¿Ximodo rusihuínninu nadxiinu xcaadxi binni?

Guiranu ziúpanu de primé hombre, Adán. Nga runi, nácanu ti familia naroʼbaʼ. Neca naquiiñeʼ gannaxhiisaa ne gaca respetarsaa ca ni nuu ndaaniʼ ti familia la? nagana nga guidxélanu ti familia ni gusihuinni ni. Peru cadi nga diʼ nga ni riuulaʼdxiʼ Dios.

¿XI RUZEETEʼ BIBLIA DE GUENDARANNAXHII?

«Gunnaxhii prójimo stiluʼ cásica nadxiiluʼ lii» (LEVÍTICO 19:18).

Lagannaxhii «ca enemigu stitu» (MATEO 5:44).

¿XIMODO RUSIHUÍNNINU NADXIINU XCAADXI BINNI?

Lu 1 Corintios 13:4-7 cayabi Dios laanu ximodo nga ti binni ni napa amor.

«Ti binni ni napa amor la? napa paciencia ne nachaʼhuiʼ».

Guníʼ ique ndiʼ. ¿Ximodo runi sentirluʼ ora gapa ti binni paciencia, gaca nachaʼhuiʼ né lii ne cadi guidxiichi ora gucheeluʼ?

«Ti binni ni napa amor la? qué rapa envidia».

Guníʼ ique ndiʼ. ¿Ximodo runi sentirluʼ ora qué runi cré tuuxa lii o napa envidia lii?

Ti binni ni napa amor la? «qué ruyubi puru para laasi».

Guníʼ ique ndiʼ. ¿Ximodo runi sentirluʼ ora runi respetar tuuxa ni riníʼ íqueluʼ ne qué ricá tema gaca puru si ni ná?

Ti binni ni napa amor la? «qué rugabaʼ panda biaje guninácabe laa».

Guníʼ ique ndiʼ. Nuu Dios dispuestu guni perdonar ca ni gaca arrepentir de ca pecadu stiʼ. Biblia ná: «Cadi guiráʼ ora ruluíʼnabe ra rucheʼnu ne qué zadaabe xiana para siempre» (Salmo 103:9). Guizáʼ riéchenu ora runi perdonar tuuxa laanu pur ni bíninu laa. Nga runi, caquiiñeʼ chuʼnu dispuestu guni perdonarnu ca ni guni laanu xiixa (Salmo 86:5).

Ti binni ni napa amor la? «qué riecheʼ ora qué raca ni jneza».

Guníʼ ique ndiʼ. Ora rizaacanu xiixa cosa malu, qué riuuláʼdxinu guiecheʼ xcaadxi pur ni bizaacanu. Nga runi qué riéchenu ora runi sufrir xcaadxi, neca xa cadi jneza modo biʼniʼ tratarcaʼ laanu.

Pa racaláʼdxinu uguu Dios ndaayaʼ laanu la? caquiiñeʼ gannaxhiinu xcaadxi biaʼ tiica iza nápacaʼ, intiica guidxi o religión laacaʼ. Ti modo zanda gusihuínninu nadxiinu binni nga ora gacanenu ca ni caquiiñeʼ tu gacané laacaʼ.