Runeʼ sentir seguru purtiʼ napaʼ confianza Jehová

MODO BINEBIAʼYAʼ JEHOVÁ NE GUPAʼ CONFIANZA LAA

Guleʼ lu iza 1948, ndaaniʼ ti guidxihuiiniʼ ni riaana ladu suroeste stiʼ Nigeria. Lu ca iza que guca Moustapha, ti biʼchiʼ bixhozeʼ ni jma nahuiiniʼ, testigu stiʼ Jehová ne zaqueca Wuhabi, ti bicheʼ ni jma huaniisi. Dxi napaʼ gaʼ iza guti bixhozeʼ ne guizáʼ bininá ngue naa. Gudxi Wuhabi naa zadúʼyadu bixhozeʼ sti biaje ora guiasa de lade gueʼtuʼ. Ra guníʼ iqueʼ esperanza sicarú riʼ, guluu ni gana naa guneʼ estudiar Biblia. Guyuaanisaʼ lu iza 1963, ne laaca guca xhonna bicheʼ Testigu.

Lu iza 1965 yendezaʼ Lagos, raqué nabeza Wilson, tobi de ca bicheʼ ni huaniisi. Galán guyuʼdu raqué né caadxi precursor regular de congregación Igbobi. Cumu biiyaʼ guizáʼ nayecheʼ nuucabe ne guizáʼ nuucabe gana la? gudixheʼ iqueʼ gacaʼ precursor lu beeu enero iza 1968.

Ti hermanu ni cayuni dxiiñaʼ Betel láʼ Albert Olugbebi, biʼniʼ ti reunión né ca joven para gábibe laadu caquiiñeʼ precursor especial ladu guiaʼ stiʼ Nigeria. Dede yanna rietenalaʼdxeʼ ca diidxaʼ ni guníʼ hermanu Olugbebi, sicaríʼ guniʼbe: «Joven ruʼ laatu ne zanda iquiiñetu tiempu ne stipa stitu para gúnitu ni ná Jehová. Guizáʼ nuu dxiiñaʼ gúnitu raqué». Cumu nuaaʼ gacaʼ casi profeta Isaías, ne chaaʼ ra guseendaʼ Jehová naa la? bichayaʼ solicitud stinneʼ (Is. 6:8).

Lu beeu mayo iza 1968, biseendacabe naa casi precursor especial ndaaniʼ guidxi Kano, ti lugar riaana ladu guiaʼ stiʼ Nigeria. Tiempu que peʼ cayaca guerra Biafra, bizuluni lu iza 1967 ne bilúxeni lu iza 1970. Guizáʼ bininá guerra que lugar riʼ, ne despué maʼ bininá ni ladu rindani gubidxa stiʼ Nigeria. Gucalaʼdxiʼ ti hermanu nucueeza naa para cadi ñaaʼ Kano, purtiʼ qué racaláʼdxibe gacanaʼyaʼ. Peru gudxeʼ laabe: «Xquixe peʼ lii, nannaʼ riuuluʼ xizaa pur naa, peru pa Jehová ná chaaʼ racá la? nannaʼ qué zusaanabe naa stubeʼ».

GUPAʼ CONFIANZA JEHOVÁ TI LUGAR RA BININÁ GUERRA

Guizáʼ triste guiráʼ ni biiyaʼ ora yendayaʼ guidxi Kano. Guizáʼ feu modo bininá guerra que lugar riʼ. Nuu biaje ora maʼ ziguni predicardu, ridúʼyadu ca binni ni maʼ biiticabe lu guerra que. Neca guyuu stale congregación ndaaniʼ guidxi Kano la? peru stale hermanu bixooñecaʼ de raqué. Biaʼ sti 15 si publicador biaana ndaaniʼ guidxi riʼ, peru maʼ cadxíbicabe ne maʼ careecabe gana. ¡Guizáʼ biéchecabe ora yendadu raqué, purtiʼ nácadu xhoopaʼ precursor especial! Guluʼdu gana laacabe ne guizáʼ gucané ni laacabe. Gucanedu laacabe para gúnicabe reunión sti biaje, guni predicárcabe, guseendacabe informe stícabe ra sucursal ne guinábacabe publicación.

