Gucané Timoteu binni

Dxi guca Timoteu nahuiiniʼ nabé biecheʼ ora gucané xcaadxi binni. Laaca guyebe stale guidxi yegusiidibe. Ne nabé galán modo bibánibe. Ñuulaʼdxuʼ ñueniáʼ lii jma de laabe la?...

Biniisi Timoteu ndaaniʼ ti guidxi láʼ Listra. Jñaabe láʼ Eunice ne jñaabiidabe láʼ Loida. Dede nahuiiniʼ Timoteu byuiʼnécabe laa de Jiobá. Ngue runi, dede xcuidi laa maʼ riuulaʼdxiʼ gacané binni gunibiáʼ Jiobá.

Dxi jma maʼ ziniisi Timoteu gudxi Pablu laa: «Ñee zineuʼ naa xcaadxi guidxi ra chigucheecheʼ diidxaʼ la?». Guizáʼ cayecheʼ Timoteu ora gudxi laabe: «¡Ziniaaʼ lii!». Laabe nabé riuuláʼdxibe gacanebe binni.

Yenebe Pablu Tesalónica, ti guidxi stiʼ Grecia. Gupa xidé guzácabe zitu ne despué gucuaacabe ti barcu para yendácabe raqué. Yendásicabe raqué gucanécabe stale binni gunibiáʼ Jiobá. Peru guyuu caadxi binni ni nabé bidxiichi ne gucaláʼdxicaʼ ñuninacaʼ laacabe. Ngue runi, gupa xidé guyé Pablu ne Timoteu yegucheechecaʼ diidxaʼ xcaadxi guidxi.

Gudiʼdiʼ si chupa chonna beeu, gunabaʼ Pablu Timoteu guibiguetaʼ Tesalónica. Xiñee yaʼ. Purtiʼ racalaʼdxiʼ ganna ximodo nuu ca xpinni Cristu que. Peru guyuu caadxi binni ndaaniʼ guidxi Tesalónica ni nabé bininá ca xpinni Cristu. ¡Caquiiñeʼ gaca Timoteu nadxibalú para guibiguetaʼ raqué! Xi biʼniʼ Timoteu yaʼ. Guyebe purtiʼ nuube gánnabe ximodo nuu ca xpinni Cristu que. Guiráʼ ni gúdxibe Pablu ora bibiguétabe nabé bisiecheʼ cani laa, purtiʼ cayúniruʼ ca xpinni Cristu de Tesalónica ni na Jiobá.

Stale iza biʼniʼ Timoteu ne Pablu xhiiñaʼ Jiobá juntu. Ngue runi, ti biaje guníʼ Pablu de Timoteu: «Chiguseendaʼ Timoteu para gacané ca xpinni Cristu. Gástiruʼ stobi casi laabe. Nadxiibe Jiobá ne laaca nadxiibe binni».

Cadi dxandíʼ laaca nadxiiluʼ xcaadxi binni la? Ñuulaʼdxuʼ ñacaneuʼ laacabe ñunibiáʼcabe Jiobá la?... Pa guʼnuʼ ni la? zabániluʼ galán ne nayecheʼ casi bibani Timoteu.