Cayuni dirigir Jehová organización stiʼ

1. ¿Xiruʼ naquiiñeʼ gúninu laanu ca xpinni Cristu ni maʼ guyuunisa?

PA MAʼ guyuunísanu, maʼ bisihuínninu nezalú binni nápanu fe Jehová ne nuunu dispuestu gúninu ni ná organización stiʼ.b Peru naquiiñeʼ guquídxinu fe stinu ne gápanu jma confianza caquiiñebe organización stibe tiempu riʼ para gúnibe ni nabe.

2, 3. ¿Xi chonna cualidad stiʼ Jehová rihuinni pur modo runi dirigirbe organización stibe?

² Tiempu riʼ, modo cayuni dirigir Jehová organización stiʼ rusihuínnini ximodo laabe, xi naguixhe íquebe gúnibe ne gunáʼ nga ca ley stibe. Guidúʼyanu chonna cualidad stiʼ Jehová ni rihuinni lu organización stiʼ.

³ Primé, «biaʼca risaca guiráʼ binni nezalú Dios» (Hech. 10:34). Cumu nadxii Jehová binni, bidiibe Xiiñibe gatiʼ pur guiráʼ (Juan 3:16; 1 Tim. 2:6). Para gacané guendaguti stiʼ Jesucristu stale binni la? riquiiñeʼ Jehová xquidxi para chinecaʼ ca noticia galán ra nuu binni ni racalaʼdxiʼ gunadiaga ni. Guiropa, Jehová la? «cadi ti Dios de desorden laa, sínuque ti Dios de paz» (1 Cor. 14:33, 40). Nga runi, naquiiñeʼ gaca ca xpínnibe ordenadu ne chuʼcaʼ tobi si. Guionna, Jehová nga Instructor ni jma nanna gusiidiʼ (Is. 30:20, 21). Pur nga la? rusiidiʼ organización stibe ni ná Stiidxabe, ne rúnicaʼ ni ndaaniʼ congregación ne ora runi predicarcaʼ. ¿Ximodo bihuinni guionnaʼ cualidad riʼ ndaaniʼ congregación ni guyuu lu primé siglu? ¿Ximodo rusihuinni xquídxibe cani tiempu riʼ? ¿Ne ximodo racané espíritu santu stiʼ Jehová ca ni runi ni ná organización stibe tiempu riʼ?

«BIAʼCA RISACA GUIRÁʼ BINNI NEZALÚ DIOS»

4. Casi ná Hechos 1:8, ¿xi biʼniʼ mandar Jesús ca discípulo stiʼ gúnicaʼ, ne xi zacané laacaʼ gúnicaʼ dxiiñaʼ riʼ?

⁴ Lu primé siglu. Mensaje ni biʼniʼ predicar Jesús gucané ni guiráʼ binni gapa ti esperanza (Luc. 4:43). Biʼniʼ mandarbe ca discípulo stibe gúnicaʼ dxiiñaʼ ni bizulube ne guiníʼnecaʼ binni de laani dede ca lugar ni nuu «jma zitu lu guidxilayú» (biindaʼ Hechos 1:8). Peru qué zanda gúnicaʼ dxiiñaʼ riʼ né stipa si sticaʼ. Nga runi gudxi Jesús laacabe zacané espíritu santu laacabe (Juan 14:26; Zac. 4:6).

5, 6. ¿Ximodo gucané espíritu santu ca discípulo stiʼ Jesús?

⁵ Gucuaa ca discípulo stiʼ Jesús espíritu santu lu Pentecostés stiʼ iza 33. Cumu gucané espíritu santu laacabe la? bizulú biʼniʼ predicárcabe, ne qué nindaa, stale mil binni bizulú biziidiʼ ca noticia galán stiʼ Dios (Hech. 2:41; 4:4). Ne dxi guzananda binni laacabe, qué nidxíbicabe, sínuque gunábacabe Dios gacané laabe ne sicaríʼ biʼniʼ orárcabe: «Gucané ca esclavu stiluʼ guni predicarcaʼ stiidxaluʼ né valor». Biluxe si biʼniʼ orárcabe «bidxácabe de espíritu santu ne caníʼcabe stiidxaʼ Dios né valor» (Hech. 4:18-20, 29, 31).

