Pablo ne Timoteo

Guca Timoteo ti jovenhuiiniʼ ni guyuu ndaaniʼ congregación stiʼ guidxi Listra. Griegu bixhózebe ne jñaabe judía laa. Jñaabe Eunice ne jñaabiidabe Loida nga bisiidicaʼ laabe de Jiobá dede dxi nahuiinibe.

Ora guyé Pablo guidxi Listra lu guiropa viaje de predicación stiʼ, bidiibe cuenta nabé nadxii Timoteo guiráʼ xixé ca hermanu ne guyuuláʼdxibe gacanebe laacaʼ. Ngue runi biʼniʼ invitar Pablo Timoteo chiné laabe viaje que. Ra gudiʼdiʼ dxi, bisiidiʼ Pablo laabe para ganda gusiidibe binni de Jiobá ne guni predicarbe ca noticia galán stiʼ Dios.

Gucané espíritu santu Pablo ne Timoteo para gánnacaʼ pa ladu checaʼ. Ti gueelaʼ gupa Pablo ti visión. Biiyabe ti hombre ni cayabi laabe chebe Macedonia chigacanebe laacaʼ. Ngue runi yeguni predicar Pablo, Timoteo, Silas ne Lucas raqué ne gucanécabe chuʼ congregación ndaaniʼ guidxi que.

Ndaaniʼ guidxi macedonia de Tesalónica stale hombre ne gunaa gúcacaʼ xpinni Cristu. Peru caadxi judíu gúpacaʼ envidia Pablo ne ca xcompañeru. Biyúbicabe stale binni malu, gunaazecabe ne guxubiyúcabe ca hermanu dede ra nuu ca gobernante stiʼ guidxi que. Ca judíu que bicaacaʼ ridxi: «¡Ca hombre riʼ, enemigu stiʼ guidxi Roma laacabe!». Guyuu xquendanabani Pablo ne Bernabé ra naxoo, ngue runi gueelaʼ queca bixooñecabe de raqué ne guyécabe Berea.

Guyuu ca binni de Berea nucaadiágacaʼ ca noticia galán stiʼ Dios, stale judíu ne griegu gúcacaʼ xpinni Cristu. Peru beeda caadxi judíu de guidxi Tesalónica para gucaalucaʼ ca xpinni Cristu. Ngue runi, biree Pablo zeʼ guidxi Atenas. Peru biaana Timoteo ne Silas ndaaniʼ guidxi Berea para gacanecaʼ ca hermanu que. Gudiʼdiʼ si ti tiempu, nabé feu modo guzanándacabe ca hermanu ndaaniʼ guidxi Tesalónica, ngue runi biseendaʼ Pablo Timoteo cheʼ Tesalónica sti biaje para gacané ne cuʼ gana ca hermanu ti guni huantarcaʼ. Despué de ngue, biseendaʼ Pablo Timoteo chiganna ne chigacané xcaadxi congregación.

Pablo gudxi Timoteo: «Zazanándacabe cani racalaʼdxiʼ guni ni ná Jiobá». Guzanándacabe Timoteo ne laaca guluucabe laa ndaaniʼ cárcel purtiʼ si xpinni Cristu laa. Peru guizáʼ nayecheʼ guyuube purtiʼ zaqué nga zusihuínnibe qué zusaanabe Jiobá.

Pablo gudxi ca hermanu de Filipos: «Zuseendaʼ Timoteo ra nuutu. Laabe zusiidibe laatu ximodo satu lu neza stiʼ Dios ne ximodo guni predicartu». Guizáʼ gupa Pablo confianza Timoteo. Bíʼnicabe xhiiñaʼ Dios juntu stale iza ne guizáʼ guca xhamígucabe.