¿Ñee nápanu confianza jneza guiráʼ ni runi Jehová la?

1, 2. a) ¿Xiñee raca nagana para stale binni gápacaʼ confianza ca ni napa autoridad? b) ¿Xi zadúʼyanu lu artículo riʼ?

TIEMPU riʼ raca nagana para stale binni gapa confianza ca ni napa autoridad. ¿Xiñee yaʼ? Purtiʼ ruuyacabe racané ley ca binni ni naca ricu ne ca ni napa autoridad, peru ca binni pobre la? qué racanécabe laacaʼ. Nga runi, Biblia ná: «Binni huayuni mandar binni para si gacaná» (Ecl. 8:9). Ne pur ni runi caadxi líder stiʼ ca religión ca rucaa ni binni cadi gapa confianza Dios. Nga runi naquiiñeʼ gacanenu ca estudiante stinu gápacaʼ confianza Dios ne ca ni maʼ gulibe para guni dirigir laanu.

² Cadi ca estudiante si stinu nga naquiiñeʼ gapa confianza Jehová ne organización stiʼ. Laanu, ca ni maʼ zinenu stale iza ndaaniʼ xquidxi Jehová, cadi naquiiñeʼ gusaana de gápanu confianza jneza guiráʼ ni runi Jehová. Purtiʼ zándaca guizaaca xiixa cosa ra naquiiñeʼ gusihuínninu pa naguidxi nuu fe stinu. Lu artículo riʼ zuzéʼtenu chonna de laani. Primé, ora guidúʼndanu xiixa relatu ni zeeda lu Biblia. Guiropa, ora rudii xquidxi Jehová laanu xiixa instrucción. Ne guionna, ora guidxaagalunu xiixa prueba lu ca dxi ni zeeda ca.

GÁPANU CONFIANZA JEHOVÁ ORA GUIDÚʼNDANU BIBLIA

3. ¿Xiñee zahuinni pa nápanu confianza Jehová ora guidúʼndanu ti relatu ni zeeda lu Biblia?

³ Ora guidúʼndanu Biblia, zándaca guiníʼ íquenu xiñee gadxé modo biʼniʼ tratar Jehová caadxi binni o xiñee gucuaabe xiixa decisión. Guzéʼtenu ti ejemplu, lu libru stiʼ Números riete biʼniʼ mandar Jehová gatiʼ ti israelita pur yetopa yaga dxi sábadu. Peru gudiʼdiʼ si stale iza, lu guiropa libru stiʼ Samuel riete biʼniʼ perdonar Jehová rey David neca guyuuné ti binni ni cadi xheelaʼ ne biiti ti binni (Núm. 15:32, 35; 2 Sam. 12:9, 13). Zándaca guiníʼ íquenu: «¿Xiñee biʼniʼ perdonar Jehová David pa malu ca pecadu ni biʼniʼ, peru biʼniʼ mandarbe gatiʼ ti hombre ni ruluíʼ cadi tan malu ni biʼniʼ?». Guidúʼyanu chonna cosa ni cadi naquiiñeʼ guiaandaʼ laanu ora guidúʼndanu Biblia.

4. ¿Ximodo racané Génesis 18:20, 21 ne Deuteronomio 10:17 laanu gápanu confianza ca decisión ni ricaa Jehová?

⁴ Nuu caadxi cosa ni maʼ qué ruzeeteʼ Biblia. Nánnanu dxandíʼ guca arrepentir David de ni biʼniʼ (Sal. 51:2-4). Peru ¿ximodo naca hombre ni bicheené ley stiʼ sábadu que yaʼ? ¿Dxandíʼ guca arrepentirbe pur ni bíʼnibe que la? ¿Ñee ngue nga primé biaje gucheenebe ley stiʼ Jehová la? ¿Ñee guyuu tu guniʼné laabe, peru qué nulábibe ca conseju stiʼ la? Qué ruzeeteʼ diʼ Biblia ni. Peru nánnanu qué runi Jehová nin ti «cosa malu» (Deut. 32:4). Cadi jneza modo runi juzgar binni purtiʼ rinándacaʼ ni runadiágasicaʼ o purtiʼ rúnicaʼ menu tuuxa. Peru cadi zacá diʼ Jehová purtiʼ laa nanna xi guiráʼ rizaaca (biindaʼ Génesis 18:20, 21; Deuteronomio 10:17). Ra jma gunibiaʼnu Jehová ne ca ley stiʼ jma zápanu confianza jneza ca decisión ni ricaa. Nga runi zándaca ra guidúʼndanu Biblia gápanu pregunta ne qué guidxélanu respuesta stiʼ ca ni yanna. Peru ni maʼ bizíʼdinu de Jehová naquiiñeʼ gucaani laanu gápanu confianza jneza guiráʼ ni rúnibe (Sal. 145:17).

