1921 Raca Ti Gayuaa Iza

LU REVISTA Torre stiʼ ni rapa 1 de enero iza 1921 lu diidxaʼ inglés, zeeda ti pregunta para Ca Binni Ruundaʼ Biblia: «¿Xii nga dxiiñaʼ zanda gúninu iza riʼ?». Ne biquiiñeʼ ni Isaías 61:1, 2 para bisietenaláʼdxini ca hermanu que dxiiñaʼ risaca ni nápacaʼ de guni predicarcaʼ: «Maʼ gulí Jehová naa para güeniaʼ ca binni nadóʼ ca noticia galán [...] para guinieeʼ maʼ bedandá ora para guiá Jehová ca binni nadóʼ ne dxi para guquixe Dios stinu ni maʼ biʼniʼ ca enemigu stiʼ».

BIʼNIʼ PREDICÁRCABE NÉ STALE VALOR

Para ganda guni Ca Binni Ruundaʼ Biblia que dxiiñaʼ ni biaananecaʼ de guni predicarcaʼ, naquiiñeʼ gápacaʼ stale valor. Naquiiñeʼ gábicabe «ca binni nadóʼ ca noticia galán», ne laaca gábicabe ca binni malu zuquixe «Dios stinu ni maʼ biʼniʼ ca enemigu stiʼ».

Ti hermanu ni guleza Canadá ni láʼ John Hoskin, biʼniʼ predicar né stale valor neca guyuu tu bicaalú laa. Ra bizulú iza 1921, guniʼné hermanu riʼ ti predicador de sti religión ne gúdxibe laa: «Naquiiñeʼ guininu né diidxaʼ nadóʼ de ca cosa ni zeeda lu Biblia. Ne pa cadi nuunu de acuerdu lu caadxi cosa la? zanda gusaananu ni de raca si, sin tíndenu». Peru qué nizaaca ni zaqué. Hermanu Hoskin guníʼ: «Cadi tan xadxí de canidu diidxaʼ, málasi guizáʼ reciu biseeguʼ predicador que puertaʼ stiʼ, dede guníʼ iqueʼ gulaa ca ventana stini».

Ne naduxhuʼ hombre que guníʼ: «¡Mejor yegusiidiʼ ca ni qué ganna de Biblia!». Qué niníʼ hermanu Hoskin gastiʼ, peru guníʼ íquebe: «Naa rabeʼ nga nga ni cayuneʼ».

Ne cadi raca si biaana ni, sti dxi queca guníʼ predicador que mal de hermanu que. Hermanu Hoskin guníʼ: «Guniʼbe mal de naa ndaaniʼ yuʼduʼ stibe. Ne gúdxibe laacaʼ gástiruʼ stobi casi naa ni yendá ndaaniʼ guidxi que purtiʼ cadi jneza ni rusiideʼ ne pur ngue naquiiñeʼ guuticabe naa». Neca bizaaca ndiʼ qué niree hermanu riʼ gana. Qué nusaana de ñuni predicarbe ne guníʼnebe stale binni. Laaca guniʼbe: «Guizáʼ nayecheʼ bineʼ predicar de yoo pur yoo raqué. Dede guyuu caadxi binni gudxi naa: “Nánnadu xhiiñaʼ Dios nga cayúniluʼ” ne gunabadiidxacabe naa pa zanda gacanécabe naa para cadi guiaadxaʼ gastiʼ naa».

GUNI ESTUDIÁRCABE STÚBICABE NE GUNI ESTUDIARNÉCABE FAMILIA STÍCABE

Para gacanécabe binni guiene chaahuiʼ Biblia, biʼniʼ publicar Ca Binni Ruundaʼ Biblia lu revista ni runibiaʼnu yanna ¡Gutaná! caadxi pregunta ne ximodo ricabi Biblia cani. Laaca lu revista riʼ zeeda caadxi pregunta para ca joven, ni zanda iquiiñeʼ ca padre ca para ganda guiníʼnecaʼ laacabe. Ca ni napa xiiñiʼ zanda guinabadiidxacaʼ ne gacanecaʼ laacabe guidxélacabe ca respuesta stini lu Biblia. Cadi nagana ni rusiidicabe luni, tobi de ca pregunta que nga «¿Panda libru napa Biblia?». Ne stobi de laani nga «¿Ñee zazanándacabe guiráʼ xpinni Cristu la?», né ca pregunta riʼ racanécabe ca joven para gácacaʼ nadxibalú ora guni predicarcaʼ.