⁶ Laaca bidxagalú ca xpinni Cristu riʼ xcaadxi guendanagana. Qué gápacabe stale copia stiʼ Stiidxaʼ Dios ne guiráʼ publicación ni nápanu tiempu riʼ. Ne laaca naquiiñeʼ guni predicárcabe stale binni ni riníʼ sti idioma. Neca zacá, gunda bíʼnicabe ti cosa ni ruluíʼ nagana, lu caadxi si década biʼniʼ predicar ca discípulo riʼ ca noticia galán stiʼ Dios ra nuu binni «lu guidubi guidxilayú» (Col. 1:6, 23).

7. Racá jma de ti gayuaa iza, ¿ximodo gunna ca xpinni Jehová xi cabézabe gúnicaʼ, ne xi bíʼnicaʼ?

⁷ Tiempu riʼ. Cayuni dirigir Jehová xquidxi ne cudii stipa laacabe. Ne riquiiñebe Stiidxabe para guni dirigirbe laacaʼ. Lu Stiidxabe riete guiráʼ ni biʼniʼ Jesús dxi biʼniʼ predicar ne laaca cá mandatu bidiibe ca discípulo stibe de gúnicaʼ dxiiñaʼ ni bizulube (Mat. 28:19, 20). Lu beeu julio de 1881, revista Torre stiʼ ni rapa guníʼ sicaríʼ: «Qué nibí Dios laanu para gusisaca binni laanu ne gápanu stale cosa ni risaca, sínuque gulibe laanu para iquiiñenu stipa stinu ne guiráʼ ni nápanu para guni predicarnu ca noticia galán». Ne folletu ni láʼ To Whom the Work Is Entrusted (A quienes se les confía la obra), ni biree lu iza 1919, sicaríʼ guníʼ: «Nuu stale dxiiñaʼ stiʼ Señor, ne zúninu dxiiñaʼ riʼ purtiʼ cayacanebe laanu». Nga runi, biʼniʼ ca xpinni Cristu ni bibani lu primé siglu dxiiñaʼ riʼ né stale gana ne gúpacaʼ confianza zacané espíritu santu laacaʼ guni predicarcaʼ guiráʼ xixé binni. Ne tiempu riʼ, laaca ngaca confianza nápanu.

8, 9. Dede dxiqué hasta tiempu riʼ, ¿xi guiráʼ riquiiñeʼ organización stiʼ Jehová para gaca predicar ca noticia galán?

⁸ Dede dxiqué hasta tiempu riʼ, riquiiñeʼ organización stiʼ Jehová ca herramienta de ni jma galán para gaca predicar ca noticia galán. Lade cani nuu ca publicación ni raca imprimir, «Foto-Drama de la Creación», gramófono, carru ni dxiʼbaʼ bocina ique, programa lu radiu ne tecnología ni jma nacubi. Ne organización si stiʼ Dios nga cayuni traducir publicación lu stale idioma. ¿Xiñee yaʼ? Para ganda gunadiaga guiráʼ xixé binni ca noticia galán lu diidxaʼ gulené. Qué runi Jehová menu binni ne guniʼbe zaca predicar ca noticia galán ra nuu «binni de guiráʼ nación, tribu, idioma ne guidxi» (Apoc. 14:6, 7). Racaláʼdxibe gunadiaga guiráʼ xixé binni mensaje stiʼ Reinu.

