¿Ximodo naquiiñeʼ guni orarnu para gucaadiaga Dios laanu?

GUNI ORARNU JEHOVÁ LU LÁ JESÚS

«Pa guinábatu Bixhozeʼ xiixa, zudii ni laatu lu laʼyaʼ» (Juan 16:23).

Ni guníʼ Jesús rusiidiʼ ni laanu racalaʼdxiʼ Jehová guni orarnu laasi, ne cadi iquiiñenu ti imagen, ti bidóʼ, ángel o ti familia stinu ni maʼ guti para guinínenu laabe, ne racaláʼdxibe gúninu ni lu lá Jesucristu. Ora runi orarnu lu lá Jesús, rusihuínninu nánnanu rucaadiaga Dios laanu pur ni biʼniʼ Jesús pur laanu. Sicaríʼ guníʼ Jesús: «Guirutiʼ zanda cheʼ ra nuu Bixhozeʼ pa cadi pur naa» (Juan 14:6).

GUININU NI NUU NDAANIʼ LADXIDOʼNO

«Laguxheleʼ ladxidoʼto nezalube» (Salmo 62:8).

Ora guni orarnu Jehová, caquiiñeʼ gúninu ni casi ñaca caninenu bixhózenu ni nadxii laanu. Lugar de guidúʼndanu ti oración ni cá lu ti libru o guni orarnu de memoria, caquiiñeʼ guinínenu Dios né respetu ne gúninu ni de guidubi ladxidoʼno.

GUINÁBANU DIOS COSA NI RIUULAʼDXIʼ

«Zanda guinábanu laa intiica cosa, peru gaca ni ni racalaʼdxiʼ, ne zucaadiaga laanu» (1 Juan 5:14).

Biblia cayabi laanu xi zuni Dios pur laanu ne xi racaláʼdxibe gúninu pur laabe. Para gucaadiágabe ca oración stinu, caquiiñeʼ guinábanu ni racaláʼdxibe. Para ganda gúninu ni, caquiiñeʼ guidúʼndanu Biblia ne zacá zunibiaʼnu laabe jma. Ne óraca zucaadiagabe laanu.

¿XI CAQUIIÑEʼ GUINÁBANU ORA GUNI ORARNU?

Guinábanu ni caquiiñenu. Zanda guinábanu Dios gacané laanu gápanu ni caquiiñenu, casi guendaró, lari o ti lugar ra cuézanu. Laaca zanda guinábanu laabe gacanebe laanu guicaanu decisión jneza ne gudiibe laanu stipa para guni huantarnu ca prueba cadídinu. Laaca zanda guinábanu laabe guni perdonarbe laanu, guquídxibe fe stinu ne gápabe laanu (Lucas 11:3, 4, 13; Santiago 1:5, 17).

Guinábanu pur xcaadxi. Racalaʼdxiʼ ca padre ca gannaxhiisaa ca xiiñiʼ. Jehová nga Bixhózenu, ne racalaʼdxiʼ gapasaanu laanu. Galán guni orarnu pur xheelanu, pur ca xiiñinu, pur familia stinu ne pur ca xhamígunu. Discípulo Santiago guníʼ: «Cada tobi guni orar pur stobi» (Santiago 5:16).

Gudiʼnu xquixe peʼ. Biblia ná biʼniʼ Dios stale cosa pur xcaadxi: «Bisábabe nisaguié para laacaʼ ne bidiibe stale cosecha laacaʼ, bidiibe laacaʼ ni gocaʼ ne bichabe ladxidoʼcaʼ de guendanayecheʼ» (Hechos 14:17). Pa guiníʼ íquenu guiráʼ ni maʼ biʼniʼ Dios pur laanu, zudiʼnu xquixe peʼ laa. Peru laaca zudiʼnu xquixe peʼ laabe pa gúninu ni nabe (Colosenses 3:15).

