Zanda guibáninu sin qué chuʼ dxi gátinu

1. Ra guiníʼ íquenu promesa ni cayuni Jehová laanu, ¿xi rucaa ni laanu gúninu?

CAYUNI prometer Jehová gudii «guendanabani ni qué zaluxe» ca binni ni guzuubaʼ stiidxaʼ (Rom. 6:23). Ora guiníʼ íquenu promesa riʼ, jma rannaxhiinu laabe. Guiníʼ íquenu ndiʼ, cumu guizáʼ nadxii Bixhózenu ni nuu guibáʼ laanu la? nga runi cudii laanu regalu riʼ para qué chuʼ dxi guixélenu de laa.

2. Promesa de guicaanu guendanabani ni qué zaluxe, ¿ximodo racané ni laanu?

² Promesa ni cudii Dios laanu de guicaanu guendanabani ni qué zaluxe, racaneni laanu gudxíʼlunu ca guendanagana ni gápanu. Ne pa gacalaʼdxiʼ ca enemigu stinu guuticaʼ laanu, qué zusaana de gúninu ni ná Jehová. ¿Xiñee yaʼ? Purtiʼ pa gátinu sin guchéʼnenu Jehová nánnanu zandísabe laanu de lade gueʼtuʼ ne zápanu esperanza de guibáninu sin qué chuʼ dxi gátinu (Juan 5:28, 29; 1 Cor. 15:55-58; Heb. 2:15). ¿Xiñee runi crenu zabáninu sin qué chuʼ dxi gátinu yaʼ? Guidúʼyanu caadxi razón.

SIEMPRE NABANI JEHOVÁ

3. ¿Xiñee nanna dxíchinu zudii Jehová laanu guendanabani ni qué zaluxe? (Salmo 102:12, 24, 27).

³ Nánnanu zudii Jehová laanu guendanabani ni qué zaluxe purtiʼ ra nuube nga «cadá guendanabani» ne siempre nabánibe (Sal. 36:9). Guidúʼyanu caadxi versículo ni zeeda lu Biblia ni rusihuinni siempre huabani Jehová ne siempre zabani. Salmo 90:2 ná «guiráʼ dxi huadiʼdiʼ ne guiráʼ dxi chitiidiʼ» nuu Dios. Ne laaca zacagá riete lu Salmo 102 (biindaʼ Salmo 102:12, 24, 27). Ne ndiʼ nga ni bicaa profeta Habacuc de Bixhózenu ni nuu guibáʼ: «Jehová, ¿cadi maca siempre nabániluʼ la? Dios stinneʼ, Santo stinneʼ, lii qué rátiluʼ» (Hab. 1:12).

4. ¿Xiñee cadi naquiiñeʼ chuʼnu xizaa pa raca nagana para laanu guiénenu qué gapa Jehová ra ruzulú ne ra riluxe?

⁴ ¿Ñee raca nagana para lii guiéneluʼ naca Jehová «ti Dios ni qué ziuu dxi guinitilú» la? (Is. 40:28). Pa zacá cazaacaluʼ, cadi lii si cazaacaluʼ ni. Ti biaje guníʼ Elihú qué rugaanda xpiaaniʼ binni guiene panda iza nabani Jehová (Job 36:26). Yanna, ¿ñee cadi tisi qué riénenu xiixa riníʼ nga cadi dxandíʼ ni la? Guzéʼtenu ti ejemplu, zándaca qué riénenu ximodo riáʼ biaaniʼ ne ximodo redandá ni dede ra nuunu, peru nánnanu nuuni. Zacaca nga laanu, zándaca qué riénenu xiñee qué gapa Jehová ra ruzulú ne ra riluxe. Peru ni dxandíʼ nga qué ziuu dxi guinitilube. Cadi guiaandaʼ laanu, cadi tisi qué riénenu xiixa cosa de Jehová riníʼ nga cadi dxandíʼ ni rusiidiʼ Biblia de laabe (Rom. 11:33-36). Ne laaca maca nuube ante chuʼ universu, ra nuu gubidxa ne xcaadxi beleguí. Biblia cayabi laanu: «Laabe nga bizaʼbe guidxilayú, bíʼnibe ni né poder stibe». Ne laaca nani: «Ni bichiaabe guibáʼ» (Jer. 51:15; Hech. 17:24). Guidúʼyanu sti cosa ni zacané laanu guni crenu zanda guibáninu sin qué chuʼ dxi gátinu.

