Sanu lu ca neza stiʼ Jiobá
«Nayecheʼ ribani guiráʼ binni ni ridxibi Jiobá, ne canazacaʼ lu ca neza stibe.» (Sal. 128:1.)
1, 2. Xiñee nánnanu zanda guibani binni nayecheʼ.
TU QUÉ riuulaʼdxiʼ guibani nayecheʼ. Laanu nánnanu racalaʼdxiʼ guiráʼ binni guibani nayecheʼ, nga runi riraruʼ ni runi para guibani zacá. Peru, neca rúnicabe guiráʼ nga cadi nayecheʼ diʼ nuucabe.
2 Neca zacá, Salmo 128:1 cayabi laanu zanda chuʼnu nayecheʼ purtiʼ racá na: «Nayecheʼ ribani guiráʼ binni ni ridxibi Jiobá, ne canazacaʼ lu ca neza stibe». Nga runi, ni caquiiñeʼ guni binni para guibani nayecheʼ nga guni respetar Dios ne saʼ lu ca neza stibe, o guni ni na Dios. Zahuinni rúninu cani pur modo laanu ne pur cani rúninu. Ximodo nga yaʼ.
Gusihuínninu zanda guni crécabe ni rininu
3. Ximodo ndiʼ jma jneza gusihuínninu zanda guni crécabe laanu.
3 Ca binni ni ridxibi Jiobá zeeda gácacaʼ cásica laabe: zanda guni cré binni ni riniʼcaʼ. Guiráʼ ni guníʼ Jiobá chiguni para guidxi Israel la? bíʼnibe cani (1 Rey. 8:56). Lade guiráʼ ca cosa ni zanda guininu gúninu la? nuu tobi ni jma risaca, laani nga gudiʼnu laanu Dios para gúninu ni na. Ne para ganda gúninu nga naquiiñeʼ guni orarnu gatigá, cásica biʼniʼ David ora guníʼ: «Lii, Dios, maʼ bicaadiágaluʼ ni maʼ bidiéʼ stiidxaʼ guneʼ. [...] Qué ziuudxí gusaanaʼ de guundaʼ para gusisacaʼ laluʼ, para guneʼ casi maʼ bidiéʼ stiidxaʼ guiráʼ dxi» (Sal. 61:5, 8; Ecl. 5:4-6). Pa racaláʼdxinu gaca xhamígunu Dios la? riquiiñeʼ gúninu ni guininu (Sal. 15:1, 4).
4. Xi guníʼ Jefté zuni ne ximodo gucané xiiñidxaapabe laabe para guca ni guniʼbe que.
4 Jefté nga tobi de ca hombre ni guca juez ndaaniʼ guidxi Israel dxiqué. Dxi chitindenebe ca ammonita la? gúdxibe Jiobá gacané laabe guni ganarbe ca binni que, ne pa gacané Jiobá laabe zudiibe laa primé binni ni guidxaagalú laabe ora guibiguétabe. Peru tobi lucha xiiñidxaapabe nga bidxaagalú laabe ora bibiguétabe. Neca gúcani zacá, bisihuínnicabe nápacabe fe Jiobá: biʼniʼ Jefté ni guníʼ que ne bizuubaʼ xiiñidxaapaʼ diidxaʼ. Ndaaniʼ guidxi Israel ni guyuu dxiqué la? nabé nga risaca guichaganáʼ binni ne gapa xiiñiʼ, neca zaqué biaana baʼdudxaapaʼ xiiñiʼ Jefté que sin nichaganáʼ, ngue runi gunda biʼniʼ adorarbe Jiobá ndaaniʼ yuʼduʼ stiʼ (Jue. 11:28-40).
