¿Xiñee raca nanalaʼdxiʼ binni?

¿Xiñee stale binni nabé nanaláʼdxisaa? Para gánnanu ni la? naquiiñeʼ gánnanu xi riníʼ gaca nanalaʼdxiʼ binni, xi rucaa binni gaca nanalaʼdxiʼ ne xiñee stale binni nanalaʼdxiʼ.

¿Xi riníʼ gaca nanalaʼdxiʼ binni?

Cadi laadini nga ora qué riaba tuuxa laanu, sínuque ora ridaʼnu xiana né sti binni o ti grupu de binni ne maʼ qué rinanu guidxaaganu o guinínenu laacaʼ.

¿XI RUCAA BINNI GACA NANALAʼDXIʼ?

Nuu stale razón ni rucaa binni gaca nanalaʼdxiʼ. Stale biaje la? raca nanaláʼdxicabe tuuxa cadi tantu pur ni runi, sínuque laa peʼ nga nanaláʼdxicabe. Zándaca ruuyacabe laa casi ti binni malu o qué iquiiñeʼ, ne riníʼ íquecabe maʼ qué zuchaa. O riníʼ íquecabe jma risácacabe que laa, o pur laa rápacabe guendanagana. Ne nuu tu laa raca nanalaʼdxiʼ purtiʼ dxi nahuiiniʼ nabé bininácabe laa ne nabé biʼniʼ sufrir.

¿XIÑEE JMA STALE BINNI NANALAʼDXIʼ?

Nuu tu laa nanalaʼdxiʼ sti binni neca qué runibiáʼ laabe. Guzéʼtenu ti ejemplu, nuu binni purtiʼ nadxii o runi respetar tuuxa runi cré ni gabi binni ca laa neca cadi dxandíʼ ni. Ne despué, maʼ raca nanalaʼdxiʼ stobi purtiʼ maʼ riníʼ ique modo riníʼ ique binni ca.

Cumu nagueenda nga ricá ni binni la? nga runi jma stale binni nanaláʼdxisaa. Peru para cadi gaca nanaláʼdxinu binni, naquiiñeʼ gánnanu paraa bizulú ni. Ne Biblia cusiene ni.

BIBLIA CAYABI LAANU PARAA BIZULÚ NI

Ti diagrama ni rusihuinni ximodo racananaláʼdxisaa binni. 1. Pur presión de grupu, ni rudxiibacabe lu red social ne ni riníʼ ca medio de comunicación runi cré binni información ni cadi dxandíʼ. 2. Ni qué ganna binni de ti cultura, de ti raza o ti religión. 3. Ridxibi binni xiixa cambiu, guniti xiixa o ni qué runibiáʼ. 4. Nanalaʼdxiʼ binni purtiʼ qué riaba xcaadxi laa, rúnicabe menu laa ne nuu stale guendaridinde.

CADI BINNI GUIDXILAYÚ NGA GUCA NANALAʼDXIʼ PRIMÉ. Bizulú ni guibáʼ dxi bicaalú ti ángel Dios ne laa nga Binidxabaʼ. Dxi bicaalube Dios, beeda gácabe tobi ni ruuti. Cumu «rusiguiibe ne laabe nga bixhoze guiráʼ ni rusiguii» la? qué huasaanabe de gucaabe binni gaca nanalaʼdxiʼ ne tinde (Juan 8:44; 1 Juan 3:11, 12). Biblia ná nabé malu laabe ne guizáʼ cadxiichibe (Job 2:7; Apocalipsis 12:9, 12, 17).

CUMU GULENENU DONDA LA? RUCAANI LAANU GACA NANALÁʼDXINU. Adán, primé hombre que, biʼniʼ ni ná Binidxabaʼ ne pur ngue guiranu gulenenu donda ne rucheʼnu (Romanos 5:12). Caín, primé xiiñiʼ Adán que, guca nanaláʼdxibe bíʼchibe Abel ne biitibe laa (1 Juan 3:12). Neca peʼ nadxiinu ne rianu binni, peru cumu gulenenu donda la? stale binni jma nagueenda rapa envidia, ruyubi puru si para laa ne riníʼ ique jma risaca que xcaadxi ne pur nga stale binni raca nanaláʼdxisaa (2 Timoteo 3:1-5).

PA QUÉ RIABA TUUXA LII ZUCAANI LII GACA NANALÁʼDXILUʼ LAA. Guidxilayú riʼ rucaa ni binni gaca nanalaʼdxiʼ purtiʼ rusiidiʼ ni laacaʼ gácacaʼ malu ne cadi guiacaʼ stobi. Cumu «guidubi guidxilayú riʼ nuuni lu náʼ Binidxabaʼ» la? nga runi guiráʼ dxi ridúʼyanu binni ni nanaláʼdxisaa purtiʼ qué riaba xcaadxi laacaʼ, riguudicaʼ, runi búrlacaʼ ne dede ridíndecaʼ (1 Juan 5:19).

Cadi cayabi si Biblia laanu paraa bizulú problema ca, laaca cayabi ni laanu ximodo gaca chaahuiʼ ni.