Ximodo zanda gápanu paz ora cadídinu lu guendanagana

1. ¿Xii nga «paz stiʼ» Dios, ne ximodo racané ni laanu? (Filipenses 4:6, 7).

NUU ti paz ni cadi guiráʼ binni runibiáʼ. Laani nga «paz stiʼ» Dios, ne nácani ti guendariuudxi ni rapa binni ni naca xhamigu Bixhózenu ni nuu guibáʼ. Ora nápanu paz stiʼ Dios, ratadxí ladxidoʼno (biindaʼ Filipenses 4:6, 7). Raca xhamígunu ca binni ni nadxii Jehová ne jma raca xhamígunu «Dios ni riguixhedxí ladxidoʼno» (1 Tes. 5:23). Rápanu paz stiʼ Dios ora runibiaʼnu Bixhózenu ni nuu guibáʼ, rápanu confianza laa, ne ruzúʼbanu stiidxaʼ. Ne paz ca riguixhedxí ni ladxidoʼno ora ridxaagalunu guendanagana.

2. ¿Xiñee nánnanu zanda gápanu paz stiʼ Dios?

² ¿Ñee dxandíʼ zanda gápanu paz stiʼ Dios ora cadídinu guendanagana la? ¿Ñee zanda chuʼdxí ladxidoʼno ora chuʼ xiixa epidemia, guizaaca xiixa cosa ni cadi cabézanu, tinde binni o sanándacabe laanu la? Zanda guchibi ca guendanagana riʼ binni. Peru Jesús bidii conseju riʼ ca discípulo stiʼ: «Cadi guiuubaʼ ladxidoʼto ne cadi guidxíbitu» (Juan 14:27). Stale hermanu ne hermana rinándacaʼ ni guníʼ Jesús. Huayacané Jehová laacabe gápacabe paz para gudxiilúcabe xiixa guendanagana.

GÁPANU PAZ ORA CHUʼ XIIXA EPIDEMIA

3. ¿Xi zándaca gueeda guizaacanu ora chuʼ xiixa epidemia o xiixa pandemia?

³ Ora chuʼ xiixa epidemia o ti pandemia zanda guchaani xquendanabáninu. Guiníʼ íquenu ximodo bininá pandemia stiʼ COVID-19 stale binni. Lu ti encuesta ni bíʼnicabe binni, stale de laacaʼ guniʼcaʼ lu pandemia riʼ guca nagana para laacaʼ gásicaʼ. Laaca guyuu stale binni ni gupa ansiedad ne depresión, guxúdxicaʼ ne gudúʼbacaʼ droga, guyuu guendaridinde ndaaniʼ familia ne guyuu tu gucalaʼdxiʼ ñuuti laca laa. Pa neza ra nabézaluʼ nuu epidemia, ¿xi zanda gúniluʼ para cadi chuʼ xhaataluʼ xizaa ne gápaluʼ paz stiʼ Dios yaʼ?

4. ¿Xiñee racané profecía ni guníʼ Jesús de ca últimu dxi gatadxí ladxidoʼno?

⁴ Jesús guníʼ lu ca últimu dxi ziuu epidemia «ti lugar ne sti lugar» (Luc. 21:11). Riguixhedxí ndiʼ ladxidoʼno. ¿Xiñee yaʼ? Purtiʼ maca nánnanu zazaaca ni. Cadúʼyanu cayaca cumplir ca cosa ni guníʼ Jesús. Nga runi rinándanu conseju ni bidiibe ca binni ni nabani lu ca últimu dxi. Laabe guniʼbe: «Lachuu cuidadu, cadi guidxíbitu» (Mat. 24:6).

5. a) Casi ná Filipenses 4:8, 9, ¿xi naquiiñeʼ guinábanu Jehová ora chuʼ xiixa epidemia? b) ¿Ximodo racané ca audio stiʼ Biblia laanu?

