Ximodo racané oración laanu

Ante guzulú binni xiixa dxiiñaʼ, zándaca rinabadiidxaʼ: «Xi zabeenduáʼ né ni chiguneʼ riʼ pue». Ñee jneza nga guiníʼ ique binni zacá ora chiguni orar la? Nuu tiru gastiʼ naca guinabadiidxaʼ binni xi zabeendú pa guni orar Dios. Dede Job, ti hombre bizuubaʼ stiidxaʼ Dios dxiqué, gunabadiidxaʼ: «Pa gucaaʼ ridxeʼ laabe, ñee zacábibe naa la?» (Job 9:16).

Lu tema gudídinu que, bidúʼyanu cadi ti costumbre si ni rapa ti binni rié yuʼduʼ nga oración ne cadi para gusiaandaʼ si binni ni cadiʼdiʼ nga runi ni. Dios ni dxandíʼ rucaadiaga ca oración ni rúninu. Pa gácani jneza ne pur ca razón ni caquiiñeʼ, rucaadiágabe laanu. Dede cayábibe laanu guidxíñanu laabe (Santiago 4:8). Yanna, xi zabeendunu pa guni orarnu gatigá. Guidúʼyanu.

Ratadxí ladxidoʼno

Ora maʼ cadíʼdiluʼ lu xiixa guendanagana, ñee runi sentirluʼ dede qué ridxélaluʼ xi gúniluʼ la? Biblia rudii laanu caadxi conseju ni zanda gúninu: «Lainíʼ né Dios sin guiaana dxí tu» ne «lainaba laa irá ni caquiiñe tu» (1 Tesalonicenses 5:17; Filipenses 4:6). Guiráʼ cani rinabaʼ gacané Dios laa la? Biblia na: «Zaguixhe dxí [Dios] ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu» (Filipenses 4:7). Zatadxí ladxidoʼno ora gábinu Bixhózenu ni nuu guibáʼ xi cazaacanu. Ne Biblia cayabi laanu: «Bilaa ni nualuʼ luguiáʼ Jiobá ne laabe zanaazebe lii» (Salmo 55:22).

Stale binni de guidubi Guidxilayú, huayuni sentir huayacané Dios laacaʼ ora runi orarcaʼ. Ti gunaa de Corea del Sur, láʼ Hee Ran, guníʼ: «Neca napaʼ stale guendanagana, ora runeʼ orar runeʼ sentir racané Dios naa». Sicaríʼ guníʼ Cecilia, ti gunaa de Filipinas: «Nabé riuaaʼ xizaa pur ca xiiñedxaapaʼ. Laaca rapaʼ jñaaʼ, neca maʼ qué runibiáʼ naa. Racané oración naa ganda guneʼ ca dxiiñaʼ stinneʼ sin chuaapiaʼ xizaa. Nannaʼ zacané Jiobá naa gacaniáʼ laacabe».

Racané ni laanu gudxíʼlunu guendanagana

Ñee nuu xhaataluʼ xizaa, cadxíbiluʼ pa guizaacaluʼ xiixa o bizaacaluʼ xiixa desgracia la? Pa guni orarluʼ Dios zaguixhedxibe ladxidoʼloʼ. Biblia na: «Rusieche be laanu ora tiica acaná ladxidóʼ no» (2 Corintios 1:3, 4). Ti biaje, dxi cadiʼdiʼ Jesús lu ti guendanagana «bizuxibi be uníʼ né be Dios». Xi bizaaca despué yaʼ. «Bidxiña ti ángel de ibáʼ ra nuu be, bidii stipa laabe.» (Lucas 22:41, 43.) Nehemías, ti hombre bizuubaʼ stiidxaʼ Dios, laaca bidxaagalú guendanagana, purtiʼ guzananda binni malu laa ti gusaana de guni xhiiñaʼ Dios. Guniʼbe sicaríʼ: «Biʼniʼ nayaʼ naguidxi». Bihuinni dxichi gucané Dios laabe cadi guidxíbibe ti ganda gúnibe xhiiñabe (Nehemías 6:9-16). Sicaríʼ guníʼ Reginald, de Ghana: «Ora runeʼ orar, jmaruʼ si ora cadideʼ lu xiixa guendanagana, runeʼ sentir casi ora ñabeʼ tuuxa ni zanda gacané naa xi cazaacaʼ ne cayabi naa cadi guidxibeʼ». Pa guni orarnu Dios, zanda chuʼnu seguru zacané laanu.

Zacané Dios laanu guiénenu

Nuu cosa ni quixhe íquenu gúninu zuchaa xquendanabáninu ne xquendanabani binnilídxinu. Xi gúninu para cadi gucheʼnu yaʼ. Sicaríʼ na Biblia: «Pa nuu tuuxa de laatu caʼru guiene chaahui xi naquiiñe guni la? inaba lu Dios usiene laa ne zusiene Dios laa. Purti tutiica inabaʼ, rudii Dios ni laa de idubi ladxidóʼ sin tinde né laa» (Santiago 1:5). Pa guinábanu Dios gacané laanu guiénenu, zudiibe espíritu santu stibe laanu ti gánnanu xi quixhe íquenu gúninu. Jesús guníʼ: «Bixhoze tu ni nuu ibáʼ [zudii] Espíritu Santu ni inaba [ni] laa» (Lucas 11:13).

Dede Jesucristu gunabaʼ Bixhoze gacané laa ante quixhe ique guni xiixa. Ante cuibe 12 apóstol stibe «idubi gueela que gutaná be uníʼ né be Dios» (Lucas 6:12).

Cásica bíʼnibe, stale binni ratadxí ladxidóʼ ora ruuyaʼ ximodo racané Dios laa lu cani riguixhe ique guni. Regina, ti gunaa nabeza Filipinas cayabi laanu xi guendanagana huadxaagalú: gudii ni iquiiñeʼ binnilidxi despué de guti xheelaʼ, biniti xhiiñaʼ ne stubi cusiniisi ca xiiñidxaapaʼ. Xi gucané laabe gánnabe xi gúnibe yaʼ. Laabe nabe: «Oración nga ni racané naa chuaaʼ gaxha de Jiobá». Kwabena, ti hombre de Ghana, cayabi laanu xiñee rinabaʼ gacané Dios laa: «Bineʼ dxiiñaʼ lu construcción ra biaxaʼ galán, peru biniteʼ ni. Despué de biiyaʼ xi guiráʼ zanda guneʼ, nabé gunabaʼ Dios gacané naa ganda gannaʼ xii nga ni jma jneza guneʼ. Nannaʼ dxicheʼ Jiobá nga gucané naa guidxelaʼ ti dxiiñaʼ para gapaʼ ni iquiiñeʼ ne chuaaʼ gaxha de laa». Laaca zanda gacané Dios lii, jmaruʼ si pa guinabuʼ chuʼluʼ gaxha de laa.

Maʼ bizéʼtenu chupa chonna cosa ni zabeenduluʼ pa guni orarluʼ. (Para gúʼyaluʼ xcaadxi, biiyaʼ cuadru ni láʼ «Cani ribeendunu».) Pa racaláʼdxiluʼ guicabi Dios oración stiluʼ la? primeru caquiiñeʼ gunibiaʼluʼ laabe ne gánnaluʼ xi chigúnibe. Galán pa guiníʼneluʼ ti testigu stiʼ Jiobá ti gacané lii guiéneluʼ Biblia.a Nga nga ni caquiiñeʼ gúniluʼ primeru para chuʼluʼ gaxha de Dios, «ni rucaadiaga oración» (Salmo 65:2).