Laaca lu revista riʼ nuu pregunta ne respuesta stiʼ Biblia para ca binni ni ziné jma stale tiempu de cayuundaʼ Biblia ne ridxélacabe respuesta stini lu primé libru stiʼ Estudios de las Escrituras. Stale de ca ni biʼndaʼ revista riʼ guleenducaʼ ni galán pur ca pregunta riʼ. Peru revista ni biree 21 de diciembre iza 1921 guníʼ maʼ qué zareeruʼ ca pregunta riʼ. ¿Xiñee maʼ qué zareecani yaʼ?

TI LIBRU NACUBI

Libru *El Arpa de Dios* lu diidxaʼ inglés.

Ti tarjetahuiiniʼ ra cá paraa naquiiñeʼ guʼndaʼ ti estudiante Biblia.

Ti tarjeta ra cá pregunta.

Bidii ca hermanu ni zaniruʼ ndaaniʼ xquidxi Dios cuenta caquiiñeʼ guiziidiʼ ca ni deruʼ cayuundaʼ Biblia de laani pur tema. Ne pur ngue lu beeu noviembre iza 1921 biree libru ni láʼ El Arpa de Dios lu diidxaʼ inglés ne lu iza 1925 bireeni lu diidxastiá. Ca binni ni ricaa libru riʼ ricá lacaʼ para guicaacaʼ ti cursu para ganda guni estudiarcaʼ libru riʼ stúbicaʼ ne gucané cursu riʼ «para ganda guiénecabe ximodo chigudii Dios guendanabani ni qué zaluxe binni guidxilayú». ¿Ximodo guca cursu riʼ yaʼ?

Ora ricaa ca binni que libru El Arpa de Dios, laaca ricaacaʼ ti tarjetahuiiniʼ ra cá xi yaza naquiiñeʼ gúʼndacaʼ. Sti semana despué, ricaacabe sti tarjeta ra cá xcaadxi pregunta ni caníʼ de ni maca biindacabe ne ra ziluxe ni cá paraa zuundabe sti semana ca.

Lu doce semana ricaa estudiante riʼ ti tarjeta ni ruseendaʼ congregación ra nuu guiráʼ semana. Ca hermanu ni maʼ huaniisi o ca ni maʼ qué zanda chiguni predicar de yoo pur yoo, nga ca ni ruseendaʼ ca tarjeta riʼ. Guzéʼtenu ni bizaaca hermana Anna Gardner, ti hermana de Millvale (Pensilvania, Estados Unidos), laa guníʼ: «Ra biree libru riʼ, nabé gucané ni bendaʼ Thayle para ganda guni jma lu xhiiñaʼ Jehová purtiʼ yanna maʼ zanda guseendabe ca tarjetahuiiniʼ ra cá ca pregunta que guiráʼ semana, purtiʼ qué randa rizabe». Ora riluxe estudiante que cursu stiʼ, riganna ca hermanu laabe para gacanecaʼ laabe guiziidibe jma de lu Biblia.

Zuba hermana Thayle Gardner lu silla de rueda stiʼ.

NUURUʼ STALE DXIIÑAʼ NI GACA

Ra maʼ ziluxe iza 1921, biseendaʼ hermanu Joseph Rutherford ti carta ra nuu ca congregación. Lu carta que ná: «Jma guca predicar stiidxaʼ Reinu iza riʼ ne jma gucané ni binni iza riʼ que ca iza gudiʼdiʼ ca». Guníʼ íquebe ca dxi ni zeeda ca, nga runi bizeetebe: «Nuuruʼ stale dxiiñaʼ ni gaca. Nga runi, lacuu gana xcaadxi para gúnicaʼ dxiiñaʼ riʼ». Rihuinni dxichi yenanda Ca Binni Ruundaʼ Biblia ni ná hermanu riʼ. Ne lu iza 1922, biʼniʼ predicárcabe né stale valor ne stale gana de Reinu stiʼ Dios.

Guca xhamigu chupa hermanu ne gúcacaʼ nadxibalú

Nabé gunnaxhiisaa Ca Binni Ruundaʼ Biblia ne gucanésaacaʼ. Guca xhamígucabe ne gúcacabe nadxibalú ora gudíʼdicabe ra nagana, casi chiguidúʼyanu lu ca párrafo riʼ (Prov. 17:17).

Martes 31 de mayo iza 1921, ndaaniʼ guidxi Tulsa (Oklahoma, Estados Unidos) guti stale binni despué de biseguyoocabe ti hombre negru purtiʼ bininá ti gunaa de color blancu. Despué, jma de ti mil hombre blancu bidxelasaacaʼ ti grupuhuiiniʼ de hombre negru ne laaca gudíndecabe ti lugar ra nabeza stale binni negru ni láʼ Greenwood, guláʼnacabe ne bicaaguícabe jma de ti mil tapa gayuaa yoo ne negocio. Guyuu ti informe ná guti 36 binni peru zándaca guti jma.