Guiráʼ ca precursor especial bizulú biziidicaʼ idioma hausa. Cumu lu stiidxaʼ ca binni que runi predicardu laacaʼ la? stale de laacaʼ bicaadiágacaʼ laadu. Peru caadxi de ca binni ni rié ndaaniʼ religión stiʼ guidxi que, qué ñuuláʼdxicaʼ ora bíʼyacaʼ cayuni predicardu, ngue runi gúpadu stale cuidadu. Ti dxi guzananda ti hombre naaze ti gudxíu naa ne ti xcompañeruaʼ. Peru ni galán nga jma nagueenda bixóʼñedu que laabe. Neca guyuu stale peligru la? gucané Jehová laadu guni sentirdu seguru casi ná Salmo 4:8. Ne chaahuiʼ chaahuiʼ maʼ bidale publicador raqué. Tiempu riʼ, nuu 11 congregación ndaaniʼ guidxi Kano, ne nuu jma de gaayuʼ gayuaa publicador raqué.

GUZANÁNDACABE LAADU NÍGER

Lu beeu agosto iza 1968, chupa chonna beeu de yendayaʼ Kano, biseendacabe naa ne chupa precursor especial Niamey, capital stiʼ República de Níger, ni nuu África Occidental. Casi peʼ yendadu raqué bidiʼdu cuenta, Níger nga tobi de ca lugar ni jma nandáʼ ni nuu lu guidubi Guidxilayú. Cadi caquiiñeʼ si guiaʼdu calor que, sínuque gupa xidé bizíʼdidu francés, diidxaʼ riníʼcabe lugar que. Neca gúcani nagana, peru gúpadu confianza Jehová ne bizulú biʼniʼ predicardu ne caadxi publicador de lugar que ndaaniʼ guidxi riʼ. Casi guiráʼ binni de Niamey ni nanna guʼndaʼ gúpacaʼ libru ni biquíʼñenu para gusíʼdinu binni de lu Biblia: La verdad que lleva a la vida eterna. Dede guyé binni yeyubi laadu para gudiʼdu laa tobi.

Qué nindaa bidiʼdu cuenta qué riuulaʼdxiʼ ca autoridad que ca testigu stiʼ Jehová. Lu beeu julio iza 1969 bínidu primé asamblea de circuito ndaaniʼ guidxi que ne guyé biaʼ gande binni. Guizáʼ cayéchedu purtiʼ chichuunisa chupa publicador. Peru primé dxi cayaca asamblea que beeda policía ne bicueeza programa que, ne zinecaʼ superintendente de circuito ne ca precursor especial ra estación sticaʼ. Bíʼnicabe laadu stale pregunta raqué, ne gúdxicabe laadu guibiguétadu sti dxi que. Cumu maʼ bidiʼdu cuenta západu problema né ca autoridad que la? maʼ ndaaniʼ ti yoo guyuu discursu para ca ni chichuunisa ne despué guyuunísacabe ndaaniʼ ti guiiguʼ, ti cadi ganna peʼ binni.

Chupa chonna semana despué, guladxi ca autoridad stiʼ guidxi que naa ne xcaayuʼ precursor especial. Bidiicabe laadu 48 hora para guireʼdu de Níger ne maʼ laadu gúʼyadu pora guireʼdu de raqué. Bizúʼbadu diidxaʼ ne guyuudu ra sucursal stiʼ Nigeria. De raqué biseendacabe laadu xcaadxi lugar.

Naa la? biseendacabe naa ti guidxi stiʼ Nigeria láʼ Orisunbare. Raqué galán bineʼ predicarniáʼ ti grupuhuiiniʼ de publicador ni nuu lugar que, ne biindaniáʼ chupa chonna binni de lu Biblia. Peru xhoopaʼ beeu despué, biʼniʼ invitar sucursal naa guibiguetaʼ Níger, peru biaje riʼ la? maʼ stubeʼ siaʼ. Guizáʼ bidxagayaaʼ ora gucuaaʼ invitación riʼ ne guyuaaʼ nervioso, peru ni dxandíʼ la? guizáʼ nuaaʼ guuyaʼ ca hermanu de Níger sti biaje.