5. Xi biʼniʼ Ana para bisihuinni zanda guni crécabe ni guníʼ.
5 Ana guca ti gunaa ni bidxibi Dios, laaca bisihuinni zanda guni crécabe laa, purtiʼ biʼniʼ ni guníʼ. Laabe ne Peniná nga cani bichaganáʼ Elqaná, levita que, ne gulézacabe lu layú ra guyuu stale dani stiʼ Efraín. Cumu gupa Peniná stale xiiñiʼ la? ngue runi biʼniʼ búrlabe Ana, purtiʼ laa qué gapa xiiñiʼ, ne jma runi búrlabe laa ora maʼ zécabe ra nuu tabernáculo que para guni adorárcabe Dios. Lu tobi de ca biaje guyécabe raqué gunabaʼ Ana Jiobá gudii laabe ti xiiñibe, ne bidii stiidxabe pa gudii Jiobá laabe ti xiiñibe la? zudiibe baʼduhuiiniʼ que laa. Qué nindaa de ngue guca xiiñiʼ Ana ne gupa ti hombrehuiiniʼ, ne gulee labe laa Samuel. Guleesibe niidxi ruaa baʼduhuiiniʼ que bidiibe laa Jiobá ndaaniʼ guidxi Siló, ne bisaanabe laa raqué para guni ni na Dios «guiráʼ ca dxi guibani» (1 Sam. 1:11). Zacá nga biʼniʼ Ana ni guníʼ que, ne bíʼnibe ni neca qué ñánnabe pa záparube jma xiiñibe ra gudiʼdiʼ xcaadxi iza (1 Sam. 2:20, 21).
6. Ximodo bisihuinni Tíquico zanda guni dxiiñaʼ bidiicabe laa.
6 Tíquico nga ti xpinni Cristu ni bibani lu primé siglu que, laaca biʼniʼ crécabe laabe ne nabé bíʼnibe xhiiñaʼ Cristu (Col. 4:7). Yenebe apóstol Pablu dede Grecia hasta Asia Menor, gudíʼdicabe Macedonia, ne zándaca yendácabe dede Jerusalén (Hech. 20:2-4). Zándaca laabe nga xpinni Cristu ni gucané Tito para gudiizicabe ni biquiiñeʼ ca xpinni Cristu de Judea dxi gudíʼdicaʼ ra nagana (2 Cor. 8:18, 19; 12:18). Dxi biseguyoocabe Pablu primé biaje Roma la? gúdxibe Tíquico chiné carta para ca binni ridagulisaa de Éfeso ne Colosas, purtiʼ nánnabe zanda guni Tíquico ni (Efe. 6:21, 22; Col. 4:8, 9). Ne dxi biseguyoocabe Pablu sti biaje Roma que la? biseendaʼ Pablu laabe Éfeso (2 Tim. 4:12). Pa gúʼyacabe zanda gúninu guiráʼ ca dxiiñaʼ gudiicabe laanu la? zanda gudiirúcabe laanu jma dxiiñaʼ ndaaniʼ xquidxi Jiobá.
7, 8. Xiñee zanda guininu nabé guca xhamigu David ne Jonatán.
7 Ribeza Dios cadi guchéʼnenu ca xhamígunu (Pro. 17:17). Jonatán, xiiñiʼ rey Saúl, nabé guca xhamígube David. Dxi gúnnabe biiti hombrehuiiniʼ riʼ Goliat la? «jmaruʼ si gunnaxhiibe David, ne nabé gunnaxhiibe laa cásica nadxiibe laabe» (1 Sam. 18:1, 3). Dxi gucalaʼdxiʼ Saúl ñuuti David la? Jonatán gudixhená laabe para cadi igaabe, ne ora bixooñeʼ David bidagulisaanebe laa para bíʼnicabe ti pactu. Gudiʼdiʼ dxi, laaca Jonatán nga guníʼ pur David nezalú Saúl para bilá, dede bilá ñati Jonatán pur ngue. Neca zaqué, yeyúbibe David para gábibe laa dxandíʼ xhamigurúcabe (1 Sam. 20:24-41). Ne últimu biaje bidxaagabe David que «guluube gana laa para guni cré Dios» (1 Sam. 23:16-18).
8 Jonatán guti dxi cadindenécabe ca filisteu (1 Sam. 31:6). Guizáʼ naná nuu ladxidóʼ David ora biʼndaʼ: «Naná nuaa pur lii, bichehuiineʼ, Jonatán, nachaʼhuiʼ gúcaluʼ ne naa. Jma sicarú gunnaxhiiluʼ naa que modo rannaxhii ca gunaa ca» (2 Sam. 1:26). David ne Jonatán gunnaxhiisaacaʼ purtiʼ dxandíʼ guca xhamígucaʼ, cadi pur sti cosa.
