3 | Ni bizaaca caadxi binni riete lu Biblia

LU BIBLIA RIETE: Guyuu caadxi binni nachaʼhuiʼ ni gupa «sentimientu cásica laanu» (SANTIAGO 5:17).

¿Xi riníʼ ni?

Lu Biblia riete ni bizaaca stale hombre ne gunaa ni dxandíʼ bibani ne ni biʼniʼ sentir stale cosa. Pa guidúʼndanu ni bizaacacabe la? zándaca zadúʼyanu nuu tuuxa ni gudiʼdiʼ ra peʼ cadídinu.

¿Ximodo racané ni laanu?

Guiranu riuuláʼdxinu guiénecabe modo cayuni sentirnu, jmaruʼ si ora cudxíʼlunu ti guendahuará ni cayuniná guendabiaaniʼ stinu. Zándaca ra gúʼndaluʼ ni biʼniʼ sentir ne ni guníʼ ique chupa chonna binni bibani tiempu gucuá Biblia, zudiiluʼ cuenta ngaca ni cazaacaluʼ. Zacané ndiʼ laanu gudiʼnu cuenta nuuruʼ tu huadxiilú ansiedad o sti tipu guendahuará ni runiná guendabiaaniʼ stiʼ binni.

Rabi Biblia laanu xi guníʼ chupa chonna hombre dxi maʼ qué guidxélacaʼ xi gúnicaʼ ne maʼ birá stipa sticaʼ. ¿Ñee huayuu dxi guiníʼ íqueluʼ: «Maʼ qué ganda diʼ naa, maʼ bixhacaladxeʼ modo nabaneʼ riʼ»? Zacá peʼ nga guníʼ ique Moisés, Elías ne David (Números 11:14; 1 Reyes 19:4; Salmo 55:4).
Laaca ruzeeteʼ Biblia de Ana, ti gunaa ni nabé biuubaʼ ladxidóʼ purtiʼ qué ganda gapa xiiñiʼ, guyuu sti gunaa ni rucaalú laabe ne nabé feu modo runi burla laabe (1 Samuel 1:6, 10).
Zándaca cazaacaluʼ ni bizaaca Job, ti hombre ni riete lu Biblia. Neca gupa hombre riʼ stale fe, nabé guyuube xizaa dede guniʼbe: «Maʼ bixhacalaʼdxeʼ guendanabani stinneʼ, maʼ qué racalaʼdxeʼ guibaneʼ» (Job 7:16).

Gunda bisaana ca binni riʼ de guiníʼ íquecaʼ cosa ni runiná laacaʼ. Laaca zápanu stipa pa gúninu casi bíʼnicabe.

Ximodo cayacané Biblia Kevin

Ximodo runiná guendahuará ni láʼ trastorno bipolar naa

«Gúdxicabe naa napaʼ guendahuará ca dxi mayaca gusaaʼ 50 iza. Nuu biaje runeʼ sentir zanda guneʼ intiica si cosa, peru laaca nuu biaje riníʼ iqueʼ maʼ xi para nabaneʼ».

Ximodo cayacané Biblia naa

«Casi peʼ naa nga guca apóstol Pedro. Guyuu biaje guníʼ íquebe maʼ qué risácabe purtiʼ nabé bicheebe. Peru lugar de niníʼ íquebe puru si ca cosa ni cadi galán que la? biyúbibe ca xhamígube para gacanecaʼ laabe. Pur guendahuará ni napaʼ riʼ, nuu dxi guizáʼ feu runeʼ sentir, nisi ra rucheeʼ maʼ caníʼ iqueʼ ne runeʼ sentir qué risacaʼ. Peru casi Pedro, laaca maʼ biziideʼ chaahuiʼ chaahuiʼ guyubeʼ ca xhamiguaʼ para gacanecaʼ naa ora cadideʼ ra nagana. Nabé huayacanécabe naa para cadi gusaba guendahuará ca naa ne gudxieeluáʼ ni.

»Laaca riníʼ iqueʼ ximodo biʼniʼ sentir rey David. Stale biaje biʼniʼ sentirbe triste pur ni cazaacabe ne biuu yuubaʼ ladxidoʼbe pur guiráʼ cosa ni cadi jneza bíʼnibe. Zacaca nga runeʼ sentir nuu tiru: riuu yuubaʼ ladxiduáʼ pur xiixa ni bineʼ o ni gunieeʼ. Nga runi ratadxí ladxiduáʼ ora guundaʼ ni bicaa David lu Salmo 51. Ndiʼ nga ni guniʼbe lu versículo 3: “Purtiʼ nannaʼ gunáʼ nga ca pecadu stinneʼ ne guiráʼ dxi nuu pecadu stinneʼ ndaaniʼ iqueʼ”. Zacá peʼ nga runeʼ sentir ora maʼ cayuniná depresión ca naa, para naa gastiʼ nin ti cosa galán. Óraca nga riníʼ iqueʼ ca diidxaʼ ni guníʼ David lu versículo 10: “Biʼniʼ ladxiduáʼ nayá Dios, ne guluu ti espíritu cubi luguiaʼyaʼ, ti espíritu ni cadi gusaana naa”. Zacagá nga ti cosa ni nabé rinabaʼ Dios: rinabaʼ laabe gacanebe naa chuaaʼ nayecheʼ né modo nabaneʼ riʼ. Ne últimu, nabé riguixhedxí versículo 17 ladxiduáʼ: Nani: “Dios stinneʼ, cadi gucaanaluʼ ti ladxidóʼ ni maʼ gucadé ne ni maʼ bitaadxiʼ”. Cada biaje guundaʼ ni, rietenalaʼdxeʼ nadxii Jehová naa.

»Ora riníʼ iqueʼ guiráʼ ni bizaaca ca binni ni riete lu Biblia ne guiráʼ ni maʼ bidii Dios naa la? jmaruʼ si runeʼ cré zaca chaahuiʼ modo nabaneʼ. Cudxieeluáʼ ca guendanagana stinneʼ ne cadi careeʼ gana purtiʼ para naa dxandíʼ guiráʼ promesa zeeda lu Biblia».