Gúninu xhiiñanu de guidubi ladxidoʼno
¿XIMODO runi sentirluʼ ora ricaaluʼ ti carta ni bicaa ti xhamíguluʼ para uguu gana lii? Biseendaʼ Pablo ti carta sicaríʼ ra nuu Timoteo, zeeda carta ca lu Biblia ne runibiaʼnu ni yanna casi Guiropa Carta para Timoteo. Nanna dxíchinu racalaʼdxiʼ Timoteo cheʼ ti lugar ra guirutiʼ guchiiñaʼ laa para guʼndaʼ carta stiʼ xhamigu ne ganna xi cayábibe laa. Zándaca gunabadiidxaʼ Timoteo: «¿Ximodo nuu Pablo? ¿Ñee zudiibe conseju naa para guneʼ tender ca responsabilidad stinneʼ jma jneza la? ¿Ñee zacané carta riʼ naa para guneʼ predicar jma jneza ne gacaniáʼ xcaadxi la?». Bicabi carta stiʼ Pablo ca pregunta riʼ ne xcaadxi. Zadúʼyanu caadxi conseju zeeda lu carta riʼ ni zacané laanu.
«CAYUNEʼ HUANTAR GUIRÁʼ NI»
Ora bizulú biʼndaʼ Timoteo carta que la? nagueendaca bidii cuenta pabiáʼ risácabe para Pablo. Né stale cariñu gudxi Pablo laabe «xiiñeʼ ni nadxieeʼ» (2 Tim. 1:2). Neca maʼ napa Timoteo jma de treinta iza dxi gucuaa carta riʼ, biaʼ lu iza 65, maʼ napa stale experiencia casi ancianu. Bíʼninebe Pablo dxiiñaʼ jma de chii iza ne biziidibe stale cosa de laa.
Nanna dxíchinu guyuu Timoteo gana ora gunna cayuni huantar Pablo ca prueba ni cadiʼdiʼ. Para tiempu que deguyoo Pablo Roma, ne mayaca guuticabe laa (2 Tim. 1:15, 16; 4:6-8). Bidii Timoteo cuenta nabé nadxibalú Pablo, purtiʼ gudxi laabe: «Cayuneʼ huantar guiráʼ ni» (2 Tim. 2:8-13). Modo biʼniʼ huantar Pablo guluuni gana Timoteo ne laaca riguuni gana laanu.
BIQUIIÑEʼ GRACIA BIDII DIOS LII «PARA CADI GUIZUÍʼ» NI
Gucané Pablo Timoteo guʼyaʼ serviciu stiʼ casi xiixa nabé risaca. Gúdxibe laa iquiiñeʼ gracia bidii Dios laa «para cadi guizuíʼ» ni (2 Tim. 1:6). Biquiiñeʼ Pablo diidxaʼ griegu khárisma para diidxaʼ «gracia». Diidxaʼ riʼ caniʼni guicaa ti binni xiixa gratis, neca qué ñuni gastiʼ para guicaani ne qué runi merecer ni. Gucuaa Timoteo gracia o regalu riʼ dxi bidiicabe laa ti dxiiñaʼ nabé risaca ndaaniʼ congregación (1 Tim. 4:14).
¿Xi naquiiñeʼ guni Timoteo né gracia riʼ? Ra bíʼndabe ca diidxaʼ biquiiñeʼ gracia bidii Dios lii «cásica runi tuuxa ora qué riaanadxí de gundubi lu ti guí para cadi guizuíʼ», zándaca guníʼ íquebe bele ni runi binni ra lidxi para guidxaa ni maʼ zizuiʼ chaahuiʼ chaahuiʼ dede ra gaca ni guí. Napa xidé gundubi binni ni ti guicá guí ni sti biaje ne ganda guidxaacaʼ. Ti diccionariu ná diidxaʼ griegu (anazōpyréō) ni biquiiñeʼ Pablo raca significar ni «guicá guí sti biaje o gusibániluʼ ti bele». Ni cayabi Pablo Timoteo nga guni dxiiñaʼ né stale gana. Casi xa ñaca ñábibe laa: «Biʼniʼ xhiiñaluʼ de guidubi ladxidoʼloʼ». Tiempu riʼ laaca naquiiñeʼ gúninu xhiiñaʼ Dios né stale gana.