Cadi gudxíʼbanu laca laanu
9. Ximodo rusihuinni capítulo 9 stiʼ Jueces pabiáʼ nga risaca cadi gudxíʼbanu laca laanu.
9 Para gaca xhamígunu Dios la? qué riquiiñeʼ diʼ gudxíʼbanu laca laanu (1 Ped. 3:8; Sal. 138:6). Capítulo 9 stiʼ libru stiʼ Jueces ruzeeteʼ pabiáʼ nga risaca cadi gudxiibaʼ binni laca laa. Racá ridúʼndanu ti historia ni guníʼ Jotán, xiiñiʼ Gedeón. Historia ca ruzuluni sicaríʼ: «Ti biaje guyé ca yaga ca yendicaʼ tu gaca rey para laacaʼ». Yaga olivo, duʼgaʼ ne lubáʼ uva ca nga cani beeda gaca ca hombre chaʼhuiʼ stiʼ Israel, laacaʼ qué nuyúbicaʼ ñuni mandarcaʼ ca bíʼchicaʼ. Peru yagahuiiniʼ ni láʼ cambrón, ni riquiiñeʼ para si chuʼ xadé que nga ni beeda gaca Abimélec, purtiʼ laa bidxiibaʼ laca laa ne biiti binni dxi guca rey. Hombre riʼ biʼniʼ laa «príncipe ndaaniʼ guidxi Israel biaʼ chonna iza», peru nabé naná modo biiticabe laa (Jue. 9:8-15, 22, 50-54). Cadi dxandíʼ jma galán nga cadi gudxíʼbanu laca laanu la?
10. Xi rizíʼdinu de Herodes pur «qué nusisaca be Dios».
10 Lu primé siglu despué de ca dxi stiʼ Jesús que guca Herodes Agripa, rey stiʼ Judea. Hombre riʼ bidxiibaʼ laca laa ne guyuudindenebe ca binni ni guleza Tiro ne Sidón. Ca binni riʼ biyúbicaʼ ximodo chúʼdxicaʼ ne laabe sti biaje, ngue runi bidiibe ti libana nezalú guiráʼ ca binni que. Biluxe si libana que bizulú cuchá ca binni que naróʼ stibe ne ca diidxaʼ riʼ: «Dios nga ni caníʼ ca, cadi binni». Cumu qué nucueeza rey que ca binni que pur ni caniʼcaʼ ne «qué nusisaca be Dios» la? bininá ti ángel stiʼ Jiobá laabe ne guizáʼ feu modo gútibe (Hech. 12:20-23). Yanna, xi gúninu pa nápanu gracia para gudiʼnu libana o para gusíʼdinu ni zeeda lu Biblia yaʼ. Riquiiñeʼ gusisácanu ne gudiʼnu xquíxepeʼ Dios, purtiʼ laa nga racané laanu gúninu ni (1 Cor. 4:6, 7; Sant. 4:6).
Guzuhuaʼnu dxiichiʼ ne gácanu nadxibalú
11, 12. Ximodo rusihuinni ni bizaaca Enoc que rudii Jiobá stipa ca xpinni ne racané gácacabe nadxibalú.
11 Pa qué gudxíʼbanu laca laanu ora maʼ cayúninu ni na Jiobá la? zacanebe laanu guzuhuaʼnu dxiichiʼ ne gácanu nadxibalú (Deu. 31:6-8, 23). Enoc guzané Dios sin nidxibi ne biʼniʼ ni jneza neca bibani lade binni malu (Gén. 5:21-24). Bidii Jiobá stipa laabe para guniʼbe zuni juzgar Dios ca binni que pur guiráʼ cosa malu ni cayúnicaʼ (biindaʼ Judas 14, 15). Ñee laaca qué ridxíbinu para guininu zadxiña dxi zabidxi Dios cuenta binni la?
12 Ni gudxi Dios Enoc guiníʼ que gúcani dxi biaba Nisaguié naroʼbaʼ que. Ca diidxaʼ guníʼ Enoc que laaca riguixhedxícani ladxidoʼno yanna, purtiʼ laaca nánnanu maʼ cadi candaa diʼ zunitilú ca ángel chaʼhuiʼ ca guiráʼ ca binni malu nuu yanna riʼ (Apo. 16:14-16; 19:11-16). Ricabi Jiobá ca oración stinu ora rudii stipa laanu para cadi guidxíbinu ora guininu zunitilube binni malu ne ora gusíʼdinu xi chiguni Reinu stiʼ Dios ne ca ndaayaʼ chigueedaneni.
