Hermana joven: ¿Ximodo zanda gueeda gácaluʼ ti gunaa ni maʼ biniisi ndaaniʼ xquidxi Dios?

1. ¿Xi caquiiñeʼ gúninu para guiniisinu ndaaniʼ xquidxi Dios?

¿CADI dxandíʼ nabé ridxagayaanu pabiáʼ nagueenda riniisi ti xcuidi ne reeda gaca ti binni huaniisi la? ruluíʼ qué rúnicabe gastiʼ para guiniisicabe. Peru cadi zacá diʼ rizaaca para guiniisi tuuxa ndaaniʼ xquidxi Dios (1 Cor. 13:11; Heb. 6:1).b Para ganda guiniisinu ndaaniʼ xquidxi Dios, naquiiñeʼ gúninu stipa gaca xhamígunu Jehová. Laaca caquiiñeʼ gacané espíritu santu stibe laanu para gápanu cualidad galán, guizíʼdinu xiixa dxiiñaʼ ne chuʼnu listu para xiixa dxiiñaʼ ni zanda gápanu despué (Prov. 1:5).

2. ¿Xi rizíʼdinu lu Génesis 1:27? ¿Ne xi zadúʼyanu lu artículo riʼ?

² Bizáʼ Jehová hombre ne gunaa (biindaʼ Génesis 1:27). Casi nánnanu gadxé modo bizáʼ Dios hombre ne gunaa, peru laaca gadxé laacabe lu xcaadxi cosa. Guzéʼtenu ti ejemplu, cumu gadxé gadxé nga dxiiñaʼ bidiibe hombre ne gunaa la? nga runi, laaca caquiiñeʼ gápacabe gadxé gadxé cualidad para gúnicabe ni (Gén. 2:18). Lu artículo riʼ, zazíʼdinu xi zanda guni ca hermana joven para guiniisicaʼ ndaaniʼ xquidxi Dios. Ne lu stiʼ artículo ca, zadúʼyanu xi zanda guni ca hermanu joven.

BIʼNIʼ STIPA GÁPALUʼ CUALIDAD NI RIUULAʼDXIʼ JEHOVÁ

3, 4. ¿Paraa zanda guidxela ca hermana joven ejemplu galán ni zanda chinándacaʼ? (Biiyaʼ ca imagen).

³ Lu Biblia zeeda ejemplu stiʼ stale gunaa ni gunnaxhii Jehová ne bíʼnicaʼ ni nabe (biindaʼ artículo ni zeeda lu jw.org, ni láʼ «¿Xi rizíʼdinu de ca gunaa ni riete lu Biblia?»). Casi ná textu ra biree artículo riʼ gúcacabe gunaa ni gupa xpiaʼ lu guiráʼ ni biʼniʼ ne gúcacabe fiel lu guiráʼ cosa. Ndaaniʼ congregación laaca nuu stale hermana ni maʼ biniisi ndaaniʼ xquidxi Dios ne zanda guiziidiluʼ stale cosa de laacaʼ.

⁴ Pa nácaluʼ ti hermana joven la? guníʼ ique de ca hermana ni naca ti ejemplu galán para lii ne gudixhe ique gácaluʼ casi laacabe. Para nga la? biiyaʼ ca cualidad galán ni nápacabe ne guníʼ ique ximodo zanda gápaluʼ ca ni. Lu xcaadxi párrafo ca zadúʼyanu chonna cualidad ni naquiiñeʼ gapa ca gunaa ni maʼ biniisi ndaaniʼ xquidxi Dios.

5. ¿Xiñee naquiiñeʼ gaca ca gunaa ni maʼ biniisi ndaaniʼ xquidxi Dios humilde?

⁵ Guca humilde. Ti gunaa humilde raca xhamiga Jehová ne laaca raca xhamiga xcaadxi binni (Sant. 4:6). Cumu humilde laabe ne nadxiibe Bixhózebe ni nuu guibáʼ la? rinándabe principiu de autoridad ni maʼ gudixhe Dios de tuu nga naquiiñeʼ guni dirigir congregación ne tu gaca xaíque ndaaniʼ familia (1 Cor. 11:3).c

6. ¿Ximodo zanda gaca ca hermana joven humilde cásica guca Rebeca?