GUYANU PARA GUIBÁNINU SIN QUÉ CHUʼ DXI GÁTINU

5. ¿Xi esperanza bidii Jehová primé hombre ne primé gunaa?

⁵ De lade guiráʼ cosa ni nabani ni bizáʼ Jehová lu Guidxilayú riʼ, binni si nga cudiibe esperanza de guibánicaʼ sin qué chuʼ dxi gáticaʼ. Peru maca gudxi Jehová Adán: «Cuananaxhi stiʼ yaga de guendananna ni jneza ne ni cadi jneza, cadi naquiiñeʼ goloʼ ni, purtiʼ dxi goloʼ ni, dxandíʼ peʼ zátiluʼ» (Gén. 2:17). Pa nuzuubaʼ Adán ne Eva stiidxaʼ Jehová, qué ñáticaʼ. Zándaca despué nudii Dios lugar ñócabe ni cá lu «yaga de guendanabani». Ngue nuluíʼ laacabe zabánicabe sin qué chuʼ dxi gáticabe (Gén. 3:22).b

6, 7. a) ¿Xi xcaadxi cosa racané laanu gánnanu cadi guyáʼ binni para gatiʼ? b) ¿Xi racaláʼdxiluʼ gúniluʼ ora maʼ guibániluʼ sin qué chuʼ dxi gátiluʼ? (Biiyaʼ ca imagen ca).

⁶ Lu investigación huayuni caadxi científicu huadxélacaʼ zanda guiaanané cerebru stinu stale información, jma de biaʼ guiráʼ información ni zanda guizíʼdinu lu xquendanabáninu. Lu iza 2010, ti revista ni caníʼ de ciencia de Estados Unidos bizeeteʼ, lu ti cálculo ni guca bihuinni zanda guni almacenar cerebru stinu biaʼ chupa millón arondaʼ de gigabyte. Zeeda gácani biaʼ ti videu de chonna millón de hora ne ninenu jma de chonna gayuaa iza para nidúʼyanu ni. Ne zándaca ninenu jma stale iza para niluxe nidúʼyanu ni. Ndiʼ rusihuinni, bizáʼ Jehová cerebru stinu para guiaanané stale información jma que biaʼ riaanané ni 70 ne 80 iza (Sal. 90:10).

⁷ Laaca bizáʼ Jehová laanu para chuuláʼdxinu guibáninu. Biblia ná: «Guluube tiempu ni qué gapa ra guiluxe ndaaniʼ ladxidóʼ binni» (Ecl. 3:11). Nga runi naca guendaguti enemigu stinu (1 Cor. 15:26). Guiníʼ íquenu ndiʼ. Ora rápanu ti guendahuará grave, riuunu ra nuu doctor para gudii medicina laanu ti guiándanu. Rúninu ca ni bizéʼtenu riʼ, purtiʼ qué racaláʼdxinu gátinu. Ne ora rati ti binni ni nadxiinu, pa joven laabe o pa maʼ huaniisibe, nabé riuubaʼ ladxidoʼno ne qué ridiʼdiʼ ga yuubaʼ ca (Juan 11:32, 33). Nánnanu nadxii Dios laanu purtiʼ pa ñaca nuzaʼbe laanu para ñátinu qué niguube ndaaniʼ ladxidoʼno deseu de nibáninu para siempre. Peru nuu xcaadxi razón ni zacané laanu guni crenu zanda guibáninu para siempre. Guidúʼyanu caadxi cosa ni maʼ biʼniʼ Jehová ne ni cayuni ni cusihuinni caʼruʼ guchaabe ni maʼ gudixhe íquebe gúnibe para binni.

CAʼRUʼ GUCHAA JEHOVÁ NI MAʼ GUDIXHE IQUE GUNI

8. ¿Xi cayabi Isaías 55:11 laanu de ni naguixhe ique Jehová guni?

⁸ Neca bichee Adán ne Eva ne pur nga rati guiráʼ ca xiiñicaʼ, caʼruʼ guchaa Jehová ni maʼ gudixhe ique guni (biindaʼ Isaías 55:11). Racaláʼdxirube guibani ca binni ni ruzuubaʼ diidxaʼ sin qué chuʼ dxi gáticaʼ. ¿Ximodo nánnanu ni yaʼ? Pur guiráʼ ca cosa ni maʼ guníʼ Jehová ne ni maʼ biʼniʼ para guni ni maʼ gudixhe ique.

9. ¿Xi maʼ guníʼ Dios zuni? (Daniel 12:2, 13).

