Iquiiñenu folletu Cani zaziidiluʼ lu Stiidxaʼ Dios para guzulú guinínenu binni
1. Xi folletu nacubi nápanu para gucheechenu diidxaʼ.
1 Cadi tan xadxí gucuaanu ti folletu nacubi Cani zaziidiluʼ lu Stiidxaʼ Dios. Zándaca maʼ bidiʼnu cuenta neni chupa chonna textu despué de ti guendarinabadiidxaʼ cásica libru Razonamiento, nga runi zanda iquiiñenu ni para guzulú guinínenu binni. Ximodo zanda iquiiñenu ni ora maʼ cayuʼnu listu para chigucheechenu diidxaʼ.
2. Ximodo zanda iquiiñenu folletu Cani zaziidiluʼ lu Stiidxaʼ Dios ora gucheechenu diidxaʼ.
2 Zanda iquiiñenu guendarinabadiidxaʼ 8 stini ne guininu: «Cayuínedu ca xpecínuluʼ diidxaʼ neca ti ratuhuiiniʼ ne maʼ bidúʼyadu stale de laacaʼ rinabadiidxacaʼ pa Dios napa donda pur cayacaná binni. [Nuu lugar jma riná binni gucaadiaga ora guluíʼcabe laa guendarinabadiidxaʼ zeeda lu folletu ca.] Lii xi raʼbuʼ. [Guleza guicábibe.] Biblia cacabi ni gunabadiidxanu ca». Despué zanda gúʼndaluʼ ne gusiéneluʼ chupa chonna de ca textu zeeda luni. Pa chuulaʼdxiʼ binni ca ni cusiéneluʼ laa la? biluíʼ laabe primé yaza stiʼ folletu riʼ ra zeeda 20 guendarinabadiidxaʼ ne gudxi laabe pa zanda guibiguétaluʼ sti dxi para gusiéneluʼ laabe tobi de laacani. Laaca zanda gusaananeluʼ laabe tobi de ca publicación ni riquiiñenu para gudiʼnu estudiu binni ne gábiluʼ laabe laaca cusiene ni de tema guniʼtu ca.
3. Ximodo zanda iquiiñenu folletu riʼ ora guinínenu ca binni ni nuu ndaaniʼ ti religión ni qué runi cré Cristu.
3 Ora gucheechenu diidxaʼ ra nuu ca binni ni nuu ndaaniʼ ti religión ni qué runi cré Cristu zanda iquiiñenu guendarinabadiidxaʼ 4 ne 13 dede 17 para guinínenu laacabe. Zanda iquiiñeluʼ guendarinabadiidxaʼ 17 para guiniʼluʼ: «Canagánnadu binni neca ti ratuhuiiniʼ para gacanedu familia sticaʼ. Cadi dxandíʼ nabé cadxaagalú ca familia stale guendanagana yanna riʼ la? [Guleza guicábibe.] Stale guendaxheelaʼ rúnicaʼ stipa chinándacaʼ ni na ca diidxaʼ riʼ: “Gunaa naquiiñeʼ gapa stale respetu xheelaʼ”. [Cadi caquiiñeʼ gábiluʼ laabe pa cayuundaluʼ ni na Efesios 5:33. Pa caníʼneluʼ ti gunaa la? zanda guzeeteluʼ ni na Efesios 5:28.] Ñee raʼbuʼ zanda gacané ca conseju riʼ ca guendaxheelaʼ la?».
4. Xi zanda gúniluʼ ora maʼ biluxe guníʼneluʼ ti binni ni nuu ndaaniʼ ti religión ni qué runi cré Cristu.
4 Guiluxe si guiníʼneluʼ binni ca, gudxi laabe zabiguétaluʼ ra nuube para guiníʼrutu de tema ca. Ora guibiguétaluʼ ra nuube, zanda gusiéneluʼ laabe sti textu ni zeeda lu guendarinabadiidxaʼ bíʼndatu. Ora ganda la? bisiene laabe lu Biblia biree guiráʼ conseju guniʼtu. Biiyaʼ xidé guniʼtu ne xi riníʼ ique binni ca de Biblia para gusaananeluʼ laabe ti publicación ni zándaca chuuláʼdxibe. (Biiyaʼ Xhiiñaʼ Reinu ni Rúninu diciembre 2013, yaza 3 dede 6.)