Biguetaʼ Niamey sti biaje. Ti dxi despué de yendayaʼ raqué, bidii ti empresariu de Nigeria cuenta nacaʼ testigu stiʼ Jehová ne bizulube bíʼnibe naa jma pregunta de lu Biblia. Bisiideʼ laabe de lu Biblia, ne bisaanasibe de cúbabe gueza ne xhúdxibe la? guyuunísabe. Despué gupaʼ privilegiu de guneʼ predicar xcaadxi lugar stiʼ Níger ne biiyaʼ ximodo chaahuidugá maʼ guyuulaʼdxiʼ binni guiziidiʼ de lu Stiidxaʼ Dios. Dxi yendayaʼ Níger nuu 31 Testigu ne dxi ziaaʼ de raqué maʼ nuu 69.

«QUÉ GÁNNADU XIMODO PEʼ ZEʼ DXIIÑAʼ STINU NDAANIʼ GUIDXI GUINEA»

Lu beeu diciembre iza 1977, biguetaʼ Nigeria para guicaaʼ ti capacitación de chonna semana. Biluxe si capacitación que, bidii Malcolm Vigo, coordinador stiʼ Comité de Sucursal, naa ti carta ni biseendacabe de Sierra Leona. Cuyubi ca hermanu que ti precursor solteru, nazaaca ne ni riníʼ inglés ne francés para gaca superintendente de circuito ndaaniʼ guidxi Guinea-Conakri. Gudxi hermanu Vigo naa pur ngue nga biʼniʼ invitárcabe naa guicaaʼ capacitación que. Bisiénebe naa cadi fácil guneʼ dxiiñaʼ cudiicabe naa que ne gúdxibe naa: «Guníʼ ique chaahuiʼ ante guicaaluʼ dxiiñaʼ riʼ». Peru qué lica niníʼ iqueʼ ni chupa biaje ne gudxeʼ laabe: «Cumu Jehová nga cuseendaʼ naa la? ziaaʼ».

Guyaaʼ Sierra Leona lu avión, ne gupaʼ ti reunión né ca hermanu de sucursal. Tobi de ca hermanu ni nuu lu Comité de Sucursal que gudxi naa: «Qué gánnadu ximodo peʼ zeʼ dxiiñaʼ stinu ndaaniʼ guidxi Guinea». Neca sucursal que nga ruuyaʼ dxiiñaʼ ni raca Guinea la? peru qué ganda guiniʼnécabe ca publicador ni nuu raqué, purtiʼ guizáʼ nadipaʼ modo nuu política ndaaniʼ guidxi que. Stale biaje gucaláʼdxicabe nuseendacabe ti representante stiʼ organización lugar que, peru qué ñanda diʼ. Ngue runi gunábacabe naa chaaʼ Conakri, capital stiʼ Guinea, ne guuyaʼ ximodo guicaaʼ residencia o permisu para guiaanaʼ raqué.

Ora yendayaʼ Conakri la? guyaaʼ ra embajada stiʼ Nigeria, ra nuu embajador que. Bisieneʼ laabe napaʼ gana guneʼ predicar Guinea, peru laabe gúdxibe naa cadi guneʼ ni, purtiʼ zándaca guseguyoocabe naa o guizaacaʼ xiixa cosa jma feu. Ne nabe: «Biguetaʼ Nigeria ne raqué biʼniʼ predicar». Óraque gudxeʼ laabe: «Ma gucuaaʼ decisión guiaanaʼ raríʼ». Bicaa embajador que ti carta ra nuu ministru stiʼ Guinea para gábibe laa gacané naa, ne gucané ministru que naa.

Qué nindá biguetaʼ ra sucursal ni nuu Sierra Leona, ne gudxeʼ ca hermanu que xi decisión gucuaa ministru que. Dede guyuubí ca hermanu que de tantu cayéchecaʼ ora gudxeʼ laacaʼ, pur guluu Jehová ndaayaʼ naa la? bidii gobiernu permisu naa para guiaanaʼ Guinea.

Biaʼ lu iza 1978 ne lu iza 1989 gucaʼ superintendente de circuito Guinea ne Sierra Leona, ne gucaʼ sustituto Liberia. Nacubigá que guizáʼ gucaʼ huaraʼyaʼ, nuu biaje rizaacaʼ zacá ora guneʼ viajar ca lugar jma zitu. Peru runi ca hermanu stipa pur chinecaʼ naa ra hospital.