⁶ Guininu de Rebeca. Gúcabe ti gunaa nuu xpiaaniʼ ne ni nanna pora ne ximodo guni xiixa (Gén. 24:58; 27:​5-17). Peru laaca gúpabe respetu ne bizuubabe diidxaʼ (Gén. 24:​17, 18, 65). Pa gúniluʼ cásica biʼniʼ Rebeca, ra gácaluʼ humilde ne chinándaluʼ principiu de autoridad ni maʼ gudixhe Jehová la? zacaneluʼ familia stiluʼ ne congregación.

7. ¿Ximodo zanda chinanda ca hermana joven ejemplu stiʼ Ester ra gánnacaʼ nuu cosa ni qué zanda gúnicaʼ?

⁷ Gunna nuu cosa ni qué zanda gúniluʼ. Biblia ná: «Ti binni nuu xpiaaniʼ la? nanna nuu cosa ni qué zanda guni» (Prov. 11:2). Tobi de ca gunaa ni bisihuinni cualidad riʼ nga Ester. ¿Ximodo bisihuínnibe ni yaʼ? Casi dxi bíʼnicabe laabe reina la? qué ñácabe orgullosa, bicaadiágabe ne yenándabe ca conseju ni bidii Mardoqueo, xprímube, laabe (Est. 2:​10, 20, 22). Laaca zanda chinándaluʼ ejemplu stibe ra guinábaluʼ gudiicabe conseju lii ne ra chinándaluʼ ca ni (Tito 2:​3-5).

8. Ximodo zanda chinanda ca hermana joven conseju ni zeeda lu 1 Timoteo 2:​9, 10 ora cuicaʼ xi lari gácucaʼ ne modo guzuchaahuicaʼ?

⁸ Guidúʼyanu sti modo bisihuinni Ester nanna nuu cosa ni qué zanda guni. Biblia ná: «Nabé sicarú guca badudxaapaʼ riʼ ne galán rihuinni xcuérpube», neca zacá qué nuyúbibe nusisácacabe laabe (Est. 2:​7, 15). ¿Ximodo zanda chinándaluʼ ejemplu stibe yaʼ? Ti modo zanda gúniluʼ ni nga casi ná 1 Timoteo 2:​9, 10 (biindaʼ ni). Raríʼ cayabi apóstol Pablo ca hermana naquiiñeʼ gácucaʼ lari jneza ne gúnicaʼ ni né guendabiaaniʼ. Ca diidxaʼ griegu ni biquiiñebe raríʼ rusihuinni ca ni naquiiñeʼ gacu ca hermana lari jneza ne guiníʼ íquecaʼ ximodo ruuyaʼ xcaadxi laacaʼ. ¡Guizáʼ riéchenu ora ridúʼyanu rusihuinni ca hermana ca maʼ biniisicaʼ ndaaniʼ xquidxi Dios pur modo rácucaʼ lari!

9. ¿Xi rizíʼdinu de Abigaíl?

⁹ Gunna xii nga jneza ne ni cadi jneza. Laaca cualidad riʼ nga guiníʼ ique chaahuinu ante gúninu xiixa, laa ni nga ni racané laanu gánnanu xii nga ni jneza ne ni cadi jneza ne quixhe íquenu gúninu ni jneza. Guidúʼyanu ejemplu stiʼ Abigaíl. Gucuaa xheelabe ti decisión ni cadi jneza, ne bidiibe cuenta pur laani zapa familia stibe ne ca ni nabeza ra lídxibe guendanagana. Nagueendaca bíʼnibe xiixa, ne cumu guní’ ique chaahuibe ante gúnibe ni la? bilá stale binni (1 Sam. 25:​14-23, 32-35). Gánnanu xii nga ni jneza ne ni cadi jneza racané ni laanu gudiʼnu cuenta pora nga naquiiñeʼ guininu ne pora coʼ, ne guizaaláʼdxinu xcaadxi peru sin gusituinu lucaʼ (1 Tes. 4:11).

