Ni gusiiditu ca xiiñitu

Xiñee nabé gunnaxhiicabe Dorcas

GUIRANU nga caquiiñenu gannaxhiicabe laanu. Lii xi rábiluʼ yaʼa... Biblia ruzeeteʼ de Dorcas, ti gunaa ni nabé gunnaxhiicabe.

Laabe nga tobi de ca primé gunaa ni beeda gaca discípulo stiʼ Jesús ne gulézabe Jope, ti guidxi ni nuu guriá nisadóʼ Mediterráneo, ne riaana ni 56 kilómetru de Jerusalén.

Xiñee rábiluʼ nabé gunnaxhiicabe Dorcas yaʼ... Biblia cayabi laanu de guidubi ladxidoʼbe bisigáʼdebe stale cosa binni ne laaca bíʼnibe stale cosa galán. Ruluíʼ si gudíbabe lari sicarú para gusigáʼdebe ca viuda, ca gunaa ni maʼ guti xheelaʼ. Ne guníʼnebe guiráʼ binni de Jiobá, Dios ni dxandíʼ, cásica biʼniʼ Jesús.

Ñee nannuʼ xi bizaaca Dorcas la?... Ti dxi gudixhe ti guendahuará malu laabe ne gútibe. Guiráʼ xhamígube nabé guyuucaʼ triste, ngue runi biseendacaacabe apóstol Pedru, apóstol riʼ nuu biaʼ 16 kilómetru de raqué, ne gunábacabe laa gacapurá. Ora bedandá Pedru, gudxiʼbaʼ ranuu cuartu nexheʼ Dorcas, ne ca gunaa nuu raqué cayuunacaʼ ne culuiʼcaʼ laabe ca lari sticaʼ ni gudiba Dorcas.

Óraque gudxi Pedru guirácabe guireecabe de ndaaniʼ yoo que. Laabe ne xcaadxi apóstol maca huayúnicabe milagru, peru nin tobi de laacabe qué huayuu dxi gusibánicabe tuuxa binni ni maʼ guti. Xi rábiluʼ biʼniʼ Pedru óraque yaʼ...

Bizuxíbibe cueʼ gueʼtuʼ que ne biʼniʼ orarbe Jiobá. De raqué gúdxibe Dorcas guiasa, ¡ne biasa! Óraque gunaazeʼ Pedru nabe para gucané laabe guzuhuaabe ne bicaa ridxi ca viuda ne xcaadxi binni nuu raqué para gúʼyacaʼ laabe. Ñee ruxuíʼluluʼ pabiáʼ nayecheʼ guyuu guirácabe la?...

Guidúʼyanu xi zanda guizíʼdinu de historia ni cuzeeteʼ de dxi bisibánicabe Dorcas. Rizíʼdinu ti cosa: pa gacaneluʼ xcaadxi binni la? stale tu zannaxhii lii. Ne ni jma risaca nga zannaxhii Dios lii ne zietenaláʼdxibe lii; qué ziuu dxi gusiaandabe ca cosa galán ni maʼ bíʼniluʼ ne zudiibe lugar guibániluʼ nayecheʼ ndaaniʼ ti paraísu sin qué chuʼ dxi gátiluʼ.

RA GUIUUNDAʼ BIBLIA

Hechos 9:36-43

Apocalipsis 21:3-5

[Cani cá ñee yaza]