1 | Oración Lagulaa «guiráʼ ni riguu xizaa laatu luguiabe»

NI NÁ BIBLIA: «Laga culaatu guiráʼ ni riguu xizaa laatu luguiabe, purtiʼ rizaaláʼdxibe laatu» (1 PEDRO 5:7).

¿Xi riníʼ ni?

Canabaʼ Jehová laanu gábinu laa intiica guendanagana nápanu o ni naguu xizaa laanu (Salmo 55:22). Zucaadiaga Dios laanu, gastiʼ naca pa naroʼbaʼ o pa nahuiiniʼ guendanagana ni nápanu. Pa caguu ni xizaa laanu la? laaca caguu ni xizaa Jehová. Oración ca nga primé cosa ni caquiiñeʼ gúninu para gatadxí guendabiaaniʼ stinu (Filipenses 4:6, 7).

¿Ximodo racané ni laanu?

Ora cayuniná xiixa guendahuará guendabiaaniʼ stinu la? zándaca guni sentirnu nuunu stúbinu. Ne nuu binni qué ziene diʼ ni cazaacanu (Proverbios 14:10). Peru zanda gábinu Dios xi guiráʼ cayuni sentirnu purtiʼ riénebe laanu ne rucaadiágabe laanu né stale paciencia. Cayuuyadxí Jehová laanu, guidubi ora cayuuyabe ca yuubaʼ cadídinu, nánnabe xi cudxíʼlunu, nga runi canábabe laanu guni orarnu laabe ora nuu intiica si cosa ni caguu xizaa laanu (2 Crónicas 6:29, 30).

Ora runi orarnu Jehová, jmaruʼ si runi crenu zanda gápabe laanu. Zacá zanda guininu ni guníʼ ti hombre bicaa Biblia, sicaríʼ gúdxibe Dios: «Maʼ biiyaluʼ guendananá stinneʼ; maʼ nannuʼ xi guiráʼ yuubaʼ cadideʼ» (Salmo 31:7). Ora maʼ biénenu nanna Jehová xi cazaacanu la? zudii nga stipa laanu para cadi gusaba ca guendanagana ca laanu. Cadi ruuyadxísibe xi yuubaʼ cadídinu. Laabe nga ni jma riene xi cazaacanu ne zanda gacanebe laanu gatadxí ladxidoʼno ne chuʼnu gana ora guidúʼndanu ni zeeda lu Biblia.

Ximodo cayacané Biblia Julián

Ximodo cayuniná guendahuará ni láʼ ansiedad naa

«Rudxieeluáʼ guendahuará ni láʼ ansiedad ne runeʼ stipa cadi guiníʼ iqueʼ cosa ni riguu xizaa naa. Nabé ridxibeʼ o riuaaʼ xizaa ne racaʼ ni ora peʼ cadi cabezaʼ ni. Nuu biaje nuaacaʼ galán, peru málasi ruzuluáʼ ridxibeʼ. Jma racaʼ ni ora nuaaʼ lade binni purtiʼ nabé riuaaʼ xizaa xi guiníʼcabe de naa.

»Ca ni maʼ nanna xi rizaacaʼ rúnicaʼ stipa gacanecaʼ naa. Nuu biaje riniʼcaʼ xiixa ni huaxiéʼ racané naa, peru de guidubi ladxiduáʼ rudieeʼ xquixe peʼ laacabe purtiʼ rúnicabe stipa gacanécabe naa chuaaʼ jma galán.

»Nuu biaje raca nagana para naa guneʼ oración pur ca guendahuará ni napaʼ. Runeʼ stipa quixhedxieʼ guendabiaaniʼ stinneʼ para ganda guinieniaʼ Jehová. Riraruʼ ni maʼ caníʼ iqueʼ dede maʼ qué rannaʼ xi cayuneʼ. Ne ora qué randa quixhedxieʼ ni riníʼ iqueʼ la? raca nagana para naa gabeʼ Jehová ni caníʼ iqueʼ ne xi cayuneʼ sentir».

Ximodo cayacané Biblia naa

«Biziideʼ lu Biblia cadi caquiiñeʼ diʼ guindaa ca oración ni guneʼ o gutaleʼ diidxaʼ para chuulaʼdxiʼ Dios ni canieeʼ. Nuu biaje, ora qué guidxelaʼ ximodo gabeʼ Jehová xi cayuneʼ sentir, ni rinieeʼ siaʼ nga: “Jehová, gucané naa”. Neca ngasi randa rinieeʼ, peru runeʼ sentir nanna Jehová xi cazaacaʼ ne rudiibe naa ni caquiiñeʼ óraque. Neca runeʼ oración, peru laaca maʼ biyubeʼ gudii ti doctor naa ti tratamientu. Racané guiropaʼ cosa ca naa chuaaʼ nayecheʼ ne guneʼ sentir jma galán. Neca runeʼ stale stipa para ganda chuaaʼ gaxha de Bixhozeʼ ni nuu guibáʼ, runeʼ ni purtiʼ nannaʼ dxandíʼ peʼ nadxiibe naa ne racaláʼdxibe gacanebe naa».