Ximodo ruuyaʼ Jiobá naa
1. Ximodo nga naca Biblia ca casi ti espeju.
1 Cada panda biaje ruuyuʼ lii lu espeju. Stale de laanu rúninu ni guiráʼ dxi, purtiʼ zacá ridúʼyanu paraa caquiiñeʼ guzucháʼhuinu. Zanda guchaaganu Biblia ca casi ti espeju. Ora ridúʼndanu ni racaneni laanu guidúʼyanu xi nuu ndaaniʼ ladxidoʼno ne ngapeʼ nga ni ruuyaʼ Jiobá (1 Sam. 16:7; Sant. 1:22-24). Stiidxaʼ Dios ca «ribee irá ni nuu ndaani ladxidóʼ no, ne ni cá lu xquenda biaani nu» (Heb. 4:12). Pa guidúʼndanu Biblia guiráʼ dxi ne guiníʼ íquenu lu ni cadúʼndanu zacaneni laanu guidúʼyanu paraa naquiiñeʼ guchaʼnu para gucheechenu diidxaʼ jma jneza. Xiñee rininu zacá yaʼ (Sal. 1:1-3).
2. Ximodo zanda gacané Biblia laanu guidúʼyanu modo nácanu.
2 Biquiiñeʼ Biblia ca casi ti espeju. Ca relatu zeeda ndaaniʼ Biblia stiʼ ca xpinni Jiobá ni qué nusaana de ñuni ni nabe dxiqué, racanécani laanu para guidúʼyanu gunáʼ nga ca guenda ni riuuláʼdxibe. Casi rey David la? bisisácabe lá Dios ne stale gana (1 Sam. 17:45, 46). Profeta Isaías guca nadxibalú ora guníʼ laa cheʼ chigucheecheʼ diidxaʼ ti lugar nabé nagana (Is. 6:8, 9). Pur nadxii Jesús Bixhoze ni nuu guibáʼ, biiyabe guendarucheeche diidxaʼ que casi xiixa ni riguu gana laabe, xiixa ni rusiecheʼ laabe ne cadi casi ora nuabe xiixa ni nabé nanaa (Juan 4:34). Ca xpinni Cristu de primé siglu que bicheechecaʼ diidxaʼ né stale gana, gúpacabe confianza zacané Jiobá laacabe ne qué niníʼ íquecabe nusaana de ñúnicabe dxiiñaʼ que (Hech. 5:41, 42; 2 Cor. 4:1; 2 Tim. 4:17). Ora guiníʼ íquenu ca ejemplu riʼ racanécani laanu guidúʼyanu modo laanu para ganda guni adorarnu Dios jma jneza.
3. Xiñee nagueendaca naquiiñeʼ guchaʼnu modo laanu.
3 Guni chaahuinu ni cadi biaʼsi nuu. Yanna, qué risaca diʼ pa guidúʼyanu laanu lu ti espeju ne qué guni chaahuinu ra guidúʼyanu nuu feu. Zanda guinábanu Jiobá gacané laanu para guidúʼyanu ximódopeʼ laanu ne guchaʼnu pa naquiiñeʼ gúninu ni (Sal. 139:23, 24; Luc. 11:13). Cumu maʼ huaxiéʼ tiempu nápanu ne nuu stale binni zanda guniti xquendanabani la? jmaruʼ si naquiiñeʼ guchaʼnu modo laanu (1 Cor. 7:29; 1 Tim. 4:16).
4. Xi rizaaca né binni ni guʼyaʼ modo laa lu stiidxaʼ Dios ne ruchaa ra guʼyaʼ cadi cayuni jneza yaʼ.
4 Modo laanu ndaaniʼ ladxidoʼno, ni ruuyaʼ Jiobá, jma risácani que ni rusihuínninu nezalú xcaadxi binni (1 Ped. 3:3, 4). Xi rizaaca né binni ni guʼyaʼ modo laa lu stiidxaʼ Dios ne ruchaa ra guʼyaʼ cadi cayuni jneza yaʼ. Runi ni na ca diidxaʼ riʼ: «[Pa] izaalaʼdxi nu guni nu ni na ni, sin usiaʼnda nu ni ma bina diaga nu la? zaguu Dios ndaaya irá ni runi nu» (Sant. 1:25). Zaca nga laani, ziuʼnu jma nayecheʼ ora gúninu ni na Dios ne zúninu xhiiñanu jma jneza purtiʼ «naca nu casi ti espeju ra rihuinni enda nandxóʼ sti [Jiobá]» (2 Cor. 3:18).