Xcaadxi diidxaʼ riuundaʼ nacubi para gusisácanu Jiobá
1 Últimu guendaridagulisaa ni raca ti biaje lu ti iza biʼniʼ Watch Tower Bible and Tract Society of Pennsylvania 4 stiʼ octubre 2014 bieeteʼ zadxaa caadxi diidxaʼ lu libru Guidúʼndanu para Jiobá. Nabé biecheʼ cani guyé guendaridagulisaa ca ora binadiágacaʼ ca diidxaʼ que. Laaca bisietenaláʼdxicabe laacaʼ nabé risaca ca diidxaʼ riuundaʼ ca para guni adorarnu Jiobá (Sal. 96:2).
2 Peru xiñee caquiiñeʼ guidxaa caadxi diidxaʼ lu libru riʼ yaʼ. Nuu caadxi razón. Primé la? purtiʼ yanna jma maʼ riene chaahuinu caadxi relatu zeeda lu Biblia, nga runi nuu chupa chonna diidxaʼ riuundaʼ napa xidé guidxaa letra stiʼ (Prov. 4:18). Ne guiropa la? lu stale idioma cadxaa caadxi diidxaʼ lu Traducción del Nuevo Mundo para guiene chaahuinu Biblia. Nga runi zándaca zadxaa caadxi diidxaʼ nuu lu diidxaʼ riuundaʼ stinu ni biree lu Biblia ni maca nápanu. Ne cumu zándaca stale nga ni zadxaa lu libru de diidxaʼ riuundaʼ stinu la? maʼ gudíxhecabe cúʼcabe xhupa xhonna nacubi luni.
3 Ñee zabézanu dede ora gaca imprimir libru riʼ nga guidúʼndanu ca diidxaʼ riuundaʼ nacubi riʼ la? Coʼ, purtiʼ lu ca beeu guiuʼnu ca ziuu caadxi de laacani lu jw.org. Cadi xadxí de cúʼcabe tobi nacubi, zadúʼndanu ni ora guiluxe Guendaridagulisaa stiʼ Dxiiñaʼ Stinu. Lu programa stiʼ semana ca zeeda lá diidxaʼ riuundaʼ ca ne cueʼni zacá «diidxaʼ riuundaʼ nacubi».
4 Ximodo guizíʼdinu ca diidxaʼ riuundaʼ nacubi riʼ. Cadi casi ziuunu nga zazíʼdinu ti canción. Peru laanu racaláʼdxinu gúninu casi biʼniʼ salmista ni guníʼ: «Zusisacaʼ lii ra guundaʼ, nga runi qué zusaanaʼ de guundaʼ» (Sal. 30:12). Ca conseju zeeda raríʼ zacané laanu ganda guizíʼdinu ximodo guidúʼndanu ca diidxaʼ riuundaʼ riʼ ti ganda guidúʼndanu cani de guidubi ladxidoʼno.
Cumu ziuu ca diidxaʼ riuundaʼ riʼ lu jw la? zanda gucaʼdiáganu cani stale biaje. Ne nga zacané laanu guizíʼdinu cani jma nagueenda.
Guni estudiarnu cani ne gúninu pur guizíʼdinu cani de memoria.
Guidúʼndanu cani stale biaje dede ora maʼ ridúʼndanu cani galán.
Guni ensayarnu cani dxi rúninu Adoración en familia para ganda guʼndaʼ binnilídxinu cani galán.
5 Lu ca beeu guiuʼnu riʼ, ora gueeda ti diidxaʼ riuundaʼ nacubi lu programa para guiluxenenu Guendaridagulisaa stiʼ Dxiiñaʼ Stinu la? primeru zucaadiáganu saa stiʼ diidxaʼ riuundaʼ ca. Oracaruʼ zadúʼndanu ni casi modo maca rúninu.
6 Ni dxandíʼ la? nabé risaca guidúʼndanu lu ca guendaridagulisaa stinu, purtiʼ lu cani ruchaaganu ridxi stinu para gusisácanu Jiobá. Nga runi, cadi gadxé ni maʼ cayúninu ora maʼ cayuundaʼ lu ca guendaridagulisaa ca.
7 Nuu sti cosa ni zanda gúninu para gusihuínninu nabé rusisácanu ca saa stiʼ ca diidxaʼ riuundaʼ stinu. Lu ca asamblea rápanu, ante guzulú cada ndaa stini, riguucabe caadxi saa stiʼ ca diidxaʼ riuundaʼ stinu. Stale bíʼchinu ne bizáʼnanu de gadxé gadxé guidxi rúnicaʼ stale stipa para guni grabarcaʼ ca saa ni riquiiñenu para guni adorarnu Jiobá. Riécabe Patterson (Nueva York) chupa biaje lu ti iza, ne laacabe riguíxecabe pasaje stícabe. Nga runi, ora guinabaʼ presidente stiʼ cada ndaa stiʼ asamblea ca laanu cuinu lugar stinu ne gucaʼdiáganu saa maʼ biʼniʼ grabar orquesta ca la? naquiiñeʼ guzúʼbanu diidxaʼ nagueendaca. Zacaneni laanu para cuʼnu listu ladxidoʼno ti ganda gucaʼdiáganu guiráʼ ni chitiidiʼ lu asamblea ca.
8 Ora guiluxe guendaridagulisaa riʼ zadúʼndanu ti diidxaʼ riuundaʼ nacubi ni láʼ «¡Gueeda Reinu stiʼ Dios ni maʼ cayuni mandar!». Lu guendaridagulisaa ni bizéʼtenu runi xquidxi Jiobá ti biaje lu ti iza, raqué guníʼcabe maʼ nuu diidxaʼ riuundaʼ riʼ, gúcani para guietenaláʼdxinu cusaa Reinu stiʼ Dios ti gayuaa iza de cayuni mandar.
9 Tobi de ca «cosa galán» ni maʼ bidii Jiobá laanu nga ca diidxaʼ riuundaʼ nacubi riʼ (Mat. 12:35a, TNM). Gúninu stipa pur guizíʼdinu cani ti ganda guidúʼndanu cani de guidubi ladxidoʼno. Pa gúninu ni la? zusisácanu Jiobá ora guidúʼndanu (Sal. 147:1).