Caja ra dxaʼ herramienta ni riquiiñenu para gusíʼdinu binni
1. Xiñee zanda guchaaganu ca xpinni Cristu né ti carpinteru.
1 Ca carpinteru nápacaʼ stale clase herramienta. Nuu caadxi herramienta maca nuusi ora riquiiñecabe cani lu xiixa dxiiñaʼ ne nuu xcaadxi de laacani jma riquiiñecabe. Cani jma maʼ nanna guni dxiiñaʼ riʼ rizanecaʼ ti caja ra dxaʼ herramienta ni jma riquiiñecaʼ ne laacani nga ni jma nánnacaʼ iquiiñecaʼ. Stiidxaʼ Dios cayabi cada Testigu guizaalaʼdxiʼ gucheeche diidxaʼ jneza ne guni «dxiiña modo chuʼlaʼdxi Dios ti qué gap[a] xi pur ituí lú» nezalube (2 Tim. 2:15). Gunáʼ nga herramienta jma risaca nápanu yaʼ. Laani nga Biblia ne riquiiñenu ni para gacanenu binni gaca xpinni Cristu (Mat. 28:19, 20). Nga runi, napa xidé gúninu stipa «gusíʼdinu stiidxabe jneza». Peru guiráʼ xpinni Cristu naquiiñeʼ gánnanu ximodo iquiiñenu xcaadxi herramienta nápanu para gusíʼdinu binni stiidxaʼ Dios (Prov. 22:29).
2. Gunáʼ nga ca herramienta jma riquiiñenu para gusíʼdinu binni.
2 Ca herramienta ni jma riquiiñenu para gusíʼdinu binni. Xiruʼ herramienta nápanu aparte de Biblia. Nápanu libru Xipeʼ ndiʼ cusiidiʼ Biblia ne laani nga ni jma riquiiñenu para guidúʼndanenu binni Biblia. Ora guiluxe guidúʼndanenu estudiante stinu libru riʼ, riquiiñenu libru Cadi guixélenu de Dios ni nadxii laanu para gacanenu laa guni ni na ca principiu stiʼ Biblia lu xquendanabani. Nga runi, napa xidé ganna chaahuinu iquiiñenu guiropaʼ libru riʼ. Laaca naquiiñeʼ gápanu chupa chonna folletu ndaaniʼ caja herramienta stinu. Casi folletu Ca diidxaʼ sicarú ni zeeda de Dios riquiiñeʼ ni para guzulú gúʼndanenu binni Biblia. Pa nuu binni neza ra rucheechenu diidxaʼ ni huaxiéʼ nanna guʼndaʼ o ni riníʼ sti idioma ne gastiʼ xiixa publicación lu stiidxaʼ o nuu chupa chonna si la? zanda iquiiñenu folletu Bicaadiaga Dios o Bicaadiaga Dios ne qué ziuu dxi gátiluʼ. Sti herramienta ni jma riquiiñenu para gacanenu ca estudiante gunibiaʼcaʼ xquidxi Dios nga folletu Tuu nga cani cayuni ni na Jiobá ca dxi riʼ. Ca videu nápanu laaca zanda gacané cani binni gaca xpinni Cristu ne galán gúninu pa guizíʼdinu iquiiñenu cani. Chupa de laacani nga Xiñee naquiiñeʼ gúʼndaluʼ Biblia ne Ximodo raca ca guendaridagulisaa stidu.
3. Xi zazíʼdinu lu xcaadxi tema gueeda lu Xhiiñaʼ Reinu ni Rúninu.
3 Lu xcaadxi tema gueeda lu Xhiiñaʼ Reinu ni Rúninu zazíʼdinu ximodo iquiiñenu ca publicación nápanu ndaaniʼ caja herramienta stinu. Pa gúninu stipa pur iquiiñenu cani jneza la? zusihuínninu zinándanu conseju zeeda lu Biblia riʼ: «Biiya ibani lu jneza ne zaqueca biiya usiidi lu ni jneza ne cadi iree chu lu de laani. Pa chi nanda lu irá ni cayabe lii ri la? zalá luʼ ne laca zulá lu cani cusiidi luʼ» (1 Tim. 4:16).