⁹ Yanna, ¿xi zanda guininu de ca binni ni nabeza ca lugar ra qué randa runi predicarnu purtiʼ nuu tu cayapa laacaʼ yaʼ? Para ganda guni predicarnu laacabe, gucané Jehová organización stiʼ para iquiiñeʼ xcaadxi método ti gaca predicar ra ridiʼdiʼ stale binni. Guzéʼtenu ti ejemplu, lu iza 2001, guníʼ Grupu ni Zániru zanda iquiiñe ca hermanu de Francia carru huiiniʼ ne exhibidor para guni predicarcaʼ, ne despué laaca iquiiñeʼ cani ndaaniʼ xcaadxi guidxi para gaca predicar. Guleendúcabe ni galán. Nga runi, lu iza 2011, bizulú guca predicar ra ridiʼdiʼ stale binni né carru huiiniʼ ne exhibidor ndaaniʼ guidxi Nueva York (Estados Unidos). Primé iza guca predicar lugar riʼ, bisaanacabe 102,129 libru, 68,911 revista, ne 4,701 binni gunabaʼ guicaa estudiu. Rihuinni dxichi cayacané espíritu santu para gaca dxiiñaʼ riʼ. Nga runi, guníʼ Grupu ni Zániru zanda iquiiñeʼ ca hermanu ni nuu lu guidubi Guidxilayú exhibidor ni napa publicación para guni predicarcaʼ.

10. ¿Xi zanda gúninu para guni predicarnu jma jneza?

¹⁰ Ni zanda gúninu. Guicá íquenu guizíʼdinu guiráʼ ni rusiidiʼ Jehová laanu ora riuunu reunión. Gúninu stipa para guni predicarnu né ca hermanu ni nuu lu grupu stinu. Pa nuu xiixa cosa ra naquiiñeʼ guchaʼnu la? zanda gacané ca hermanu ni nuu lu grupu ca laanu ne laaca zanda chinándanu ejemplu galán sticaʼ. Cadi gusaana de guni predicarnu neca gápanu guendanagana. Casi ná textu stiʼ artículo riʼ, rúninu ni ná Dios purtiʼ cayacané espíritu santu laanu, ne cadi pur stipa si stinu (Zac. 4:6). Ne cumu rudii Jehová laanu stipa la? zanda gúninu dxiiñaʼ riʼ.

NACA JEHOVÁ TI DIOS DE ORDEN NE DE PAZ

11. ¿Xi biʼniʼ grupu ni zániru ni guyuu lu primé siglu para chuʼ orden ndaaniʼ xquidxi Dios?

¹¹ Lu primé siglu. Grupu ni zániru ni guyuu Jerusalén, bíʼnicaʼ dxiiñaʼ tobi si para chuʼ orden ne paz ndaaniʼ xquidxi Dios (Hech. 2:42). Guzéʼtenu ti ejemplu, biaʼ lu iza 49, stale tu gunabadiidxaʼ pa naquiiñeruʼ gaca circuncidarcaʼ, gunabaʼ grupu ni zániru gacané espíritu santu laacaʼ para gánnacaʼ xi naquiiñeʼ gúnicaʼ. Pa ñaca qué ñuu ca congregación que tobi si la? zándaca maʼ qué ñaca predicar. Neca judíu ca apóstol ne ca ancianu que la? qué ninándacabe ca costumbre stiʼ ca judíu ne ni rusiidicaʼ. Ni bíʼnicabe nga biyúbicabe gacané Stiidxaʼ Dios ne espíritu santu laacabe (Hech. 15:1, 2, 5-20, 28). Guluu Jehová ndaayaʼ laacabe pur ni gudixhe íquecabe, guyuu ca congregación que tobi si ne gúpacaʼ paz, ne qué nusaana de ñuni predicarcaʼ (Hech. 15:30, 31; 16:4, 5).

12. ¿Xiñee zanda guininu nuu orden ne paz ndaaniʼ organización stiʼ Dios tiempu riʼ?