BIZIIDIʼ GÚNILUʼ XIIXA DXIIÑAʼ

10, 11. ¿Xi zabeenduluʼ pa guiziidiluʼ gúʼndaluʼ ne gucaaluʼ jneza? (Biiyaʼ imagen ca).

¹⁰ Galán guiziidiʼ ca hermana gúnicaʼ dxiiñaʼ. Caadxi de ca cosa ni biziidiluʼ dxi nahuiiniluʼ zaquiiñeluʼ ca ni guidubi xquendanabániluʼ. Guidúʼyanu caadxi ejemplu.

¹¹ Biziidiʼ gúʼndaluʼ ne gucaaluʼ jneza. Nuu lugar ruuyacabe cadi naquiiñeʼ peʼ guiziidiʼ gunaa guʼndaʼ ne gucaa. Peru ti xpinni Cristu nabé risaca guni ca ni (1 Tim. 4:13).d Nga runi, cadi gudiiluʼ lugar chuʼ xiixa ni gucueeza lii gúʼndaluʼ ne gucaaluʼ jneza. ¿Xi zabeenduluʼ yaʼ? Zacané ni lii guidxélaluʼ ti dxiiñaʼ ne gápaluʼ ni guibanineluʼ. Ne laaca zacané ni lii gánnaluʼ guni estudiarluʼ ne gusiidiluʼ Stiidxaʼ Dios jma jneza. Peru ni jma risaca nga ra gúʼndaluʼ Biblia ne guiníʼ íqueluʼ ni cayuundaluʼ la? ziuuluʼ jma gaxha de Jehová ne zaca xhamíguluʼ la? (Jos. 1:8; 1 Tim. 4:15).

12. ¿Xi riziidiluʼ de Proverbios 31:26?

¹² Biziidiʼ guiníʼneluʼ xcaadxi binni. Nabé risaca gapa guiráʼ ca xpinni Cristu habilidad riʼ. Bizeeteʼ discípulo Santiago de laani ora bidii conseju riʼ: «Naquiiñeʼ chuʼtu listu para gucaadiágatu, cadi casi zetu gundaa ruaatu xiixa diidxaʼ» (Sant. 1:19). Tobi de ca modo zanda gusihuínniluʼ riéneluʼ xcaadxi nga gucaadiaga chaahuiluʼ ora maʼ caniʼnécabe lii (1 Ped. 3:8). Pa cadi cayene chaahuiluʼ ni cayabi tuuxa lii o ni cayuni sentir la? gunabadiidxaʼ laabe peru biʼniʼ ni né respetu. Ne despué guníʼ ique chaahuiʼ ante guicábiluʼ laabe (Prov. 15:​28, nota). Guníʼ ique: «¿Ñee dxandíʼ ni chiguinieeʼ riʼ la? ¿Zaguu ni gana la? ¿Zusihuinni ni napaʼ respetu la? ¿Zusihuinni ni nacaʼ ti binni nachaʼhuiʼ la?». Guníʼ ique de ca hermana ni maʼ biniisi ndaaniʼ xquidxi Dios ne rusihuínnicaʼ nácacaʼ zacá ne biziidiʼ de laacaʼ (biindaʼ Proverbios 31:26). Biiyaʼ xi riníʼcabe ne ximodo riníʼcabe. Ra gúniluʼ ni, jma zaca xhamíguluʼ xcaadxi binni.

13. ¿Ximodo zanda guiziidiluʼ gúniluʼ ca dxiiñaʼ ni raca ndaaniʼ yoo? (Biiyaʼ imagen ca).