5. Pur binni ruchee laanu, ¿xi rizaacanu ora runi juzgarnu? (Biiyaʼ cuadru ni láʼ «Pur binni ruchee laanu, nuu biaje cadi jneza modo runi juzgarnu»).

⁵ Cadi guiráʼ biaje jneza modo runi juzgarnu tuuxa purtiʼ binni ruchee laanu. Cumu bizáʼ Dios laanu casi laa la? qué riuuláʼdxinu ora guidúʼyanu cayaca xiixa cosa ni cadi jneza (Gén. 1:26). Peru cumu binni ruchee laanu la? zándaca cadi jneza modo guni juzgarnu tuuxa neca riníʼ íquenu nánnanu xi guiráʼ bizaaca. Cadi guiaandaʼ laanu ni bizaaca Jonás. Guizáʼ bidxiichibe ora biá Jehová ca binni de Nínive (Jon. 3:10–4:1). Peru pur decisión ni gucuaa Jehová bilá jma de 120,000 binni de Nínive. Racá ridúʼyanu Jonás ngue cadi jneza modo biʼniʼ juzgar ne cadi Jehová.

6. ¿Xiñee cadi caquiiñeʼ gabi Jehová laanu xi chiguni?

⁶ Qué gapa Jehová xi pur gusiene binni xiñee ricaa xiixa decisión. Dxiqué bidii Jehová lugar guinabadiidxaʼ ca xpinni laa xiñee gucuaa xiixa decisión o xi pur chiguni xiixa (Gén. 18:25; Jon. 4:2, 3). Ne nuu biaje bisiene Jehová xiñee gucuaa xiixa decisión (Jon. 4:10, 11). Peru qué gapa Jehová xi pur gabi laanu xiñee runi xiixa cosa. Laabe nga bizaʼbe laanu, nga runi cadi caquiiñeʼ guinabadiidxabe laanu ante o despué de gúnibe xiixa (Is. 40:13, 14; 55:9).

GÁPANU CONFIANZA JEHOVÁ ORA GUDII LAANU INSTRUCCIÓN

7. ¿Tu nga ca ni zándaca gaca nagana para laanu gápanu confianza, ne xiñee?

⁷ Nanna dxíchinu siempre runi Jehová ni jneza. Peru zándaca gaca nagana para laanu gápanu confianza ca hombre ni maʼ gulibe para guni dirigir laanu. Zándaca guiníʼ íquenu pa cayúnicabe ca cosa ca modo ná Jehová o modo nácabe. Nga nga zándaca bizaaca caadxi binni ni riete lu Biblia. Guzéʼtenu ca ejemplu ni bidúʼyanu lu párrafo chonna que. Qué gánnanu pa guníʼ ique familia stiʼ hombre ni bicheené ley stiʼ sábadu que pa gunabadiidxaʼ Moisés Jehová ante guiete naquiiñeʼ gátibe. Zándaca laaca ngaca bizaaca ti xhamigu Urías, xa hitita que. Guyuuné David xheelaʼ Urías ne zándaca guníʼ ique xhamigu Urías pa pur naca David rey nga qué nicaa castigu ni runi merecer. Ndiʼ nga laani: qué zanda diʼ guininu nápanu confianza Jehová pa qué gápanu confianza ca hombre ni maʼ gulibe para guni dirigircaʼ laanu.