⁵ Ora chuʼ xiixa epidemia, zándaca chuʼnu xizaa ne guidxíbinu. Nga nga ni bizaaca ti hermana láʼ Desi.b Guti xtiube, xprímube ne doctor stibe de COVID-19, ngue runi bidxíbibe gaca contagiarbe ne guni contagiarbe jñaabe purtiʼ maʼ huaniisi. Laaca bidxíbibe guiaanabe sin dxiiñaʼ, ne guníʼ íquebe paraa cueebe bueltu para sibe ni gócabe ne quíxebe renta. Nabé guyuube xizaa pur ca cosa riʼ dede qué ñanda ñásibe. Peru gunda gúpabe paz. Purtiʼ biʼniʼ orarbe Jehová ne gunábabe laa gacané laabe gatadxí ladxidoʼbe ne guiníʼ íquebe cosa ni zacané laabe (biindaʼ Filipenses 4:8, 9). Para «gucaadiágabe» Jehová, binadiágabe audio stiʼ Biblia. Laabe guniʼbe: «Ratadxí ladxiduáʼ ora runadiagaʼ modo cayuundaʼ ca lector que ne rusietenaláʼdxini naa rizaalaʼdxiʼ Jehová naa» (Sal. 94:19).

6. ¿Ximodo racané estudiu personal ne ca reunión ca laanu?

⁶ Ora nuu epidemia, raca nagana para laanu gúninu cosa ni bíninu dxiqué. Peru cadi gudiʼnu lugar gucueeza ni laanu para cadi gápanu estudiu personal o chuunu reunión. Lu ca publicación ne videu ridxélanu experiencia stiʼ ca hermanu ni cadi caxélecaʼ de Jehová neca cadxaagalucaʼ guendanagana casi ca ni cadídinu (1 Ped. 5:9). Racané ca reunión ca laanu guiníʼ íquenu cosa ni zeeda lu Biblia ni zaguu gana laanu. Ne racané ca ni laanu cuʼnu gana xcaadxi binni ne uguucabe gana laanu (Rom. 1:11, 12). Pa guiníʼ íquenu ximodo huayacané Jehová ca xpinni ni huará, ni cadxibi o ni biʼniʼ sentir nuu stubi, zaca fe stinu jma naguidxi ne zuni crenu laaca zacanebe laanu.

7. ¿Ximodo zanda chinándanu ejemplu stiʼ apóstol Juan?

⁷ Gúninu stipa cadi guixélenu de ca hermanu stinu. Ora nuu epidemia o pandemia rucueeza ni laanu cadi chuʼpenu gaxha de ca hermanu stinu. Zándaca guni sentirnu casi biʼniʼ sentir apóstol Juan, purtiʼ laa gucalaʼdxiʼ guʼyaʼ xhamigu, Gayo (3 Juan 13, 14). Juan guníʼ guyuu ti tiempu qué ñanda ñuuyabe Gayo. Ngue runi bíʼnibe ni nuu lu nabe ne biseendabe ti carta ra nuu. Pa qué ganda guidúʼyanu ca hermanu stinu, zanda guinínenu laacabe o gúninu ti videollamada, o guséʼndanu ti mensaje ra nuucabe. Cadi guixélenu de ca hermanu, purtiʼ nga zacané laanu cadi guni sentirnu nuunu stúbinu ne zatadxí ladxidoʼno. ¿Xi gúninu pa nabé nuunu xizaa yaʼ? Guinínenu ca ancianu ne gudiʼnu lugar gacanécabe laanu (Is. 32:1, 2).

GÁPANU PAZ ORA GUIZAACA XIIXA NI CADI CABÉZANU

8. ¿Xi zándaca guni sentirnu ora guizaaca xiixa ni cadi cabézanu?

⁸ Zándaca maʼ xadxí de cayuubaʼ ladxidoʼloʼ purtiʼ bininá nisaguié ra lídxiluʼ, ti xu o gucuaguí ra lídxiluʼ. Ne pa maʼ guti tuuxa binni ni nadxiiluʼ o maʼ binítiluʼ ca cosa risaca nápaluʼ, zándaca chuʼluʼ triste ne dede guidxiichiluʼ. Peru qué riníʼ ndiʼ nadxiiluʼ ca cosa risaca nápaluʼ o qué gápaluʼ fe. Nagana nga ni bizaacaluʼ ne zándaca chuʼ tu guiníʼ ique nápaluʼ razón para guidxiichiluʼ ne chuʼluʼ triste (Job 1:11). Peru neca nabé nagana ra tídinu, zanda gápanu paz. Guidúʼyanu ximodo.