13. Xi ejemplu nápanu ni rusihuinni zaguu Dios gana laanu ne zudii stipa laanu para gudxíʼlunu intiica guendanagana.
13 Ora nuunu triste pur ca guendanagana cadídinu la? oracapeʼ nga jma caquiiñenu uguu Dios gana laanu ne gudii stipa laanu. Guiníʼ íquenu de Isaac ne Rebeca. Dxi bichaganáʼ Esaú xiiñicabe chupa gunaa de ca hitita que la? nabé bisiuubaʼ ca gunaa ca ladxidóʼcabe. Nabé cayuubaʼ ladxidóʼ Rebeca ora guníʼ: «Maʼ bixhacalaʼdxeʼ xquendanabaneʼ riʼ runi ca gunaa xiiñiʼ Het. Pa chuʼ dxi guichaganáʼ [xiiñinu] Jacob ti gunaa de ca xiiñiʼ Het casi ca baʼdudxaapaʼ ni nuu ndaaniʼ guidxi riʼ la? oracaruʼ huaxa zateʼ» (Gén. 26:34, 35; 27:46). Guníʼ ique chaahuiʼ Isaac ni guníʼ Rebeca que ne biseendabe Jacob ti guidxi zitu para guyubi ti gunaa guichaganáʼ lade ca binni ni runi ni na Jiobá. Nécapeʼ maʼ qué ñanda ñuni chaahuiʼ Isaac ne Rebeca ni biʼniʼ Esaú que la? bidii Jiobá guendabiaaniʼ laacabe, biʼniʼ laacabe nadxibalú ne bidii stipa laacabe para guzuubarúcabe stiidxaʼ. Ne zaca nga zacané Jiobá laanu yanna pa guinábanu ni laa (Sal. 118:5).
14. Ximodo bisihuinni ti dxaapahuiiniʼ de Israel guca nadxibalú.
14 Gudiʼdiʼ si gayuaa iza de ni bizéʼtenu ca, gunaazeʼ caadxi binni malu ti dxaapahuiiniʼ de Israel. Laabe beeda gácabe criada ralidxi Naamán, comandante stiʼ ca soldadu stiʼ Siria, ne huará hombre riʼ de lepra. Cumu nanna dxaapahuiiniʼ riʼ riquiiñeʼ Dios Eliseo para guni milagru la? gúcabe nadxibalú para gunda guníʼnebe xheelaʼ Naamán. Gúdxibe gunaa que zianda xheelaʼ pa cheʼ Israel, ra nuu ni riguixhená stiʼ Jiobá que. Guyé hombre que Israel ne guca ti milagru para bianda (2 Rey. 5:1-3). Nabé riguu ejemplu stiʼ dxaapahuiiniʼ riʼ gana ca xpinni Jiobá ni nahuiiniʼ ora rinábacaʼ gacané Dios laacaʼ para gácacaʼ nadxibalú ti guiníʼnecaʼ ca maestru sticaʼ, ca baʼduscuela ne xcaadxi binni.
15. Xi biʼniʼ Abdías, hombre ni guca mayordomo ralidxi Acab que.
15 Laaca randa ruzuhuaʼnu dxiichiʼ ora canazanándacabe laanu purtiʼ racané Dios laanu gácanu nadxibalú. Guzéʼtenu ejemplu stiʼ Abdías, hombre ni guca mayordomo ralidxi rey Acab, ni bibani ca dxi stiʼ Elías. Ora biʼniʼ mandar reina Jezabel gati guiráʼ cani riguixhená stiʼ Dios la? bicaachiʼ Abdías ti gayuaa de laacabe ne biʼniʼ laacabe «chupa neza de cincuenta ndaaniʼ ti cueva» (1 Rey. 18:13; 19:18). Ñee laaca zácanu nadxibalú para gápanu xcaadxi xpinni Cristu ora sanándacabe laanu la?
16, 17. Xi biʼniʼ Aristarco ne Gayo ora bicaalú binni laacaʼ.
16 Pa chuʼ dxi sanándacabe laanu la? zanda guni crenu qué zusaanatáʼ diʼ Jiobá laanu (Rom. 8:35-39). Guiníʼ íquenu de Aristarco ne Gayo, ca hombre ni biʼniné Pablu dxiiñaʼ que. Dxi guyuucabe ndaaniʼ guidxi Éfeso la? bicaalú biaʼ chii mil binni laacabe lugar ra raca teatru stiʼ guidxi que. Guiráʼ ni cusiidiʼ Pablu ca binni que cayacaneni laacaʼ para gusaanacaʼ de guni adorarcaʼ bidóʼ. Ngue runi guníʼ ique ca plateru ni nuu ndaaniʼ guidxi que maʼ qué zadoopeʼ ca yuʼduʼ huiiniʼ de plata ni rúnicabe stiʼ diosa Ártemis. Demetriu nga tobi de cani biʼniʼ yaya caadxi binni nuu raqué, ngue runi gunaazeʼ ca binni que Aristarco ne Gayo ne guxubiyucaʼ laacabe dede ra raca teatru que ne raqué bizulú caguucaʼ «viva sti [Ártemis], bidóʼ sti ca binni Efeso». Ca xpinni Cristu riʼ guníʼ íquecaʼ zuuti ca binni que laacaʼ, peru gunda bicueeza xaíque stiʼ guidxi que guiráʼ ca binni que (Hech. 19:23-41).
