Lachinanda ejemplu stiʼ ca profeta: Sofonías
1. Ximodo nuu guidxi que dxi gucaʼ Sofonías profeta, ne xiñee nácabe ti ejemplu para laanu.
1 Biaʼ galaa de siglu gadxe ante de ca dxi stiʼ Jesús, maʼ qué nidxibi diʼ ca binni que ñuni adorarcaʼ Baal ndaaniʼ guidxi Judá. Nin cadi xadxí de biiticabe rey malu láʼ Amón que ne biaanaʼ ti hombrehuiiniʼ láʼ Josías lugar stibe casi rey (2 Crón. 33:21–34:1). Tiempu que nga gulí Jiobá Sofonías para guiníʼ ni gudxi Dios laa chiguni. Zándaca xiiñiʼ tobi de cani biʼniʼ mandar guidxi Judá que nga Sofonías, neca zaqué, qué nidxíbidibe ora gúdxibe ca xaíque guidxi que xi guníʼ Jiobá chiguni laacaʼ (Sof. 1:1; 3:1-4). Zacaca nga laanu, laaca rúninu stipa pur gácanu nadxibalú cásica gucaʼ profeta que ne qué rudiʼnu lugar gucueeza ca binnilídxinu laanu de guni adorarnu Jiobá (Mat. 10:34-37). Xi guníʼ Sofonías zazaaca ca binni que, ne xi guleendube yaʼ.
2. Xi naquiiñeʼ gúninu para «guila[nu] dxi guidxiichi Jiobá» yaʼ.
2 «Laguyubi Jiobá.» Jiobá si nga zanda gulá binni dxi de xiana stiʼ. Nga runi, gudxi Sofonías ca binni de Judá que guyúbicaʼ Jiobá, guyúbicaʼ gúnicaʼ ni jneza ne guyúbicaʼ gácacaʼ nachaʼhuiʼ laga nuuruʼ tiempu (Sof. 2:2, 3). Zacaca nga nabani binni ca dxi stinu riʼ. Nga runi, riguʼnu gana binni guyúbicaʼ Dios, cásica biʼniʼ Sofonías, peru laanu laaca naquiiñeʼ guyúbinu Dios ne cadi guicá íquenu gusaananu de chinándanu Jiobá (Sof. 1:6). Ruyúbinu Jiobá ora riduʼndaʼ chaahuinu stiidxabe ne rinábanu laabe guluiʼbe laanu xi naquiiñeʼ gúninu. Ruyúbinu gúninu ni jneza ora ribáninu casi na ca ley stiʼ Dios. Ruyúbinu gácanu nachaʼhuiʼ ora ruzúʼbanu diidxaʼ ne rinándanu guiráʼ ni quixheʼ xquidxi Jiobá.
3. Xiñee cadi naquiiñeʼ guireʼnu gana de gucheechenu diidxaʼ.
3 Cani galán ribeendunu. Ca diidxaʼ guníʼ Sofonías que, bicaani caadxi de ca binni de Judá guiníʼ íquecaʼ xi cayúnicaʼ, peru ni jma gucaneni laa nga Josías, purtiʼ bizulú biyúbibe Jiobá dxi nahuiinirube. Ne despué la? bisiá Josías guidxi Judá que ne guleebe guiráʼ bidóʼ biʼniʼ adorar ca binni que (2 Crón. 34:2-5). Ca dxi stinu riʼ, neca nuu de ca biidxiʼ stiʼ Reinu ca riaba guriá neza, lade guié o lade guichi la? nuu de laani riaba lu layú sicarú o ra nayá ne rireendú ni (Mat. 13:18-23). Nánnanu zaguu ruʼ Jiobá ndaayaʼ stipa rúninu pur cucheecherunu stiidxaʼ Reinu, ni zeeda gaca casi biidxiʼ ca (Sal. 126:6).
4. Xiñee naquiiñeʼ cuézanu dxi stiʼ Jiobá.
4 Guyuu caadxi binni de guidxi Judá que guníʼ íquecaʼ qué ziuu dxi guni Jiobá xiixa. Peru Jiobá gudxi laacabe mayaca guedandá dxi stiʼ (Sof. 1:12, 14). Ne cani guyubi si laabe nga cani zalá (Sof. 3:12, 17). Laga cábezanu dxi stiʼ Jiobá, cadi gusaananu de guni adorarnu laabe juntu né xcaadxi ni cayuni zacaca (Sof. 3:8, 9).