9. ¿Xi guníʼ Jesús ni zacané laanu chuʼnu listu ora guizaaca xiixa cosa ni cadi cabézanu?

⁹ Tiempu riʼ nuu caadxi binni riníʼ ique qué ziuu dxi guizaacacaʼ xiixa ni cadi cabézacaʼ. Peru qué riaandaʼ laanu xi guníʼ Jesús. Nánnanu ziuu stale desastre natural ne zándaca guniná ca ni laanu. Gudxi Jesús ca discípulo stiʼ ante gueeda fin «zaca xu roʼ» ne xcaadxi desastre (Luc. 21:11). Laaca guniʼbe zadale guendaquéiquiiñeʼ ne ridúʼyanu ni purtiʼ nuu stale binni ni ribaʼnaʼ, ridíndecaʼ ne nuu stale terrorismo (Mat. 24:12). Qué niníʼ Jesús zuniná ca cosa riʼ ca binni si ni qué runi ni ná Jehová. Stale de ca xpinni Dios huayuniná ca desastre ca laacaʼ (Is. 57:1; 2 Cor. 11:25). Zándaca qué zuni Jehová xiixa para gulá laanu de ca desastre, peru zudiibe laanu ni caquiiñenu para gápanu paz.

10. ¿Ximodo rusihuínninu nápanu fe ora raca prepararnu dede ante guizaaca xiixa cosa ni cadi cabézanu? (Proverbios 22:3).

¹⁰ Ora guizaaca xiixa cosa ni cadi cabézanu qué zadxíbinu pa guyuʼnu listu dede ante. Peru pa gúninu ni, ¿ñee culuinu qué gápanu confianza Jehová la? Coʼ. Purtiʼ pa laanu chuʼnu listu dede ante guizaaca xiixa cosa ni cadi cabézanu, culuinu nápanu fe zápabe laanu. Biblia peʼ cayabi laanu guiníʼ íquenu xi gúninu ora guidúʼyanu xiixa peligru (biindaʼ Proverbios 22:3). Ne riquiiñeʼ organización stiʼ Jehová ca artículo stiʼ ca revista, ca reunión ne ca anunciu, para gabi laanu naquiiñeʼ chuʼnu listu para gudxíʼlunu xiixa desastre.c ¿Xi zúninu pa nápanu confianza Jehová yaʼ? Zinándanu dede ca yanna ca conseju ca, ante guizaaca xiixa cosa ni cadi cabézanu.

11. ¿Xi rizíʼdinu de ni bizaaca Margaret?

¹¹ Guiníʼ íquenu ni bizaaca ti hermana láʼ Margaret. Gunabaʼ autoridad laabe guireebe de ra lídxibe purtiʼ cayaʼquiʼ ladu ra nabézabe. Cumu stale binni biree de ndaaniʼ guidxi que, ngue runi bidxii carretera que purtiʼ nabé stale carru nuu. Guizáʼ guyuu guʼxhuʼ, ngue runi maʼ qué ñanda niree Margaret de ndaaniʼ xcarru. Peru cumu guyuube listu dede ante la? bilabe. Ndaaniʼ cartera stibe nápabe ti mapa ni gucané guidxélabe sti neza para chebe. Maca runibiaʼbe neza que para ganda guireebe de ndaaniʼ guidxi que pa guizaaca xiixa cosa ni cadi cabézabe. Bilabe purtiʼ guyuube listu dede ante.

12. ¿Xiñee rinándanu ca instrucción ni rudiicabe laanu ora guizaaca xiixa emergencia?