¹² Tiempu riʼ. Cayuni organización stiʼ Dios stipa para chuʼ orden ne paz ndaaniʼ xquidxi Dios. Lu iza 1895, biree ti artículo lu Torre stiʼ ni rapa 15 de noviembre lu diidxaʼ inglés ni biree lá «Decentemente y con orden» ne textu base stiʼ artículo ca nga 1 Corintios 14:40. Revista que ná: «Gudxi ca apóstol ca hermanu ni guyuu lu primé siglu xi naquiiñeʼ gúnicaʼ para gápacaʼ orden [...]. Nabé risaca chinándanu ca cosa ni gucuá dxiqué purtiʼ gucuá cani para gusiidiʼ cani laanu» (Rom. 15:4). Guyuu orden ne paz ndaaniʼ ca congregación ni guyuu lu primé siglu, ne ngaca nga ni rihuinni ndaaniʼ organización stiʼ Jehová tiempu riʼ. Guzéʼtenu ti ejemplu, pa ñuunu reunión sti congregación o ndaaniʼ sti guidxi ne cayaca estudiar Torre stiʼ ni rapa, ñánnanu ximodo raca estudiar ni ne xi artículo chiguiuunda, ne laaca ñuni sentirnu galán. Nuu xquidxi Dios tobi si purtiʼ cayacané espíritu santu laanu (Sof. 3:9, nota).

13. Casi ná Santiago 3:17, ¿xi pregunta caquiiñeʼ guiníʼ íquenu?

¹³ Ni zanda gúninu. Racalaʼdxiʼ Jehová chuʼnu «tobi si casi ná espíritu ne cadi» tíndenu (Efes. 4:1-3). Nga runi, guiníʼ íquenu ca pregunta riʼ: «¿Ñee runeʼ stipa para chuʼ paz ndaaniʼ congregación ne chuʼ ca hermanu tobi si la? ¿Ñee ruzuubaʼ stiidxaʼ ca hermanu ni zániru ndaaniʼ congregación la? ¿Ñee napa ca hermanu confianza naa, jmaruʼ si pa napaʼ ti responsabilidad ndaaniʼ congregación la? ¿Ñee puntual naa, ruuyaʼ xi caquiiñeʼ xcaadxi ne nuaaʼ dispuestu gacaniáʼ la?» (biindaʼ Santiago 3:17). Pa gudiʼnu cuenta cayaadxaruʼ gúninu caadxi de ca ni bizéʼtenu riʼ la? guinábanu Jehová gudii laanu espíritu santu stiʼ. Pa gudiʼnu lugar guchaa espíritu santu modo laanu ne ca ni rúninu, jma zannaxhii ne zusisaca ca hermanu laanu.

RUSIIDIʼ NE RUDII JEHOVÁ LAANU NI CAQUIIÑENU

14. Casi ná Colosenses 1:9, 10, ¿ximodo gucané Jehová ca xpinni Cristu ni bibani lu primé siglu guiziidiʼ chaahuicaʼ de Dios?

¹⁴ Lu primé siglu. Guizáʼ riuulaʼdxiʼ Jehová gusiidiʼ xquidxi (Sal. 32:8). Racaláʼdxibe gunibiáʼ, gannaxhii ca xiiñibe laabe ne guibánicaʼ para siempre. Zanda gaca guiráʼ ni bizéʼtenu riʼ purtiʼ cusiidibe laanu (Juan 17:3). Lu primé siglu, biquiiñebe congregación cristiana para gusiidibe xquídxibe (biindaʼ Colosenses 1:9, 10). Ne gucanebe xquídxibe ra bidiibe laacaʼ espíritu santu ni biʼniʼ prometer Jesús laacabe (Juan 14:16). Ndiʼ gucané ca discípulo guiénecaʼ Stiidxaʼ Dios ne bisietenalaʼdxiʼ ni laacabe ca cosa ni biʼniʼ ne ni guníʼ Jesús, ne yanna naca cani parte de ca Evangeliu. Ni biziidiʼ ca xpinni Cristu riʼ gucané ni laacaʼ iguidxi fe sticaʼ, gannaxhiicaʼ Dios, Jesús ne ca hermanu sticaʼ.