8. Casi ná Hechos 16:4, 5, ¿xiñee zanda guininu cásica guca dxiiñaʼ ndaaniʼ xquidxi Jehová dxiqué rácani yanna?

⁸ Tiempu riʼ, riquiiñeʼ Jehová «mozo ni nuu xpiaaniʼ ne ni runi jneza» para guni dirigir organización stiʼ ni nuu lu Guidxilayú (Mat. 24:45). Cásica biʼniʼ grupu ni zániru ni guyuu lu primé siglu, ruuyaʼ mozo riʼ dxiiñaʼ ni runi xquidxi Jehová ni nuu lu guidubi Guidxilayú ne rudiicaʼ instrucción ca ancianu (biindaʼ Hechos 16:4, 5). Ne ruuyaʼ ca ancianu chinanda ca hermanu de congregación ca instrucción ca. Pa chinándanu ca instrucción ni rudii xquidxi Jehová ne stiʼ ca ancianu, zusihuínninu nápanu confianza jneza guiráʼ ni runi Jehová.

9. ¿Pora nga zándaca gaca nagana para laanu chinándanu ca decisión stiʼ ca ancianu ne xiñee?

⁹ Nuu biaje zaca nagana para laanu chinándanu ca decisión ni guicaa ca ancianu. Guzéʼtenu ti ejemplu, lu ca últimu iza riʼ maʼ guca caadxi congregación tobi si ne nuu de laacaʼ maʼ bidxaacaʼ de circuito. Ne nuu biaje rinabaʼ ca ancianu caadxi publicador guidxaacaʼ de congregación para gaca aprovechar ca lugar ni nuu ndaaniʼ ca Yoo stiʼ Reinu. Pa guinábacabe laanu gúninu ni la? zándaca gaca nagana para laanu gusaananu familia stinu ne ca xhamígunu. ¿Ñee rabi Jehová ca ancianu ca paraa naquiiñeʼ cheʼ cada publicador la? Coʼ. Ne zándaca pur nga gaca nagana para laanu chinándanu ca instrucción ni gudiicabe laanu. Peru napa Jehová confianza ca decisión ni ricaacabe, ne laanu laaca naquiiñeʼ gúninu ni.b

10. Casi ná Hebreos 13:17, ¿xiñee naquiiñeʼ chinándanu ca decisión ni ricaa ca ancianu?

¹⁰ ¿Xiñee naquiiñeʼ chinándanu ca decisión ni ricaa ca ancianu neca qué chuuláʼdxinu ca ni yaʼ? Purtiʼ ora rúninu ni racanenu chuʼ xquidxi Dios tobi si (Efes. 4:2, 3). Laaca ribeendú congregación ni galán ora nácanu humilde ne rinándanu ca decisión ni ricaa ca ancianu (biindaʼ Hebreos 13:17). Ne ni jma risaca rusihuínninu nápanu confianza Jehová purtiʼ laa nga maʼ gulí ca ancianu para gápacaʼ laanu (Hech. 20:28).

11. ¿Xi zacané laanu gápanu jma confianza ca decisión ni ricaa ca ancianu?

¹¹ ¿Xi zacané laanu gápanu jma confianza ca decisión ni ricaa ca ancianu yaʼ? Cadi guiaandaʼ laanu rinábacabe Jehová espíritu santu stiʼ ora chicaacabe xiixa decisión para congregación. Laaca rinándacabe ni ná Biblia ne ca instrucción ni rudii organización laacabe. Racaláʼdxicabe gusiéchecabe Jehová ne gápacabe ca hermanu. Nanna ca ancianu zabidxi Dios cuenta laacaʼ pur modo gúnicaʼ xhiiñacaʼ (1 Ped. 5:2, 3). Guiníʼ íquenu ndiʼ, ndaaniʼ Guidxilayú ra nabézanu riʼ nuudinde binni pur raza, religión ne política, peru laanu la? nuunu tobi si cayúninu ni ná tobi lucha Dios ni dxandíʼ. Ndiʼ rusihuinni caguu Jehová ndaayaʼ organización stiʼ.

12. ¿Xi naquiiñeʼ guʼyaʼ ca ancianu para gánnacaʼ pa dxandíʼ cayaca arrepentir ti binni?