17 Pa nidídinu lu ti guendanagana casi nga, ñee niníʼ íquenu maʼ qué zúninu xhiiñaʼ Dios purtiʼ cuxooñeʼ riesgu gátinu la? Cadi cá diʼ lu Biblia pa biʼniʼ Aristarco ne Gayo zacá. Aristarco maca nanna ziuu binni zazánanda laacaʼ ora gucheechecaʼ diidxaʼ, purtiʼ laaca guyuu stale binni ni bidxiichi dxi bicheeche Pablu diidxaʼ ndaaniʼ xquídxibe, Tesalónica (Hech. 17:5; 20:4). Peru laabe ne Gayo bizuubacabe stiidxaʼ Jiobá, ngue runi qué nidxibidícabe ne bidii Jiobá stipa laacabe para biʼniʼ huantárcabe ora bicaalú binni laacabe.
Guizaaláʼdxinu gacanenu chuʼ binni galán
18. Ximodo bisihuinni Prisca ne Áquila bizaaláʼdxicaʼ xcaadxi binni.
18 Riquiiñeʼ guizaaláʼdxinu chuʼ ca xpinni Cristu galán, ne gúninu ni guiráʼ ora dede ne ora nuu tu canazánanda laanu. Prisca ne Áquila bizaaláʼdxicaʼ xcaadxi bíʼchicaʼ ne bizáʼnacaʼ (biindaʼ Filipenses 2:4). Zándaca guendaxheelaʼ riʼ nga gúpacaʼ Pablu ralídxicaʼ de biuuzaʼ dxi guyuube Éfeso. Raquepeʼ nga biʼniʼ yaya Demetriu ca binni que, ngue runi zándaca dxi que nga gucanécabe Pablu, dede bilá ñuuti binni laacabe pur apóstol riʼ (Rom. 16:3, 4; 2 Cor. 1:8). Ora sanándacabe laanu la? naquiiñeʼ gatananu «casi nexhená beendaʼ» ora maʼ cayúninu dxiiñaʼ bisaanané Dios laanu, purtiʼ qué racaláʼdxinu gacaná ca bíʼchinu ne ca bizáʼnanu (Mat. 10:16-18). Laaca qué zaninu tu lácabe o paraa nuucabe ora chuʼ tu gacalaʼdxiʼ guinaazeʼ laacabe.
19. Xii nga ca cosa galán biʼniʼ Dorcas pur xcaadxi binni.
19 Nuuruʼ xcaadxi modo zanda gusihuínninu rizaaláʼdxinu chuʼ ca bíʼchinu ne ca bizáʼnanu galán. Pa nuu ti xpinni Cristu caquiiñeʼ xiixa la? zanda gudiʼnu ni caquiiñebe (Efe. 4:28; Sant. 2:14-17). Lade neza binni ridagulisaa ni guyuu Jope lu primé siglu que, guyuu ti xpinni Cristu láʼ Dorcas, laa nabé gucané xcaadxi binni (biindaʼ Hechos 9:36-42). Gunaa xpinni Cristu riʼ «nabé ucané be binni ne ora caquiiñe ca pobre xiixa la? rudiibe laacaʼ». Laabe gudíbabe lari para iquiiñeʼ ca viuda ni qué gapa tu gacané laacaʼ. Nabé triste guyuu guiráʼ ca viuda que ora gútibe, ne guca nga lu iza 36 despué de ca dxi stiʼ Jesús. Peru biquiiñeʼ Dios apóstol Pedru para bisibani laabe, ne zándaca bicheeche Dorcas diidxaʼ xcaadxi iza bibani ne laaca biʼniʼ stale cosa galán para xcaadxi binni. Cadi dxandíʼ riéchenu nga nuu stale gunaa xpinni Cristu ni riuulaʼdxiʼ gacané ládenu la?
