Riguu Dios ndaayaʼ ca ni ruzuubaʼ stiidxaʼ

Guníʼ profeta Moisés zaguu Dios ndaayaʼ laanu pa gúninu ni ná ca mandamientu stiʼ (Deuteronomio 10:13; 11:27). Qué ruzúʼbanu stiidxaʼ Dios purtiʼ ridxíbinu guni castigar laanu, sínuque rúninu ni purtiʼ guizáʼ galán ca cualidad ni nápabe ne purtiʼ nadxiinu laabe. Ne cumu nadxiinu laabe la? ruzúʼbanu stiidxabe ne qué rúninu xiixa ni uguu laabe triste. «Sicaríʼ nga gannaxhiinu Dios: gúninu ni ná ca mandamientu stiʼ» (1 Juan 5:3).

Yanna, ¿xi ndaayaʼ zacaanu pa guzúʼbanu stiidxaʼ Dios yaʼ? Guzéʼtenu chupa de laacani.

1. PA GUZÚʼBANU STIIDXAʼ DIOS ZÁCANU BINNI NUU XPIAANIʼ

«Naa, Jehová, naa nga Dios stiluʼ, ni cusiidiʼ lii para cheʼ ni lii galán. Ni cayabi lii gunáʼ nga neza ra naquiiñeʼ saluʼ» (ISAÍAS 48:17).

Jehová, Dios ni bizáʼ laanu, runibiáʼ ne racané laanu ora caquiiñenu ni. Pa racaláʼdxinu gacané ca conseju stibe laanu para guicaanu decisión jneza la? caquiiñeʼ guidúʼndanu Biblia para gánnanu xi racalaʼdxiʼ Dios ne gúninu cani.

2. PA GUZÚʼBANU STIIDXAʼ DIOS ZABÁNINU NAYECHEʼ

«¡Dichoso nga ca ni rucaadiaga stiidxaʼ Dios ne rúnicaʼ ni ná ni!» (LUCAS 11:28).

Tiempu riʼ, millón de binni ni runi ni ná Stiidxaʼ Dios nabánicaʼ nayecheʼ. Guzéʼtenu ti ejemplu. Ti hombre de España, ni guizáʼ nagueenda ridxiichi, feu modo runi tratarbe binni dede né xheelabe. Ti biaje biindabe ni bicaa profeta Moisés de ca cualidad ni napa José, xiiñiʼ Jacob. Bitoocabe José para gaca esclavu ne guluucabe laa ndaaniʼ cárcel sin guzaabi gastiʼ. Neca zaqué, qué nusaana de ñácabe ti binni nadóʼ, nachaʼhuiʼ ne ni riá xcaadxi (Génesis, capítulo 37 hasta 45). Hombre de España que guníʼ: «Ora guníʼ iqueʼ ejemplu stiʼ José, bicaa ni naa gacaʼ ti binni nadóʼ, nachaʼhuiʼ ne gucueezaʼ laca naa. Yanna maʼ nabaneniáʼ familia stinneʼ nayecheʼ».

Lu Stiidxaʼ Dios zanda guidxélanu xcaadxi conseju ni zacané laanu gánnanu modo guni tratarnu xcaadxi. Lu sti tema ca zadúʼyanu jma de laani.