⁹ Maʼ guníʼ Jehová zandisaʼ ca binni ni maʼ guti ne zudiibe laacaʼ oportunidad de guibánicaʼ sin qué chuʼ dxi gáticaʼ (Hech. 24:15; Tito 1:1, 2). Gunna dxichi Job guizáʼ maʼ racalaʼdxiʼ Jehová guindisaʼ ca binni ni maʼ guti (Job 14:14, 15). Ne profeta Daniel gunna zabani ca binni ni maʼ guti ne zápacaʼ oportunidad de guibánicaʼ sin qué chuʼ dxi gáticaʼ (Sal. 37:29; biindaʼ Daniel 12:2, 13). Ca judíu ni bibani tiempu stiʼ Jesús laaca gúnnacaʼ zanda gudii Jehová «guendanabani ni qué zaluxe» ca xpinni ni guzuubaʼ diidxaʼ (Luc. 10:25; 18:18). Stale biaje guníʼ Jesús de promesa riʼ ne laapebe gundisaʼ Bixhózebe de lade gueʼtuʼ (Mat. 19:29; 22:31, 32; Luc. 18:30; Juan 11:25).

10. Ra biasa binni de lade gueʼtuʼ dxiqué, ¿xi rusiidiʼ ni laanu? (Biiyaʼ dibuju).

¹⁰ Jehová nga rudii laanu guendanabani ne laasi zanda gusibani ca ni maʼ guti. Bidiibe poder profeta Elías para gusibani xiiñiʼ ti viuda de Sarepta (1 Rey. 17:21-23). Ra gudiʼdiʼ tiempu gucané Dios profeta Eliseo para gusibani xiiñiʼ ti gunaa de guidxi Sunem (2 Rey. 4:18-20, 34-37). Ca ejemplu riʼ ne xcaadxi ni riete lu Biblia, rusihuinni ca ni napa Jehová poder para gusibani ca binni ni maʼ guti. Ne dxi guyuu Jesús ndaaniʼ Guidxilayú riʼ bisihuinni bidii Bixhoze laa poder para gusibani binni ni maʼ guti (Juan 11:23-25, 43, 44). Yanna maʼ nuu Jesús guibáʼ ne «maʼ gucuaaʼ guiráʼ xixé autoridad guibáʼ ne lu guidxilayú». Nga runi zanda gusibánibe «guiráʼ ca ni nuu ndaaniʼ baʼ» ne gápacaʼ esperanza de guibánicaʼ para siempre (Mat. 28:18; Juan 5:25-29).

11. Ra gutiʼ Jesús pur laanu, ¿ximodo racané ni laanu guicaanu guendanabani ni qué zaluxe?

¹¹ ¿Xiñee bidii Jehová lugar guuticabe Xiiñiʼ yaʼ? Jesús bicabi pregunta riʼ ora guníʼ: «Nabé gunnaxhii Dios guidxilayú, nga runi bidii tobi lucha Xiiñiʼ, ti guiráʼ tu gapa fe Xiiñibe cadi guinitilú, sínuque guicaa guendanabani ni qué zaluxe» (Juan 3:16). Ra bidii Jehová gatiʼ Xiiñiʼ para gaca perdonar ca pecadu stinu cudiibe laanu oportunidad guicaanu guendanabani ni qué zaluxe (Mat. 20:28). Apóstol Pablo guníʼ ra guiasa binni ni maʼ guti laaca nácani parte de ni maʼ gudixhe ique Dios guni. Laa guníʼ: «Cásica pur ti hombre biuu guendaguti, zaqueca pur ti hombre zabani ca ni maʼ guti. Cásica rati guiráʼ binni pur Adán, zaqueca zabani guiráʼ binni pur Cristu» (1 Cor. 15:21, 22).

12. ¿Ximodo zuni Jehová ni naguixhe ique?

¹² Bisiidiʼ Jesús ca discípulo stiʼ guinábacaʼ lu oración gueeda Reinu stiʼ Dios ne gaca ni ná Bixhózebe lu Guidxilayú riʼ (Mat. 6:9, 10). Tobi de ca cosa ni racalaʼdxiʼ Jehová nga guibani binni lu Guidxilayú riʼ sin qué chuʼ dxi gáticaʼ. Ne para nga biʼniʼ Jehová Xiiñiʼ Rey lu Reinu ni nuu guibáʼ ne cucaalisaa 144,000 binni para gacanecaʼ Jesús gaca ni nabe (Apoc. 5:9, 10).

