Iquiiñenu ca revista ni cadi nacúbipeʼ ca jneza
Qué zabeendunu gastiʼ pa gápanu ca revista ca ra lídxinu o pa gusáʼbisinu cani, nga runi naquiiñeʼ guyúbinu modo gusaananenu cani binni. Ti revista si zanda gucaa binni chuulaʼdxiʼ guiziidiʼ jma de Dios ne gucaa laacabe guiníʼcabe lá Jiobá ora guinabaʼ ruaacabe laa (Rom. 10:13, 14). Raríʼ zeeda caadxi modo ni zanda gúninu para iquiiñenu ca revista ni cadi nacúbipeʼ ca.
Ora chuunu ca lugar huaxiéʼ rireeche diidxaʼ zanda gusaananu tobi de laacani ra yoo qué guidxélanu binni ne ra cadi guʼyaʼ guirutiʼ ni.
Ora chigucheechenu diidxaʼ ra riuu stale binni, casi ra ribézacabe carru o ra estación stiʼ tren, zanda guinabadiidxanu cani cabeza raqué pa ñuuláʼdxicaʼ ñuundacaʼ xiixa, ne óraque guluinu laacabe caadxi para cuícabe ni chuuláʼdxicabe.
Ora chuunu ndaaniʼ ca lavanderiá, ndaaniʼ ca yoo ra rápacabe ca binnigola, ra clínica o xcaadxi lugar casi laacani ni nuu neza ra rucheechenu diidxaʼ la? zanda gusaananu caadxi ndaaniʼ sala stícani. Galán guinínenu binni ni ruuyaʼ gaca dxiiñaʼ ndaaniʼ cani para cueenu permisu. Ne pa gúʼyanu maʼ nuu caadxi revista raqué la? maʼ cadi gusaananu jma.
Ora maʼ cayuʼnuʼ listu para chigánnanu tuuxa sti biaje, guiníʼ íquenu xi ziuuláʼdxibe gánnabe. Biiyaʼ pa nápabe xiiñibe, pa riuuláʼdxibe chizabe o pa riuuláʼdxibe gápabe yagahuiiniʼ. Guyúbinu lade ca revista ni nápanu xi ziuuláʼdxibe gúʼndabe para gusaananenu ni laabe.
Ora guinínenu tuuxa ni qué nidxélaganu laa chupa chonna beeu, galán guluinu laabe ca revista ni caʼruʼ guicaabe.