Lachinanda ejemplu stiʼ ca profeta: Oseas
1. Ora guidúʼyanu pabiáʼ nachaʼhuiʼ Jiobá ne pabiáʼ rilaselaʼdxiʼ laanu, xi zucaani laanu guinabadiidxanu.
1 Ora guiníʼ íquenu pabiáʼ nachaʼhuiʼ Jiobá ne pabiáʼ rilaselaʼdxiʼ laanu, zándaca gucaani laanu guinabadiidxanu: «Ñee zanda gusaanaʼ de guneʼ xiixa ni riuuladxeʼ ti ganda guneʼ ni riuulaʼdxiʼ Jiobá la?» (Sal. 103:2-4; 116:12). Xi biʼniʼ profeta Oseas para gunda bizuubaʼ stiidxaʼ Jiobá. Gupa xidé bicaanabe caadxi cosa ni riuuláʼdxibe, peru bíʼnibe ni né stale guendanayecheʼ. Ximodo zanda chinándanu ejemplu stibe yaʼ.
2. Ximodo racané ejemplu stiʼ Oseas laanu para cadi gusaana de gucheechenu diidxaʼ.
2 Gucheechenu diidxaʼ neca ruluíʼ qué zucaadiaga binni laanu. Tu para ngue zeʼ ca diidxaʼ ni guníʼ Oseas que. Zeni párapeʼ reinu de chii tribu stiʼ Israel. Ne ruluíʼ maʼ guirutiʼ qué runi adorar Jiobá raqué. Dede nepeʼ rey Jeroboán II maʼ cayuni «stale cosa malu nezalú Jiobá» ne cucaabe binni guni adorar yuzehuiiniʼ casi bizulú biʼniʼ Jeroboán I (2 Rey. 14:23, 24). Guti si Jeroboán II, guyuu xcaadxi rey ni biʼniʼ mandar lu reinu de chii tribu que, peru nin tobi de laacaʼ qué lica ñacanecaʼ reinu que para ñuni adorar Jiobá sti biaje. Últimu la? binitilú guidubi reinu que lu iza 740 ante de ca dxi stiʼ Jesús. Biaʼsi cincuenta y nueve iza nga biʼniʼ Oseas ni na Jiobá lade guiráʼ ca binni ni maʼ qué runi adorar Dios que. Cadi dxandíʼ rusihuinni nga pabiáʼ nadxibalube la? Ñee zinándanu ejemplu stiʼ Oseas ne zucheecherunu diidxaʼ guiráʼ iza neca qué riná binni gucaadiaga laanu o neca gucaalucaʼ laanu la? (2 Tim. 4:2.)
3. Ximodo rusihuinni ejemplu stiʼ Oseas pabiáʼ rilaselaʼdxiʼ Jiobá binni.
3 Cadi guiaandaʼ laanu pabiáʼ rilaselaʼdxiʼ Jiobá binni. Guidúʼyanu xi gudxi Jiobá Oseas: «Bichaganáʼ ti gunaa ni zapa jnadxii» (Os. 1:2). Bichaganabe Gómer, ne gupa gunaa riʼ ti hombrehuiiniʼ stibe; despué gupa gunaa riʼ xhupa baʼduʼ, peru zándaca maʼ cadi xiiñiʼ Oseas laacaʼ. Biziguenda Oseas gutiidilaʼdxiʼ donda stiʼ xheelaʼ ora bicheené gunaa riʼ laa ne biquiiñeʼ ejemplu riʼ para gusihuinni Jiobá pabiáʼ rilaselaʼdxiʼ reinu stiʼ Israel, purtiʼ bitiidilaʼdxiʼ donda stícabe ora guca arrepentírcabe (Os. 3:1; Rom. 9:22-26). Ñee zanda gucáʼnanu caadxi cosa ni riuuláʼdxinu ti gápanu tiempu para gusíʼdinu guiráʼ binni Jiobá nga ti Dios ni rilaselaʼdxiʼ la? (1 Cor. 9:19-23.)
4. Xi zanda gúninu pa rusisácanu guendanachaʼhuiʼ stiʼ Jiobá.
4 Nuu xpinni Jiobá maʼ bisaana xiixa profesión o xiixa dxiiñaʼ ra runi ganar stale bueltu ti ganda gapa jma tiempu para gucheeche diidxaʼ. Xcaadxi maʼ gudixhe ique cadi guichaganáʼ o cadi gapa xiiñiʼ para ganda gacané guiroobaʼ xhiiñaʼ Reinu. Ora guietenaláʼdxinu modo bibani Oseas, zándaca guiníʼ íquenu sicaríʼ: «Zuluaʼsiaʼ qué ñanda diʼ ñuneʼ guiráʼ ni bíʼnibe». Peru pa qué gusaana de gusisácanu guendanachaʼhuiʼ stiʼ Jiobá ne guni crenu de guidubi ladxidoʼno zanda iquiiñebe espíritu santu stibe para gudiibe stipa laanu la? zaquiiñebe laanu para gúninu xiixa dxiiñaʼ ni ruluíʼ nagana para laanu, cásica bizaaca Oseas (Mat. 19:26; Filip. 2:13).