Dxi bibí para guidagulisaanu iza 2009-2010
1. 1) Gunáʼ nga caadxi tema ni huayeeteʼ lu ca guendaridagulisaa de ti dxi ni huayápanu. 2) Ximodo huaquiiñeluʼ xiixa ni biziidiluʼ lu ca guendaridagulisaa de ti dxi ca para gucheecheluʼ diidxaʼ.
1 «Gúninu ca cosa ni dxandíʼ risaca», «Zuhuaʼnu dxiichiʼ purtiʼ nuunu tobi si», «Cadi gusaananu de gusíʼdinu ni dxandíʼ», «Laanu zeeda gácanu casi beñe, ne Jiobá nga [r]uni laanu modo gacalaʼdxiʼ» (Fili. 1:9, 10, 27; Juan 18:37; Isa. 64:8). Ndiʼ nga chupa chonna de ca tema ni bieeteʼ lu caadxi guendaridagulisaa de ti dxi ni maʼ huayápanu. Ñee maʼ nuuluʼ listu para cheluʼ guendaridagulisaa de ti dxi ni chigaca iza 2009-2010 la? Tema stini nga «Ma huaxiéʼ dxi riaadxa», bireeni lu 1 Corintios 7:29.
2. Ximodo zanda uguʼnu gana ca binnilídxinu para checaʼ guendaridagulisaa de ti dxi ca.
2 Cásipeʼ gánnaluʼ padxí chigaca guendaridagulisaa de ti dxi ca guluu gana ca binnilídxiluʼ para cheʼ. Caadxi xpinni Cristu ni napa xiiñiʼ rucaacaʼ padxí chigácani lu calendariu, rúnicaʼ ti guiʼchiʼ ra guicá guiráʼ ni zaquiiñecaʼ dxi ca ne rugabanecaʼ xiiñicaʼ xpanda gubidxa cayaadxaʼ. Ne gueelaʼ runi adorárcabe Dios ne binnilídxicabe zanda gúʼndacabe ni bicaacabe ora guyécabe ra guca xcaadxi guendaridagulisaa de ti dxi. Ne pa gúʼndatu libru Benefíciese yaza 13 dede 16, zacaneni laatu chuʼtu listu para gucaadiaga chaahuitu (Luc. 8:18).
3. Xi zanda gúninu para cueendunu ni galán de cani chiguieeteʼ lu guendaridagulisaa ca.
3 Biʼniʼ ni maʼ biziidiluʼ. Ora maʼ biluxe ti guendaridagulisaa stale biaje runadiáganu guiníʼcabe: «¡Nabé galán guiráʼ ni bizíʼdinu!». Dxandíʼ galán cani, laacani nga tobi de ca ndaayaʼ ni rudii Jiobá laanu (Pro. 10:22). Peru, para cueendunu ni galán de guiráʼ ni bizíʼdinu la? naquiiñeʼ guiníʼ íquenu de laacani ne cadi guiaandaʼ cani laanu (Luc. 8:15). Nga runi, galán guiníʼneluʼ binnilídxiluʼ o cani zineluʼ ndaaniʼ carru de cani biziiditu ora maʼ zibiʼtu. Laguiníʼ xi dxiiñaʼ cá íquetu gúnitu ndaaniʼ xquidxi Dios ne ximodo zanda iquiiñetu cani biziiditu ora gucheechetu diidxaʼ. Zacá zabeendutu ni galán lu cani biziiditu ne qué zusiaandatu cani (Sant. 1:25).
4. Xiñee zacané guendaridagulisaa ni chigaca riʼ laanu.
4 Cadi dxandíʼ runi sentirnu nadxiicabe laanu ora gusigáʼdecabe laanu xiixa la? jmaruʼ si pa gudiicabe ni ora caquiiñenu ni. Nga runi, nabé riéchenu gánnanu xi chigusiidiʼ Jiobá laanu dxi bibí para guidagulisaanu. Nánnanu dxandíʼ zacané guiráʼ ni chigusiidiʼ Jiobá laanu, Bixhózenu ni nuu guibáʼ, purtiʼ zaguuni gana laanu ne zusiidini laanu gúninu dxiiñaʼ ni bisaanabe gúninu (2 Tim. 4:2; Sant. 1:17).