¹² Para gapa ca autoridad ca laanu o quixhe chaahuicaʼ xi gúninu, nuu biaje zándaca guinábacabe laanu guiaananu ra lídxinu, guni mandárcabe laanu guireʼnu de ndaaniʼ guidxi ra nabézanu o gudiicabe laanu xcaadxi instrucción. Nuu binni qué riná chinanda ca instrucción riʼ, purtiʼ qué racaláʼdxicaʼ gusaanacaʼ ra lídxicaʼ. Peru ¿xi naquiiñeʼ guni ca xpinni Cristu yaʼ? Biblia cayabi laanu: «Laguzuubaʼ stiidxaʼ guiráʼ ca ni runi mandar, purtiʼ nga nga ni racalaʼdxiʼ Señor, pa nácabe rey ni jma risaca o pa nácabe gobernador ni ruseendaʼ rey» (1 Ped. 2:13, 14). Laaca rudii organización stiʼ Jehová laanu instrucción para gapa laanu. Gatigá rusietenaláʼdxicabe laanu gudiʼnu ca datu stinu ca ancianu para guiníʼnecaʼ laanu ora guizaaca xiixa emergencia. ¿Ñee maʼ bíninu ni la? Zándaca gudii organización laanu instrucción para guiaananu ra lídxinu, guireʼnu de ndaaniʼ guidxi ra nabézanu o para guyúbinu cosa ni tiidinenu dxi. Ne zándaca gábicabe laanu padxí ne ximodo zanda gacanenu xcaadxi. Pa qué guzúʼbanu diidxaʼ la? zaguʼnu xquendanabáninu ne xquendanabani ca ancianu lu peligru, ca hombre nachaʼhuiʼ ni rapa laanu (Heb. 13:17). Margaret guníʼ: «Ra yenandaʼ ca instrucción stiʼ ca ancianu ne stiʼ organización, bilá ni xquendanabaneʼ».

13. ¿Xi runi stale xpinni Cristu ni rusaana lidxi para cadi gusaana de chuʼcaʼ nayecheʼ ne gápacaʼ paz?

¹³ Stale hermanu rusaana lidxi pur xiixa desastre natural, pur guerra o pur ridinde binni lugar ra nabeza. Runi ca hermanu riʼ stipa guiaacaʼ lugar ra chindézacaʼ ne qué rusaana de gúnicaʼ ni ná Jehová. Qué rusaana de guni «predicarcaʼ ca noticia galán ni cá lu Stiidxaʼ Dios», cásica biʼniʼ ca primé xpinni Cristu dxi bisaanacaʼ lídxicaʼ pur canazananda binni laacaʼ (Hech. 8:4). Ora qué rusaana ca hermanu ca de guni predicarcaʼ, racané ni laacaʼ guiníʼ íquecaʼ ca ndaayaʼ ni chigueedané Reinu ne cadi guicá íquecaʼ ca guendanagana sticaʼ. Zacá riuucabe nayecheʼ ne rápacabe paz.

GÁPANU PAZ ORA SANÁNDACABE LAANU

14. ¿Xiñee zándaca maʼ qué zápanu paz ora sanándacabe laanu?

¹⁴ Ora rizananda binni laanu, zándaca maʼ qué zúninu cosa ni riuuláʼdxinu gúninu ni racané laanu gápanu paz ne chuʼnu nayecheʼ, casi chuunu reunión, guni predicarnu sin chuʼ tu gucueeza laanu ne gúninu xcaadxi cosa sin guidxíbinu guinaazeʼ ca autoridad laanu. Pa maʼ qué ganda gúninu ca cosa riʼ, zándaca chuʼnu xizaa ne guiníʼ íquenu xi guizaaca despué. Ne cadi malu diʼ nga guni sentirnu zacá. Peru naquiiñeʼ gápanu cuidadu cadi guirá fe stinu ora sanándacabe laanu casi gudxi Jesús ca discípulo stiʼ (Juan 16:1, 2). Yanna, ¿xi zanda gúninu para gápanu paz ora sanándacabe laanu yaʼ?

15. ¿Xiñee cadi naquiiñeʼ guidxíbinu ora sanándacabe laanu? (Juan 15:20; 16:33).