Ti biaje guizáʼ guca huaraʼyaʼ purtiʼ gupaʼ paludismo ne biduyu. Biandaʼ siaʼ que la? gunnaʼ mápeca caníʼ stiidxaʼ ca hermanu que paraa gucaachicaʼ naa. Neca gudideʼ lu guendanagana ni guluu xquendanabaneʼ lu peligru la? qué lica niníʼ iqueʼ nusaanaʼ dxiiñaʼ ni cayuneʼ que. Ne nannadxicheʼ ra nuu si Jehová nga zanda guilanu ne guni sentirnu seguru, ne neca gueeda gátinu la? zanda gusibánibe laanu sti biaje.

NAA NE XHEELAʼ NÁPADU CONFIANZA JEHOVÁ

Lu iza 1988 binebiaʼyaʼ Dorcas, ti precursora humilde ne guizáʼ nadxii Jehová. Bichaganadu ne maʼ guirópadu bínidu dxiiñaʼ de circuito. Guizáʼ racané Dorcas naa ne nadxii naa, ne huayúnibe stale sacrificiu para Jehová. Casi pa nuudu ti congregación, caquiiñeʼ sadu 25 kilómetru ne equipaje stidu para ganda chindadu stobi. Para ganda chindadu ca congregación ni riaana jma zitu la? riguíbadu lu intiica si cosa ni zanda chiné laadu. Biʼniʼ viajardu lu neza ra daʼ beñe ne napa bache.

Guizáʼ nadxibalú guca Dorcar. Guyuu biaje gudídidu guiiguʼ dxaʼ beʼñeʼ ndaaniʼ. Ti biaje, biʼniʼ viajardu gaayuʼ gubidxa, cumu maʼ guca feu ca puente de yaga nuu lugar que la? gudxíbadu lu canuá para ganda tídidu guiiguʼ. Ora bizuhuaa Dorcas para guiete de lu canuá que la? biábabe ndaaniʼ nisa ne biaazibe. Nin tobi de laadu qué gánnadu xhúʼbadu ne nuu beʼñeʼ ndaaniʼ guiiguʼ que. Peru ni galán nga guyuubí caadxi joven ndaaniʼ nisa que ne guleecaʼ laabe. Nabé feu ca ni guníʼ xcaandadu ti tiempu pur ni bizaacadu que, peru qué nusaanadu de ñúnidu xhiiñadu.

Ra cuzulú iza 1992, gucuaadu ti sorpresa guizáʼ naroʼbaʼ: ¡Guca xiiñiʼ Dorcas! ¿Ñee zusaanadu de gúnidu xhiiñaʼ Dios de tiempu completu la? gunidu: «Naca baʼduhuiiniʼ riʼ ti regalu sti Jehová». Ngue runi gucuaadu decisión cuee ladu dxaapahuiiniʼ stidu Jahgift (ni riníʼ «regalu stiʼ Jah»). Tapa iza despué gule Eric, hombrehuiiniʼ stidu. Rihuinni dxíchica nácacabe ti regalu stiʼ Jehová. Gucané Jahgift ti tiempu ra Oficina Remota de Traducción ni nuu Conakri, ne Eric la? naca siervu ministerial.

Neca ra gudiʼdiʼ tiempu bisaana Dorcas de gaca precursora especial la? peru bíʼnirube de precursora regular, nécaxa nahuiiniʼ ca xiiñidu. Naa la? xquixe peʼ Jehová gunda ruʼ bineʼ de precursor especial. Dxi maʼ biniisi ca xiiñidu la? maʼ biʼniʼ Dorcas de precursora especial sti biaje, ne yanna maʼ nácadu misioneru Conakri.

JEHOVÁ NGA RAPA

Guiráʼ ra ná Jehová riaaʼ. Naa ne xheelaʼ maʼ bidúʼyadu ximodo rápabe laadu ne riguu ndaayabe laadu. Cumu nápadu confianza Jehová ne cadi ca cosa material ca la? qué huayápadu guendanagana ni rapa xcaadxi binni ne laaca que huayápadu ansiedad. Naa ne Dorcas, maʼ bidúʼyadu Jehová si nga zanda gulá laadu, purtiʼ laabe nga Dios ni rulá laanu (1Crón. 16:35). Nanna dxiicheʼ cayapa Jehová xquendanabani ca ni napa confianza laa, casi ñaca ñápabe ni ndaaniʼ ti bolsa de guendanabani (1 Sam. 25:29).