2 | «Quixhedxí Stiidxaʼ Dios ladxidoʼno»

NI NÁ BIBLIA: «Purtiʼ guiráʼ ni gucuá dxiqué, gucuá ni para gusiidiʼ ni laanu, ti ora guni huantarnu ne quixhedxí Stiidxaʼ Dios ladxidoʼno la? gápanu esperanza» (ROMANOS 15:4).

¿Xi riníʼ ni?

Racané Biblia laanu gánnanu xi gúninu para gatadxí ladxidoʼno, laaca racané ni laanu guni huantarnu ne rudii ni stipa laanu para gucáʼnanu ca cosa ni zanda guniná guendabiaaniʼ stinu. Laaca rabi Biblia laanu maʼ cadi candaa zaree ca guendahuará ni runiná sentimientu stinu.

¿Ximodo racané ni laanu?

Normal nga guni sentirnu triste o chuʼnu xizaa, peru ca ni napa ti guendahuará casi depresión o ansiedad la? guiráʼ dxi nga runi sentírcabe zacá. ¿Ximodo zanda gacané Biblia laacabe yaʼ?

Lu Biblia zeeda stale diidxaʼ ni zaguu gana laanu ne ni zacané laanu cueenu ca cosa ni cayuniná guendabiaaniʼ stinu (Filipenses 4:8). Zanda gacané Biblia laanu para cuʼnu cosa ndaaniʼ íquenu ni gacané laanu gatadxí guendabiaaniʼ stinu ne guni sentirnu jma galán (Salmo 94:18, 19).
Racané Biblia laanu para cadi guni sentirnu qué risácanu (Lucas 12:6, 7).
Lu Biblia zeeda stale historia ni rusihuinni cadi nuunu stúbinu, nuu ti Dios ni bizáʼ laanu ne laa dxandíʼ peʼ riene ni cazaacanu (Salmo 34:18; 1 Juan 3:19, 20).
Lu Biblia cayabi Dios laanu zedandá dxi maʼ qué lica zietenaláʼdxinu guiráʼ ni cayuniná laanu yanna (Isaías 65:17; Apocalipsis 21:4). Pa yanna peʼ cayuniná xiixa guendahuará guendabiaaniʼ stinu o runi sentirnu xiixa ni ruchibi laanu la? zudii ca diidxaʼ ca stipa laanu para cadi gusaba ni laanu.

Ximodo cayacané Biblia Jessica

Ximodo cayuniná depresión naa

«Dxi napaʼ 25 iza, nabé nadipaʼ modo bininá nerviu naa ne biiyacabe napaʼ depresión grave. Nabé racanaʼyaʼ ora guietenaladxeʼ guiráʼ ni bizaacaʼ ne qué randa rucueezaʼ ca ni. Bisiene ca doctor que naa pur guiráʼ ni bizaacaʼ dxiqué, maʼ puru cosa triste riníʼ iqueʼ ne pur laani napaʼ depresión. Gupa xidé guyaaʼ ra nuu doctor para gudii naa ti tratamientu ne guyaaʼ ra nuu ti especialista ni gucané naa para cadi guiníʼ iqueʼ cosa ni runiná naa».

Ximodo cayacané Biblia naa

«Dxi jma nadipaʼ naaze depresión que naa, nisi maʼ cadxibeʼ stubeʼ, nabé riuaaʼ xizaa ne qué randa raseʼ. Stale biaje qué randa raseʼ purtiʼ riníʼ iqueʼ cosa ni ruchibi naa ne qué ridiʼdigá ni. Peru casi ná Salmo 94:19, riguixhedxí Dios ladxidoʼno ne racané laanu cadi guidxíbinu ora jma nadipaʼ nuu ca guendanagana cadxaagalunu. Ngue runi cueʼ cama stinneʼ gupaʼ ti Biblia ne ti cuadernuhuiiniʼ ra cá caadxi textu ni riguu gana naa. Ne ora qué ganda gaseʼ, rudieeʼ lugar quixhedxí Dios ladxiduáʼ né Stiidxaʼ.

»Racané Biblia laanu para cadi guiníʼ íquenu caadxi cosa ni cadi dxandíʼ de Dios. Casi dxiqué la? guníʼ iqueʼ qué lica risacaʼ ne guirutiʼ cadi naquiiñeʼ gannaxhii naa. Peru bidieeʼ cuenta cadi nga diʼ nga ni rusiidiʼ Biblia. Lu Biblia riete naca Dios Bixhózenu ni nadxii laanu, riá laanu ne rizaalaʼdxiʼ cada tobi de laanu. Chaahuidugá chaahuidugá maʼ randa rucueezaʼ ni riníʼ iqueʼ ne maʼ qué runiná peʼ ca ni naa. Yanna huaxa maʼ bieneʼ dxandíʼ risacaʼ ne zacá nga ruuyaʼ Dios naa. Nga racané naa para maʼ cadi guiníʼ iqueʼ qué risacaʼ casi bineʼ ni dxiqué.

»Nabé maʼ racalaʼdxeʼ guedandá dxi maʼ cadi guniná guiráʼ ni bizaacanu ne ni riníʼ íquenu laanu. Nannaʼ maʼ cadi candaa zaree guiráʼ guendahuará ni runiná guendabiaaniʼ stiʼ binni, ne nga nga ni rudii stipa naa para gudxieeluáʼ guendahuará stinneʼ hasta dxi guedandá dxi sicarú ra maʼ cadi gudxieeluáʼ depresión ni cayuniná naa».