Lachinanda ejemplu stiʼ ca profeta: Nahúm
1. Xi rizíʼdinu de libru stiʼ Nahúm.
1 Cani riaana si de guidxi Nínive guyuu dxiqué, rusihuinni cani dxandíʼ ca diidxaʼ bizeeteʼ Nahúm, rusabanáʼ Jiobá ca xhenemigu. Nin ni jma nadipaʼ qué zanda guzuhuaa nezalube para gucaalú laabe (Nah. 1:2, 6). Ora guʼndaʼ chaahuinu profecía bicaa Nahúm rizíʼdinu stale ejemplu ni zanda iquiiñenu ora gucheechenu diidxaʼ.
2. Ximodo nga reeda gaca ca diidxaʼ zinenu ra nuu binni xiixa ni riguixhedxí ladxidoʼcaʼ.
2 Quixhedxinu ladxidóʼ binni ne guluinu laacaʼ xi cabézanu. Ora ti luguiáʼ si guidúʼndanu libru stiʼ Nahúm, ruluíʼ puru si ra caníʼ Dios chigusabanáʼ guidxi Nínive nga zeeda luni, capital stiʼ Asiria guyuu dxiqué, guidxi biʼniʼ cré jma risaca qué xcaadxi (Nah. 1:1; 3:7). Peru ca diidxaʼ que beeda gaca cani caadxi diidxaʼ sicarú para xquidxi Jiobá. Lá Nahúm, ni riníʼ «Ni riguixhedxí ladxidóʼ», gúdxibe xcaadxi de ca judíu que mayaca guinitilú ca xhenemígucaʼ. Ne laaca gúdxibe laacaʼ Jiobá nga «ti lugar ra naguidxi ca dxi jma nagana» (Nah. 1:7). Ora maʼ zigucheechenu diidxaʼ, laaca diidxaʼ sicarú nga zinenu ne riguʼnu gana binni guyúbicaʼ guilacaʼ ra nuu Jiobá (Nah. 1:15).
3. Cásica Nahúm, ximodo zanda iquiiñenu ejemplu ne ilustración ora maʼ cucheechenu diidxaʼ.
3 Iquiiñenu ejemplu ne ilustración. Jiobá gudxi Nahúm iquiiñeʼ ejemplu stiʼ Tebas (o No-amón), ti guidxi stiʼ Egipto ni binitilú ca asiriu, para guluiʼbe xi chiguizaaca guidxi Nínive (Nah. 3:8-10). Ora guinínenu binni de dxi guinitilú ca cosa malu riʼ, iquiiñenu ca profecía zeeda lu Biblia para guluinu dxandíʼ runi Jiobá guiráʼ ni guiníʼ dede ca cosa jma nahuiiniʼ guiree ruaabe. Casi dxi bidaaguʼ ca soldadu stiʼ Babilonia ne ca Medo para gucaalucaʼ Nínive lu iza 632 ante de ca dxi stiʼ Jesús. Runi ca nisaguié naroʼbaʼ que biree guiiguʼ Tigris que ne nuu lugar biaba lindaa stiʼ guidxi que. Zaqué gucuaacabe guidxi Nínive casi modo maca guníʼ Jiobá que (Nah. 1:8; 2:6).
4. Ximodo zanda guininu diidxaʼ ni cadi nagana ne ni guiene binni ora maʼ cucheechenu diidxaʼ yaʼ.
4 Guininu diidxaʼ ni cadi nagana ne ni guiene binni. Profecía bicaa Nahúm ca bisiene chaahuibe ni, nabé galán ni ne nayaʼniʼ modo guniʼbe ni (Nah. 1:14; 3:1). Zacaca nga laanu, laaca naquiiñeʼ guiene binni laanu ora guininu (1 Cor. 14:9). Ora primé biaje chigánnanu tuuxa, naquiiñeʼ gábinu laabe xi pur ziuunu ra nuube. Gacanenu cani cadúʼndanenu Biblia gápacaʼ fe Jiobá ne Stiidxabe ne guiénecabe xi guiráʼ ribeendúcabe pur cani caziidicabe (Rom. 10:14).
5. Xidé riuunu seguru ora ridúʼndanu profecía stiʼ Nahúm.
5 Biʼniʼ cré Nahúm raca guiráʼ cani riníʼ Jiobá, ne zacá rihuinni ni lu libru ni ziné labe ca. Laga zedadxiña dxi gunitilú Dios guidxilayú stiʼ Binidxabaʼ, nabé riguixhedxí ca diidxaʼ guníʼ Jiobá riʼ ladxidoʼno: «Qué zusabanáʼ Jiobá ca xhenemigu chupa biaje, sínuque ti biaje si» (Nah. 1:9).