20, 21. 1) Xi sti modo zanda gusihuínninu rizaaláʼdxinu binni. 2) Ximódoruʼ zanda uguuluʼ gana binni.
20 Sti modo zanda gusihuínninu racaláʼdxinu gacanenu ca xpinni Cristu nga ora gábinu laacaʼ xiixa ni uguu gana laacaʼ (Rom. 1:11, 12). Silas, hombre guzané Pablu que, nabé guluu gana guiráʼ ca binni guyuu gaxha de laa. Dxi bihuinni maʼ cadi naquiiñeʼ gaca circuncidar ca xpinni Cristu lu iza 49 que la? biseendaʼ Grupu ni Zaniruʼ que caadxi hombre dede Jerusalén para chinecaʼ caadxi carta ra nuu ca binni ridagulisaa. Silas, Judas, Bernabé ne Pablu yenecaʼ ca carta que guidxi Antioquía, ne «bisieche ca [ca bíʼchicaʼ] ne ucané ca laacabe bizuhuaa chaahui cabe» lu Stiidxaʼ Dios (Hech. 15:32).
21 Gupa si dxi de ngue biseguyoocabe Pablu ne Silas guidxi Filipos. Laga deguyoocabe raqué guca ti xu, peru lugar de nuxooñecabe la? bisiidicabe hombre ni rapa ralidxi guiibaʼ que de Dios ne guca hombre que ne ca binnilidxi xpinni Cristu. Ante guiree Pablu ne Silas ndaaniʼ guidxi que guluucaʼ gana ca bíʼchicaʼ ne ca bizáʼnacaʼ (Hech. 16:12, 40). Gúninu stipa para chinándanu ejemplu stícabe ne uguʼnu gana ca xpinni Cristu, zanda gúninu ni ora guicábinu ra ridagulisaanu, ora gudiʼnu libana ne ora gucheechenu diidxaʼ ne stale guendanayecheʼ. Ora gúʼyaluʼ caquiiñeʼ uguuluʼ gana tuuxa la? biʼniʼ ni (Hech. 13:15).
Cadi gusaana de sanu lu ca neza stiʼ Jiobá
22, 23. Xi riquiiñeʼ gúninu para cueendunu stale cosa galán de ca historia zeeda lu Biblia.
22 Riquiiñeʼ gudiʼnu xquíxepeʼ pur guiráʼ ca historia stiʼ ca binni ni zeeda lu Stiidxaʼ Jiobá, «laabe nga Dios stinu ne riguixhe dxí be ladxidóʼ no» (2 Cor. 1:3). Peru para cueendunu ni galán de ca historia riʼ la? naquiiñeʼ gúninu ni rusiidicani laanu ne gudiʼnu lugar gacané espíritu santu laanu gúninu ni ridúʼndanu lúcani (Gál. 5:22-25).
23 Pa guiníʼ íquenu ni rusiidiʼ ca historia stiʼ Biblia riʼ laanu la? zacanécani laanu gápanu ca guenda ni riuulaʼdxiʼ Dios. Laaca zacaneni laanu chuʼnu jma gaxha de Dios, ni rudii laanu «guendabiaaniʼ ne guendananna ne guendanayecheʼ» (Ecl. 2:26). Ne zacá zusiéchenu ladxidóʼ Jiobá (Pro. 27:11). Quixhe íquenu gúninu zacá ne qué chuʼ dxi gusaana de sanu lu ca neza stiʼ Jiobá.
Xi nicábiluʼ
• Xi riquiiñeʼ gúninu para guni crécabe laanu.
• Xiñee qué riquiiñeʼ gudxíʼbanu laca laanu.
• Ximodo riguu ca historia stiʼ Biblia gana laanu, ne ximodo racanécani laanu gácanu nadxibalú.
• Ximodo zanda gusihuínninu rizaaláʼdxinu chuʼ binni galán.
[Dibuju/foto ni zeeda lu yaza 8]
Nagana guca para Jefté guni ni guníʼ, peru laabe ne xiiñidxaapabe bíʼnicabe ni
[Dibuju/foto ni zeeda lu yaza 10]
Lii, hombrehuiiniʼ o dxaapahuiiniʼ, xi biziidiluʼ de dxaapahuiiniʼ de Israel que
[Dibuju/foto ni zeeda lu yaza 11]
Ximodo gucané Dorcas ca viuda ni qué ñapa tu ñacané laacaʼ