Hermanu Richard Hill, ti Binni Ruundaʼ Biblia negru ni nabeza Greenwood, guníʼ ni bizaaca: «Huaxhinni gudíndecabe que, gúpadu reunión de congregación cásica maca rúnidu ni. Biluxe si reunión que binadiágadu caree tiru galahuiʼ guidxi ne binadiágarudu ni dede ora maʼ chigásidu». Sti dxi que 1 de junio jmaruʼ si nagana guca ca cosa que: «Guyé caadxi binni ra nuudu ne gúdxicaʼ laadu pa nuudu guiladu napa xidé chuudu ndaaniʼ auditorio stiʼ guidxi Tulsa». Ngue runi guyé hermanu Hill, xheelaʼ ne gaayuʼ xiiñicaʼ, ndaaniʼ auditorio que. Lugar que biseendaʼ gobiernu soldadu para gápacaʼ biaʼ chonna mil hombre ne gunaa negru.

Ora gunna hermanu Arthur Claus, ti hermanu blancu, ni bizaaca que la? guca nadxibalú ne gucuaa ti decisión. Sicaríʼ guníʼ: «Ora gunnaʼ cabeecabe binni ni nabeza Greenwood ne cuzaaquicabe lidxi, nagueendaca yeguuyaʼ ximodo nuu xhamiguaʼ, hermanu Hill».

Biquiiñeʼ hermanu Arthur Claus libru El Arpa de Dios para gudii cursu de lu Biblia 14 jovenhuiiniʼ.

Ora yendabe ra lidxi hermanu Hill, bidxaagabe ti hombre blancu ni naca xpecinu hermanu Hill ne naaze ti rifle. Guníʼ ique hombre riʼ, ni laaca xhamigu hermanu Hill, naca Arthur tobi de ca gubaanaʼ ngue runi bicaa ridxi: «¡¿Xi cayúniluʼ ndaaniʼ jardín stiʼ hombre riʼ pue?!».

Arthur guníʼ: «Gudxeʼ laabe laaca xhamiguaʼ hermanu Hill ne maʼ ruʼ guyaaʼ ra lidxi stale biaje, ngue runi qué nucuaagube naa». Gupa Arthur ne hombre que lidxi hermanu Hill para cadi chuʼ tuuxa cuanaʼ ndaaniʼ ni.

Qué nindaa gunna Arthur nuu hermanu Hill ne familia stiʼ ndaaniʼ auditorio stiʼ Tulsa. Gúdxicabe laabe qué zanda diʼ guiree ca binni negru de lugar que, pa qué gudii general Barret permisu, purtiʼ laa nga encargadu stiʼ lugar que. Arthur guníʼ: «Guca nagana para naa guinieniáʼ general que. Ora gudxeʼ laabe xi cá iqueʼ guneʼ, gunabadiidxabe naa: “¿Zaca xcuéntaluʼ de familia riʼ ne zudiiluʼ ni caquiiñecabe la?”. Gudxeʼ laabe zuneʼ ni».

Ne biree Arthur zeʼ ra auditorio ra nuu hermanu Hill ne ziné permisu ni bidii general que laa. Ora yendabe raqué biluiʼbe ni ti soldadu ne laa guníʼ: «¡General peʼ biʼniʼ firmar guiʼchiʼ riʼ! ¿Ñee nannuʼ lii nga primé binni chindee tuuxa de lugar riʼ la?». Qué nindaa bidxela Arthur ne soldadu que hermanu Hill ne familia stiʼ. Para bidxiibaʼ Arthur laacabe lu carru stiʼ ne guyécabe ra lidxi hermanu Hill.

Gupa hermanu Arthur hermanu Hill ne familia stiʼ. Gucané ejemplu stiʼ Arthur xcaadxi binni purtiʼ bisihuínnibe nadxibalube ne nadxiibe hermanu stibe. Arthur guníʼ: «Vecinu ni gucané guiaapaʼ ra lidxi familia Hill que, jmaruʼ si biʼniʼ respetarbe Ca Binni Ruundaʼ Biblia. Ne stale binni guyuulaʼdxiʼ guiziidiʼ de Reinu purtiʼ bidiicaʼ cuenta qué rúninu menu binni pur color stiʼ ne biaʼca risaca guiráʼ binni ndaaniʼ xquidxi Dios».