GÁPANU PACIENCIA NE CADI GUSAANA DE GUNI ORARNU

Nuu biaje zándaca guireʼnu gana pa qué guicabi Dios ca oración stinu nagueendaca. ¿Ñee riníʼ nga qué rizaalaʼdxiʼ Dios laanu la? ¡Coʼ! Guidúʼyanu ni bizaaca caadxi binni ni rusihuinni nuu biaje cadi naquiiñeʼ gusaana de guni orarnu.

Lu primé artículo stiʼ revista riʼ guninu de Steve. Sicaríʼ guniʼbe: «Cumu qué nusaanaʼ de ñuneʼ orar la? gucaneni naa para cadi guireeʼ gana». ¿Xiruʼ gucané laabe yaʼ? Bizulú biʼniʼ estudiarbe Biblia ne biziidibe caquiiñeʼ guni orarbe stale biaje. Sicaríʼ guníʼ Steve: «Rudieeʼ xquixe peʼ Dios purtiʼ racané ne nadxii ca xhamiguaʼ naa. Yanna huaxa nuaaʼ jma nayecheʼ».

¿Xi bizaaca Jenny, xa gunaa ni runi sentir qué runi merecer gucaadiaga Dios laa yaʼ? Laabe guniʼbe: «Dxi maʼ qué guidxelaʼ xi guneʼ, gunabaʼ Dios gacané naa guieneʼ xiñee cayuneʼ sentir zaqué». Ra biʼniʼ orarbe, ¿ximodo gucaneni laabe yaʼ? Jenny guníʼ: «Ora gunieeʼ niaʼ Dios gucaneni naa guuyaʼ naa modo ruuyabe naa. Bidieeʼ cuenta ora riníʼ iqueʼ maʼ qué gapaʼ perdón. Cadi zacá ruuyaʼ Dios naa. Laaca gucanebe naa cadi guireeʼ gana». ¿Xi guleendube yaʼ? Sicaríʼ guniʼbe: «Oración ni runeʼ Jehová huayacaneni naa guuyaʼ laabe casi ti xhamiguaʼ, Bixhozeʼ ne Dios stinneʼ. Qué zusaanabe naa ne zacanebe naa pa guneʼ stipa guneʼ ni racaláʼdxibe».

Yanna guidúʼyanu ni bizaaca Isabel. Dxi naca xiiñibe, gudxi ca doctor laabe zale xiiñibe né ti discapacidad. Guníʼ íquebe biluxe Guidxilayú para laabe. Guyuu tu gudxi laabe guni abortarbe. Sicaríʼ guniʼbe: «Biaʼ biaʼ qué ñateʼ siaʼ dxi gunnaʼ ni». ¿Xi bíʼnibe yaʼ? Isabel guníʼ: «Stale biaje bineʼ orar Dios para gacané naa». Ra gudiʼdiʼ tiempu gule Gerard, xiiñibe, ne gulené ti discapacidad. ¿Bidii Isabel cuenta bicabi Dios ca oración stiʼ la? ¡Bidiibe pue! ¿Ximodo bidiibe cuenta de laani yaʼ? Laabe guniʼbe: «Despué de 14 iza, ti ndaayaʼ naroʼbaʼ ni maʼ gucuaaʼ nga Gerard, xiiñeʼ. Guuyaʼ nabani xiiñeʼ galán neca napa ti discapacidad rusiecheʼ ni naa ne rudieeʼ cuenta zacá nga bicabi Jehová ca oración stinneʼ».

Ca diidxaʼ guníʼ gunaa riʼ rusietenalaʼdxiʼ ni laanu ca diidxaʼ ni guníʼ ti salmista: «Zucaadiágaluʼ ni guinabaʼ ca binni nadóʼ lii, Jehová. Qué zudiiluʼ lugar guidxibi ladxidoʼcaʼ ne zucaadiágaluʼ laacaʼ» (Salmo 10:17). ¿Cadi dxandíʼ nápanu stale razón galán para cadi gusaa de guni orarnu la?

Lu Biblia zanda guidúʼndanu stale de ca oración ni biʼniʼ Jesús. Ni jma runibiaʼnu nga ca oración ni bisiidibe ca apóstol stibe. ¿Xi rizíʼdinu de laacani yaʼ?