquiiñeʼ guni crenu Stiidxaʼ Jiobá (Sal. 29:4).
• Ximodo zanda guidúʼyanu poder ni napa Stiidxaʼ Dios lu xquendanabáninu (Sal. 34:8).
• Ximodo iquiiñenu poder ni napa Stiidxaʼ Dios ora gucheechenu diidxaʼ (2 Tim. 3:16, 17).
• Xi naquiiñeʼ gúninu para cadi quiteʼ poder ni napa guidxilayú stiʼ Binidxabaʼ riʼ laanu (1 Juan 5:19).
• Hombrehuiiniʼ ne dxaapahuiiniʼ, xi zacané laatu cueendutu ni galán ra gúnitu xhiiñaʼ Dios (Jer. 17:7).
• Xi zanda gacané laanu ora cayaadxaʼ stipa laanu (2 Cor. 12:10).
• Ximódoruʼ zanda gacané Biblia laanu, neca cayaca nagana para laanu guchaʼnu modo riníʼ íquenu ne para gusaananu xiixa viciu (Efes. 4:23).
3. Xiruʼ zanda gúninu para cueendunu ni galán lu guendaridagulisaa de ti dxi.
3 Nanna dxíchinu, zabeendunu stale cosa galán ra gucaʼdiáganu ca libana ni chitiidiʼ lu guendaridagulisaa riʼ. Lu guendaridagulisaa de ti dxi riʼ, zanda gunibiaʼnu ca xpinni Cristu ni nuu ndaaniʼ xcaadxi neza binni ridagulisaa ne güínenu laacaʼ diidxaʼ, cásica rúninu ora raca guendaridagulisaa de chupa gubidxa ne de chonna gubidxa (Sal. 133:1-3; 2 Cor. 6:11-13). Nga runi galán cueenu tiempu para guinínenu cani maʼ xadxí xhamígunu ne gunibiaʼnu xcaadxi xpinni Cristu. Ne pa cheʼ tuuxa xpinni Cristu chiganna laanu lu guendaridagulisaa ca, casi binnigola ni riganna ca guendaridagulisaa roʼ o ti betelita la? galán guidxíñanu laacabe ne xheelacabe para guinínenu laacabe. Nápanu stale razón para cuézanu guedandá dxi chuunu guendaridagulisaa de ti dxi ca né stale gana.