Ximodo iquiiñenu ca grabación ni nápanu
1. Aparte de ca publicación ni maʼ guca imprimir, xiruʼ zanda gacané laanu.
1 Lu sitiu de Internet jw.org, randa ruundaʼ stale binni ni chuulaʼdxiʼ ne ni gacané laa (Ecl. 12:10). Peru, ñee maʼ huacaadiágaluʼ ca grabación nuu luni la? Stale de ca publicación nuu racá, laaca zanda gucaadiaga binni cani. Ximodo zanda gacané cani laanu yaʼ.
2. Ximodo zanda iquiiñenu ca grabación ca ora gápanu adoración en familia ne lu estudiu personal stinu.
2 Para estudiu personal ne ora ridúʼndanenu familia. Riquiiñenu tiempu stinu jma jneza ora rucaʼdiáganu grabación stiʼ Biblia, ca revista ne xcaadxi publicación ora maʼ cayúninu ca bieque stinu o maʼ ziuunu paxaraa (Efes. 5:15, 16). Sti cosa ni zanda gúninu ora gápanu adoración en familia nga gucaʼdiáganu ti grabación ne chinándanu ni lu publicación ca. Ne lu estudiu personal stinu zanda iquiiñenu ca grabación ca para gacané cani laanu guidúʼndanu jma jneza o pa cazíʼdinu sti diidxaʼ.
3. Tu rábiluʼ jma ziuulaʼdxiʼ gucaadiaga ca grabación stinu ora maʼ canagucheechenu diidxaʼ.
3 Para gucheechenu diidxaʼ. Stale binni ni rigánnanu ora maʼ zigucheechenu diidxaʼ riniʼcaʼ qué gápacaʼ tiempu para gúʼndacaʼ, peru zándaca nacaʼ gucaadiágacaʼ ti grabación. Xcaadxi riniʼcaʼ sti diidxaʼ ne zándaca jma chuuláʼdxicaʼ gucaadiágacaʼ stiidxaʼ Reinu pa gucaadiágacaʼ ni lu stiidxacaʼ (Hech. 2:6-8). Nuu lugar nabé riuulaʼdxiʼ binni gucaadiaga xiixa. Casi ca binni de guidxi hmong, nápacaʼ costumbre de güínecaʼ ca xiiñicaʼ historia byuiʼné bixhózecaʼ laacaʼ ne qué riaandaʼ laacaʼ ni gucaadiágacaʼ. Ndaaniʼ stale guidxihuiiniʼ de África, riuulaʼdxiʼ binni guiziidiʼ ora gucaadiaga historia.
4. Xi naquiiñeʼ guiníʼ íquenu ante iquiiñenu xiixa grabación ora chigucheechenu diidxaʼ.
4 Guníʼ ique ca binni ni nabeza lu territorio stiuʼ, ñee zanda quíxheluʼ xiixa grabación lu diidxaʼ riníʼ ca binni ca la? Ñee runibiaʼluʼ tuuxa ni zanda gacané xiixa grabación laa pa guseendaluʼ ni lu correu electrónicu la? Ñee raʼbuʼ ziuulaʼdxiʼ tuuxa ni bisihuinni riuulaʼdxiʼ guiziidiʼ pa guni grabarluʼ ti discu stiʼ ti audio ne gudiiluʼ ni laa ne ti publicación ni maʼ guca imprimir la? Cada biaje gudiʼnu guidubi ti libru, ti folletu, ti revista ne ti tratadu lu formatu electrónicu, zanda gucaʼnu ni lu informe stinu. Ca grabación ca cadi para si lu estudiu personal stinu cani, sínuque zanda gacané cani binni para chuulaʼdxiʼ guiziidiʼ de Dios (1 Cor. 3:6).