¿Ximodo zanda gacané oración lii?

Guizáʼ huará Pamela ne guyé ra nuu doctor. Peru biʼniʼ orarbe Dios ne gunábabe laa gudii stipa laabe para guni huantarbe. ¿Ñee gucané oración laabe la?

Sicaríʼ guniʼbe: «Biaʼ tiempu gucuaaʼ tratamientu para cáncer, stale biaje guizáʼ bidxibeʼ. Peru óraruʼ bineʼ orar Jehová, ratadxí ladxiduáʼ ne racaneni naa guiníʼ ique jneza. Náparuaʼ yuubaʼ, peru ora runeʼ orar riníʼ iqueʼ cosa ni uguu gana naa. Ora rinabadiidxaʼ binni naa ximodo nuaaʼ, rabeʼ laacaʼ: “Huaxiéʼ galán, peru nuaaʼ nayecheʼ”».

Cadi naquiiñeʼ cuézanu guizaacanu xiixa cosa malu para guni orarnu Dios. Guiranu ridxaagalunu problema, naroʼbaʼ o nahuiiniʼ, ne caquiiñenu tu gacané laanu para gudxíʼlunu cani. ¿Ñee racané oración laanu la?

Biblia ná: «Bilaa ni nualuʼ luguiáʼ Jehová, ne laabe zanaazebe lii. Qué ziuu dxi gudiibe lugar guiaba ni runi ni jneza» (Salmo 55:22). ¡Riguu ca diidxaʼ riʼ gana laanu! Yanna, ¿ximodo zanda gacané oración laanu yaʼ? Ora runi orarnu Dios modo riuulaʼdxiʼ, zudiibe laanu ni caquiiñenu para gudxíʼlunu ca problema stinu (biiyaʼ sección ni láʼ «Ni ribeendunu ora runi orarnu»).

Ni ribeendunu ora runi orarnu

Ratadxí xquendabiaaninu

«Lu intiica ni cadíʼditu lagabi Dios xi caquiiñetu, [...] óraque zudii Dios laatu paz stiʼ dede guirutiʼ zanda guiene ximodo ni, ne zápani ladxidoʼto ne xquendabiaanitu pur Cristu Jesús» (Filipenses 4:6, 7). Pa gábinu Dios ni naguu xizaa laanu, zacanebe laanu chuʼdxinu ne gúninu ni jneza ora nuunu xizaa.

Rápanu sabiduría

«Pa cayaadxaʼ sabiduría tuuxa de laatu la? guinabaʼ ni Dios, purtiʼ rudii Dios de guidubi ladxidóʼ ne qué ruchá ni lú binni» (Santiago 1:5). Ora nuunu xizaa, nuu biaje qué ricaanu decisión jneza. Peru pa guinábanu Dios gudii laanu sabiduría, zacanebe laanu guietenaláʼdxinu conseju ni zeeda lu Biblia, Stiidxabe.

Riuʼnu gana ne ratadxí ladxidoʼno

«Napaʼ stipa para guneʼ intiica cosa purtiʼ rudii Dios poder naa» (Filipenses 4:13). Cumu Jehová nga Dios ni jma napa poder la? zanda gacanebe laanu chuʼnu gana para gudxíʼlunu ca guendanagana gápanu o para guni huantarnu intiica prueba (Isaías 40:29). Biblia ná Jehová nga ni «riguixhedxí ladxidoʼno» ne laaca zanda quixhedxibe ladxidoʼno «lu guiráʼ guendanagana» guidxaagalunu (2 Corintios 1:3, 4).