15. ¿Ximodo cayaca cumplir profecía ni guníʼ Jehová lu Isaías 2:2, 3 tiempu riʼ?

¹⁵ Tiempu riʼ. Guníʼ Jehová «ora mayaca guiluxe ca dxi que», zaguiʼbaʼ binni de guiráʼ guidxi lu dani stibe para gusiidibe laacaʼ ca neza stibe (biindaʼ Isaías 2:2, 3). Tiempu riʼ nga cayaca cumplir profecía riʼ. ¿Xiñee yaʼ? Purtiʼ adoración ni rudiʼnu Jehová nuuni jma luguiáʼ que ca religión falsu. ¡Tiempu riʼ cudii Jehová xquidxi stale información ni zeeda lu Biblia! (Is. 25:6). Riquiiñebe «mozo ni nuu xpiaaniʼ ne ni runi jneza» para gudii laanu guiráʼ ni caquiiñenu, rudiibe laanu artículo ni zeeda lu revista, discursu, dibuju ne videu (Mat. 24:45). Runi sentirnu casi Elihú, xhamigu Job, ni guníʼ ca diidxaʼ riʼ de Dios: «¿Ñee nuu sti instructor casi laabe la?» (Job 36:22).

16. ¿Xi zanda gúninu para guiniisinu lu Stiidxaʼ Dios?

¹⁶ Ni zanda gúninu. Zacané espíritu santu laanu gúninu ni guidúʼndanu ne ni guni estudiarnu lu Stiidxaʼ Dios. Guinábanu Jehová ni gunabaʼ ti salmista laa: «Jehová, bisiidiʼ naa neza stiluʼ. Para sayaʼ lu ni dxandíʼ. Biʼniʼ ladxiduáʼ riʼ tobi si ti guidxibeʼ laluʼ» (Sal. 86:11). Nga runi, iquiiñenu guiráʼ información ni rudii Jehová laanu lu Stiidxaʼ ne ni rudii organización stibe laanu. Peru cadi naquiiñeʼ gánnasinu stale de Stiidxaʼ Dios, laaca naquiiñeʼ chuʼnu seguru dxandíʼ ni cazíʼdinu ne gúninu ni lu xquendanabáninu. Zacané espíritu santu stiʼ Jehová laanu gúninu ni. Cuʼnu gana ca hermanu stinu purtiʼ laaca familia stinu laacabe (Heb. 10:24, 25). Guinábanu Jehová gudii laanu espíritu santu para gudiʼnu comentariu ni guiree de ndaaniʼ ladxidoʼno ra reunión ne gúninu stipa gutíʼdinu ca asignación stinu galán. Pa gúninu ca ni bizéʼtenu riʼ, zuluinu Jehová ne Jesús nadxiinu ca dendxuʼ sticaʼ (Juan 21:15-17).

17. ¿Ximodo zanda gusihuínninu runi apoyarnu organización stiʼ Jehová?

¹⁷ Maʼ cadi candaa, organización si ni cayuni dirigir Dios nga zuni mandar lu guidubi Guidxilayú. Nga runi, guninenu xquidxi Dios dxiiñaʼ né stale gana. Casi runi Dios, gannaxhiinu binni ne guinínenu guiracaʼ de ca noticia galán. Chinándanu ejemplu stiʼ Dios ra guyúbinu chuʼ orden ne paz ndaaniʼ congregación ti chuʼnu tobi si né ca hermanu stinu. Laaca naquiiñeʼ gucaʼdiáganu Instructor stinu ora rudiibe laanu guiráʼ ca información ni caquiiñenu. Zacá, ora gunduuxeʼ Jehová guidxilayú malu stiʼ Binidxabaʼ la? qué zadxíbidinu. Ne ziuʼnu lade ca xpinni Dios ca ni cayuni ni ná Jehová né organización stiʼ.