¹² Maʼ bisaana Jehová lu naʼ ca ancianu gúʼyacaʼ chuʼ congregación nayá. Nga runi, pa guni cometer ti xpinni Cristu ti pecadu grave, ribeza Jehová guicaa ca ancianu decisión pa zácarube parte de congregación. Tobi de ca cosa ni ruuyaʼ ca ancianu nga pa dxandíʼ cayaca arrepentirbe. Xcaadxi cosa ni ruuyaʼ ca ancianu nga, neca maʼ guníʼ binni ca cayaca arrepentir, peru ¿dxandíʼ cabixhiláʼdxibe ni bíʼnibe la? ¿Ñee cusihuínnibe maʼ qué zabiguetaʼ gúnibe pecadu ca la? Pa ca xhamígube nga bicaa laabe gucheebe, ¿ñee nuube dispuestu guixélebe de laacaʼ la? Runi orar ca ancianu, ruuyacaʼ xi guiráʼ bizaaca ne ni ná Biblia ne ruuyacaʼ pa dxandíʼ cayaca arrepentir binni ca pur ni biʼniʼ. Despué, ricaacabe decisión pa zácaruʼ binni ca parte de congregación o coʼ. Nuu biaje naquiiñeʼ gaca expulsar binni ca (1 Cor. 5:11-13).

13. ¿Xi zándaca guiníʼ íquenu pa gaca expulsar ti familia o ti xhamígunu?

¹³ Pa gaca expulsar ti binni ni cadi xhamígunu o ni cadi familia stinu zándaca nagueenda zinándanu decisión ni guicaa ca ancianu. Peru ¿xi guizaaca pa ti xhamígunu nga ni gaca expulsar yaʼ? ¿Ñee zusihuínninu nápanu confianza decisión ni gucuaa ca ancianu la? Zándaca chuʼnu xizaa pa biiyaʼ ca ancianu guiráʼ ni bizaaca o pa biʼniʼ juzgárcabe laabe modo runi juzgar Jehová. ¿Xi zacané laanu guidúʼyanu jneza decisión ni gucuaa ca ancianu yaʼ?

14. ¿Xi cadi naquiiñeʼ guiaandaʼ laanu pa guni expulsar ca ancianu ti familia stinu o ti xhamígunu?

¹⁴ Cadi guiaandaʼ laanu gudixhe Jehová gaca expulsar ti binni para guiaapaʼ congregación ne gacaneni binni ni bichee ca. Pa qué gaca expulsar ti binni ni cadi cayaca arrepentir de ndaaniʼ congregación la? zándaca gucaabe xcaadxi hermanu gucheecaʼ (Gál. 5:9). Ne qué zudiibe cuenta pa malu ni bíʼnibe ne cadi caquiiñeʼ guchaabe modo riníʼ íquebe ne ni rúnibe para gaca xhamígube Jehová sti biaje (Ecl. 8:11). Naquiiñeʼ chuʼnu seguru rusisaca ca ancianu dxiiñaʼ ni maʼ bidii Jehová laacaʼ de gúʼyacaʼ pa zaca expulsar ti binni de ndaaniʼ congregación o coʼ. Cásica ca juez ni guyuu ndaaniʼ guidxi Israel de dxiqué nánnacabe «runi juzgárcabe para Jehová ne cadi para binni» (2 Crón. 19:6, 7).

PA GÁPANU CONFIANZA JEHOVÁ YANNA ZACANÉ NI LAANU DESPUÉ

15. ¿Xiñee dede ca yanna naquiiñeʼ gápanu jma confianza ca instrucción ni rudii Jehová?

¹⁵ Jma mayaca guinitilú guidxilayú malu riʼ. Nga runi, yanna nga jma naquiiñeʼ gápanu confianza jneza guiráʼ ni runi Jehová. Ne nabé risaca ndiʼ purtiʼ lu gran tribulación zándaca gudiicabe laanu instrucción ni gaca nagana para laanu guiénenu o gaca nagana para laanu chinándanu. Cadi Jehová peʼ nga guiniʼné laanu, zándaca zaquiiñebe ca xpínnibe ni runi dirigir xquídxibe para gudiicaʼ laanu instrucción. Óraca cadi naquiiñeʼ guiníʼ íquenu pa dxandíʼ de Jehová zeeda ca instrucción ca o pa cayuni ca hermanu ca ni racaláʼdxicaʼ. ¿Ñee zápanu confianza Jehová ne organización stiʼ ora maʼ nuunu lu gran tribulación la? Zánnaluʼ respuesta ca pa dede ca yanna rinándaluʼ ca instrucción ni rudii xquidxi Dios. Pa nagueendaca rinándanu ca instrucción ni rudiicabe laanu yanna, laaca zacaca zúninu lu gran tribulación (Luc. 16:10).