13. ¿Xi cayuni Jehová tiempu riʼ, ne xi naquiiñeʼ gúniluʼ?

¹³ Tiempu riʼ, cucaalisaa Jehová «stale binni» ne cusiidibe laacaʼ ximodo guibánicaʼ ora maʼ guni mandar Reinu stibe (Apoc. 7:9, 10; Sant. 2:8). Neca nanaláʼdxisaa binni ne ridíndecaʼ, ca ni naca parte de grupu riʼ rúnicaʼ stipa cadi gacananaláʼdxicaʼ binni. Zanda guininu maʼ cayúnicaʼ espada sticaʼ cubu ni ricá ruaa aradu (Miq. 4:3). Lugar de checaʼ lu guerra ra rati stale binni cayacanecaʼ stale binni guicaa «guendanabani, ni dxandíʼ guendanabani» ra gusiidicabe laacaʼ de Dios ni dxandíʼ ne ni naguixhe ique guni (1 Tim. 6:19). Cumu cayúnicabe ni ná Reinu stiʼ Dios la? zándaca gucaalú familia stícabe laacabe o guiaadxaʼ bueltu laacabe, peru Jehová rudii laacabe ni caquiiñecabe (Mat. 6:25, 30-33; Luc. 18:29, 30). Guiráʼ ndiʼ rusihuinni dxandíʼ nuu Reinu stiʼ Dios ne zúnini guiráʼ ni maʼ gudixhe ique Jehová guni.

GUIZÁʼ GALÁN ZABÁNINU

14, 15. ¿Ximodo zanitilú guendaguti casi maʼ biʼniʼ prometer Jehová?

¹⁴ Maʼ naca Jesús Rey lu Reinu stiʼ Dios ni nuu guibáʼ ne zúnibe guiráʼ ni maʼ guníʼ Jehová chiguni (2 Cor. 1:20). Dede lu iza 1914 maʼ cayuni mandarbe lade ca enemigu stibe (Sal. 110:1, 2). Maʼ cadi candaa zuni ganar Jesús ne 144,000 ca enemigu sticaʼ ne zunitilucaʼ laacabe (Apoc. 6:2).

¹⁵ Ora maʼ cayuni mandar Jesús lu ti mil iza, zusibánibe ca binni ni maʼ guti ne zacanebe guiráʼ binni ni ruzuubaʼ diidxaʼ gácacaʼ perfectu. Guiluxe si últimu prueba, ca binni ni guʼyaʼ Jehová runi ni jneza zacaacaʼ «guidxilayú ne zabánicaʼ luni para siempre» (Sal. 37:10, 11, 29). «Ne últimu enemigu guinitilú nga guendaguti» (1 Cor. 15:26). ¡Guizáʼ ziéchenu ora guizaaca ndiʼ!

16. ¿Xiñee rúninu ni ná Jehová?

¹⁶ Casi maʼ bidúʼyanu, lu Biblia nga zeeda esperanza ni nápanu. Ora riníʼ ni zanda guibáninu para siempre, racané ni laanu cadi guchéʼnenu Dios lu ca últimu dxi nagana riʼ. Peru pa racaláʼdxinu gusiéchenu Jehová cadi naquiiñeʼ guixélenu de laa ne de Jesús ne cadi gúninu ni para si gulanu xquendanabáninu, sínuque purtiʼ dxandíʼ nadxiinu laacabe (2 Cor. 5:14, 15). Guendarannaxhii ni nápanu laacabe zucaani laanu chinándanu ejemplu stícabe ne guinínenu binni de esperanza ni nápanu (Rom. 10:13-15). Ra jma gúninu stipa cadi guyúbinu puru si para laanu ne gudiʼnu de ni nápanu, jma ziuulaʼdxiʼ Jehová gaca xhamigu laanu (Heb. 13:16).

17. ¿Xi naquiiñeʼ guni cada tobi de laanu? (Mateo 7:13, 14).

¹⁷ Yanna, ¿laanu yaʼ? ¿Ñee zúninu stipa pur guibáninu para siempre la? Cudii Jehová laanu oportunidad ca, peru laanu nga naquiiñeʼ gúninu stipa cadi guireʼnu de lu neza ni zeʼ lu guendanabani (biindaʼ Mateo 7:13, 14). Yanna, ¿ximodo zabáninu ora guicaanu guendanabani ni qué zaluxe yaʼ? Zadúʼyanu ni lu sti artículo ca.