«GUPA CA COSA RISACA NI GUCUAALUʼ»
Biindaʼ ruʼ Timoteo carta stiʼ Pablo ne bidxelaʼ caadxi diidxaʼ ni zacané laa lu serviciu stiʼ. Bicaa Pablo ca diidxaʼ riʼ ra nuube: «Gupa ca cosa risaca ni gucuaaluʼ pur espíritu santu, espíritu ni gucuaanu» (2 Tim 1:14). ¿Xi cosa risaca gucuaa Timoteo yaʼ? Lu versículo 13 gudxi Pablo laabe «ca cosa galán bisiideʼ lii», laani nga ni dxandíʼ zeeda lu Stiidxaʼ Dios (2 Tim. 1:13). Cumu naca Timoteo ti xpinni Cristu la? napa xidé gusiidiʼ ni dxandíʼ dentru ne fuera de congregación (2 Tim. 4:1-5). Laaca gucuaabe privilegiu de gácabe ancianu para gápabe ca dendxuʼ stiʼ Dios (1 Ped. 5:2). ¿Ximodo gusiidibe ni dxandíʼ yaʼ? Zacané espíritu santu ne Stiidxaʼ Dios laabe (2 Tim. 3:14-17).
Laanu laaca maʼ gucuaanu ti cosa risaca, laani nga gusíʼdinu ni dxandíʼ xcaadxi binni (Mat. 28:19, 20). Cadi guiaandaʼ laanu nabé risaca ni dxandíʼ ni rusíʼdinu binni. Para ganda gúninu ni naquiiñeʼ guni orarnu ne guidúʼndanu Stiidxaʼ Dios guiráʼ dxi (Rom. 12:11, 12; 1 Tim. 4:13, 15, 16). Zándaca ancianu lii o runi servirluʼ de tiempu completu, ne nga naquiiñeʼ gucaa laanu gácanu humilde ne gápanu confianza Dios. Zápanu cosa risaca ni gucuaanu riʼ pa gusisácanu ni ne gudiʼnu lugar gacané Jehová laanu.
«BISIIDIʼ NI XCAADXI HOMBRE DE CONFIANZA»
Lade ca dxiiñaʼ ni gucuaa Timoteo laaca nuu gusiidiʼ xcaadxi hermanu. Ngue runi, gudxi Pablo laabe: «Guiráʼ ni binadiágaluʼ gunieeʼ [...], bisiidiʼ ni xcaadxi hombre de confianza, ti ora maʼ biziidicaʼ la? maʼ zanda gusiidicaʼ xcaadxi binni» (2 Tim 2:2). Cusietenalaʼdxiʼ Pablo Timoteo caquiiñeʼ gusiidiʼ xcaadxi hermanu ni maʼ biziidiʼ. Tiempu riʼ laaca naquiiñeʼ gusiidiʼ ca ancianu xcaadxi. Ti buen superintendente rusiidiʼ xcaadxi hermanu ximodo gúnicaʼ xcaadxi dxiiñaʼ ti guiziidicaʼ guni cani. Ne qué ridxibi chuʼ stobi ni jma nanna que laa. Nga runi qué rusiidibe caadxi si cosa, sínuque rusiidibe xcaadxi hermanu para guiziidicaʼ gúnicaʼ xiixa dxiiñaʼ jma jneza ne gácacaʼ xpinni Cristu ni napa experiencia. Zacá reeda gácacabe «hombre de confianza» ne jma racanécabe ndaaniʼ congregación.
Rihuinni dxichi bisisaca Timoteo carta ni biseendaʼ Pablo ra nuu. Zándaca ruxuíʼlunu cayuundaʼ Timoteo carta stiʼ Pablo stale biaje ne caníʼ ique ximodo chinanda ca conseju zeeda luni.
Laanu laaca racaláʼdxinu chinándanu ca conseju riʼ. ¿Ximodo yaʼ? Ra gúninu stipa «para cadi guizuíʼ» gracia ni nápanu, gusisácanu ca cosa risaca ni maʼ gucuaanu ne gusíʼdinu xcaadxi ni maʼ bizíʼdinu. Cásica gudxi Pablo Timoteo, zúninu xhiiñaʼ Dios ni maʼ gucuaanu de guidubi ladxidoʼno (2 Tim. 4:5).