16. Maʼ cadi candaa, ¿ximodo zahuinni pa nápanu confianza ca decisión stiʼ Jehová?

¹⁶ Nuu sti cosa ni naquiiñeʼ guiníʼ íquenu, ximodo guni sentirnu ora guidúʼyanu modo biʼniʼ juzgar Jehová binni ora maʼ biluxe guidxilayú stiʼ Binidxabaʼ. Tiempu riʼ, nápanu esperanza guni ca familia stinu ni ná Jehová ante gueeda fin, peru maʼ lu Armagedón la? zaquiiñeʼ Jehová Jesús para guni juzgar cada binni (Mat. 25:31-33; 2 Tes. 1:7-9). Cadi laadinu nga guininu tu guilá ne tu laa coʼ (Mat. 25:34, 41, 46). ¿Zápanu confianza Jehová la? o zudxiidéchenu laabe purtiʼ cadi cayuuláʼdxinu decisión stibe? Ndiʼ nga laani: yanna nga naquiiñeʼ gápanu jma confianza Jehová para cadi gusaana de gápanu confianza laabe lu ca dxi ni zeeda ca.

17. ¿Xi zazaaca pur ca decisión ni guicaa Jehová ra maʼ ziluxe guidxilayú?

¹⁷ Guiníʼ íquenu ximodo zuni sentirnu ndaaniʼ guidxilayú cubi ca ora guidúʼyanu xi guizaaca pur ca decisión jneza stiʼ Jehová. Maʼ qué ziuuruʼ religión ni cadi dxandíʼ, nin negocio ni raxha xpueltu binni ne nin ca gobiernu ni ruquiichináʼ ne ni runiná binni. Maʼ qué ziuu guendahuará, guendarioʼxhoʼ ne maʼ qué zati binni. Zieguyoo Binidxabaʼ ne ca demonio stiʼ 1,000 iza. Guiráʼ ca cosa malu biʼniʼ Binidxabaʼ zareecani (Apoc. 20:2, 3). Guizáʼ nayecheʼ zuni sentirnu purtiʼ gúpanu confianza jneza guiráʼ ni runi Jehová.

18. Casi ná Números 11:4-6 ne 21:5, ¿xi rizíʼdinu de ni bizaaca ca israelita?

¹⁸ Ora maʼ nuunu ndaaniʼ guidxilayú cubi ca, ¿ñee zazaaca xiixa cosa ni zucaa laanu gusihuínninu pa nápanu confianza jneza guiráʼ ni runi Jehová? Guiníʼ íquenu ni bizaaca gulee si Jehová ca israelita de Egipto. Nuu de laacaʼ guca quejarcaʼ purtiʼ cabánacaʼ ca guendaró ni gudocaʼ Egipto ne bíʼnicaʼ menu maná ni bidii Jehová laacaʼ (biindaʼ Números 11:4-6; 21:5). ¿Ñee ngaca zanda guizaacanu tidi si gran tribulación la? Qué gánnanu pabiáʼ tiempu zúninu dxiiñaʼ para gusianu Guidxilayú riʼ ne chaahuiʼ chaahuiʼ gácani ti paraísu. Zándaca ziuu stale dxiiñaʼ ni gúninu ne gácani caadxi nagana. Yanna, ¿ñee zaca quejarnu de ca cosa ni gudii Jehová laanu tiempu ca la? Pa de ca yanna rudiʼnu xquixe peʼ Jehová pur guiráʼ cosa ni rudii laanu laaca zacaca zúninu ni lu ca dxi ni zeeda ca.

19. ¿Xi guiráʼ maʼ bizíʼdinu lu artículo riʼ?

¹⁹ Cadi naquiiñeʼ guiaandaʼ laanu jneza runi Jehová guiráʼ cosa. Laaca naquiiñeʼ gápanu confianza ca binni ni maʼ gulí Jehová para gudii laanu instrucción. Qué chuʼ dxi guiaandaʼ laanu ca diidxaʼ ni gudxi Jehová profeta Isaías: «Zápatu stipa pa cadi gaca lúgutu ne gápatu confianza» (Is. 30:15).