¹⁵ Stiidxaʼ Dios cayabi laanu: «Guiráʼ ca ni racalaʼdxiʼ chuʼ tobi si né Cristu Jesús ne ca ni racalaʼdxiʼ guni adorar Dios, laaca zazanándacabe laacaʼ» (2 Tim. 3:12). Ti hermanu ni láʼ Andréi, guca nagana para laa chinanda ca diidxaʼ ca dxi bicueeza gobiernu dxiiñaʼ stinu ndaaniʼ guidxi ra nabeza. Sicaríʼ guníʼ íquebe: «Nabeza stale Testigu raríʼ, nagana guinaazecabe guiradu». Qué niguixhedxí ndiʼ ladxidoʼbe, sínuque siempre guyuube xizaa. Peru guyuu xcaadxi hermanu de lugar que, bisaanacaʼ ca cosa que lu náʼ Jehová ne qué niníʼ íquecaʼ qué ziuu dxi guinaazecabe laacaʼ. Nánnacabe zándaca gueeda guizaaca ni ne qué ñuucabe xizaa casi Andréi. Ngue runi, gudixhe ique Andréi chinanda ejemplu stícabe ne gapa confianza Dios. Qué nindaa, gutadxí ladxidoʼbe ne yanna nabánibe nayecheʼ neca nuu guendanagana. Laanu laacaʼ zándaca guni sentirnu zacá. Dxandíʼ nga guníʼ Jesús zazanándacabe laanu, peru laaca guniʼbe zanda gudxíʼlunu ni sin guchéʼnenu Jehová (biindaʼ Juan 15:20; 16:33).

16. ¿Xi instrucción naquiiñeʼ chinándanu ora sanándacabe laanu?

¹⁶ Ora rucueeza gobiernu dxiiñaʼ ni rúninu, zándaca gudii sucursal o ca ancianu laanu instrucción para gápacaʼ laanu, guicaanu guendaró espiritual ne para guni predicarnu biaʼ ganda. Pa guizaaca nga la? galán guzúʼbanu diidxaʼ dede ora cadi cayénenu xiñee cudiicabe laanu ca instrucción ca (Sant. 3:17). Ne qué chuʼ dxi gudiʼnu información de ca hermanu stinu o de ca cosa ni raca ndaaniʼ congregación ca binni ni cadi naquiiñeʼ ganna ni (Ecl. 3:7).

17. Cásica ca apóstol, ¿xi maʼ gudixhe íquenu gúninu?

¹⁷ Tobi de cosa ni rucaa Binidxabaʼ gucaalú xquidxi Dios nga purtiʼ biaananenu dxiiñaʼ de gudiʼnu «testimonio de Jesús» (Apoc. 12:17). Cadi gudiʼnu lugar guchibi Binidxabaʼ ne ca xpinni laanu, guizáʼ riuʼnu nayecheʼ ne rápanu paz ora runi predicarnu ne rusíʼdinu binni ni dxandíʼ de Dios neca gucaalucaʼ laanu. Lu primé siglu que, ora biʼniʼ mandar ca autoridad stiʼ ca judíu ca apóstol gusaana de guni predicarcaʼ, bizuubaʼ ca apóstol que stiidxaʼ Dios ne qué ninacaʼ nucheenecaʼ laabe. Qué nusaana de ñuni predicarcaʼ ne guizáʼ guyuucaʼ nayecheʼ (Hech. 5:27-29, 41, 42). Peru ora rucueeza gobiernu dxiiñaʼ stinu, naquiiñeʼ guni predicarnu né stale cuidadu (Mat. 10:16). Pa gúninu stipa gúninu ni, zápanu paz purtiʼ cusiéchenu Jehová ne cayacanenu binni guilá.

«DIOS NI RIGUIXHEDXÍ LADXIDOʼNO ZAGUU NDAAYAʼ LAATU»

18. ¿Padé zeeda paz ni caquiiñenu?

¹⁸ Cadi guiaandaʼ laanu neca tídinu ra jma nagana zanda gápanu paz. Ne óraca naquiiñeʼ gánnanu zanda gápanu paz, peru paz ni rudii Dios laanu. Gápanu confianza Jehová ora chuʼ epidemia, guizaaca xiixa cosa ni cadi cabézanu o sananda binni laanu. Cadi guixélenu de organización stibe ne guiníʼ íquenu ca ndaayaʼ sicarú ni chigudiibe laanu. Pa gúninu ni, «Dios ni riguixhedxí ladxidoʼno» qué zaxeleʼ de laanu (Filip. 4:9). Lu sti artículo ca zadúʼyanu xi zanda gúninu para gacanenu ca hermanu stinu gápacaʼ paz stiʼ Dios ora cadíʼdicaʼ lu guendanagana.