¹³ Biziidiʼ gúniluʼ ca dxiiñaʼ raca ra yoo. Ndaaniʼ stale guidxi, ca gunaa ca nga jma rúnicaʼ dxiiñaʼ ni raca ra yoo. Zanda gusiidiʼ jñaaluʼ o sti hermana ni jma huaniisi lii gúniluʼ ca dxiiñaʼ riʼ. Ti hermana láʼ Cindy guníʼ: «Tobi de ca cosa nabé risaca ni bisigaʼdeʼ jñaaʼ naa nga bisiidibe naa ziuaaʼ nayecheʼ pa guneʼ dxiiñaʼ nadipaʼ. Ra biziideʼ guneʼ guendaró, gusiayaʼ, quibaʼ ne gannaʼ chisiéʼ gucané ca ni naa gannaʼ guibaneʼ ne guneʼ jma lu xhiiñaʼ Jehová. Laaca bisiidiʼ jñaaʼ naa gacaʼ hospitalaria ne pur nga binebiaʼyaʼ hermanu ne hermana ni napa cualidad galán ne biziideʼ stale de laacaʼ» (Prov. 31:​15, 21, 22). Ca gunaa ni runi dxiiñaʼ, ca ni naca hospitalaria ne ni nanna guni dxiiñaʼ ndaaniʼ yoo nácacaʼ ti ndaayaʼ para familia sticaʼ ne para congregación (Prov. 31:​13, 17, 27; Hech. 16:15).

14. ¿Xi riziidiluʼ de ni guníʼ Crystal, ne xi naquiiñeʼ quixhe íqueluʼ gúniluʼ?

¹⁴ Biziidiʼ xiixa ni gacané lii tidineluʼ dxi. Guiráʼ ca xpinni Cristu ni maʼ biniisi lu Stiidxaʼ Dios, naquiiñeʼ quixhe íquecaʼ guiziidicaʼ xiixa ni gacané laacaʼ ne chuʼcaʼ nayecheʼ né biaʼ ni napasicaʼ (Filip. 4:11). Ti hermana láʼ Crystal guníʼ sicaríʼ: «Dxi nacaʼ adolescente ne canazayaʼ scuela, zanda cuéʼ xi materia chiniaʼ, ngue runi gudxi bixhozeʼ ne jñaaʼ naa cuéʼ materia ra zanda guiziideʼ xiixa oficiu ni gacané naa. Gudxi bixhozeʼ naa galán guiziideʼ contabilidad, ne guizáʼ gucané ngue naa». Galán guiziidiluʼ gúniluʼ ti dxiiñaʼ, peru cadi ngasi laaca galán guiziidiluʼ gúniluʼ ti presupuestu ne chinándaluʼ ni (Prov. 31:​16, 18). Pa gúniluʼ stipa cadi guzaabiluʼ ne chineluʼ ti vida sencíu la? zanda quixhe íqueluʼ ugaandaluʼ ca meta espiritual ni maʼ gudixhe íqueluʼ (1 Tim. 6:8).

GUCA PREPARAR PARA NI GUEEDA DESPUÉ

15, 16. ¿Xiñee nabé risaca ca hermana ni caʼruʼ guichaganáʼ? (Marcos 10:​29, 30).

¹⁵ Pa quixhe íqueluʼ gápaluʼ cualidad ni riuulaʼdxiʼ Jehová ne quixhe íqueluʼ guiziidiluʼ gúniluʼ xiixa, zacané ca ni lii chuʼluʼ lista para ni gueeda despué. Guidúʼyanu caadxi cosa ni zanda gúniluʼ.

¹⁶ Zanda guixhe íqueluʼ guiaanaluʼ sin guichaganaluʼ ti tiempu. Casi guníʼ Jesús, nuu tu maʼ gudixheʼ ique cadi guichaganáʼ neca nabeza ti lugar ra rucaacabe binni guni ni (Mat. 19:​10-12). Ne xcaadxi qué richaganáʼ pur xcaadxi razón. Pa caʼruʼ guichaganaluʼ la? gunna dxichi cadi pur nga riníʼ ique Jehová né Jesús qué risácaluʼ. Lu guidubi guidxilayú nabé nga risaca ca hermana ni caʼruʼ guichaganáʼ ni nuu ndaaniʼ ca congregación. Cumu nadxiicabe ca hermanu ne dxandíʼ peʼ rizaaláʼdxicabe xcaadxi la? nga runi, stale tu ruuyaʼ laacabe casi bizáʼnacaʼ, béndacaʼ ne jñaacaʼ (biindaʼ Marcos 10:​29, 30; 1 Tim. 5:2).

17. ¿Xi zacané ca hermana joven ugaandacaʼ meta de gúnicaʼ xhiiñaʼ Jehová de tiempu completu?

¹⁷ Zanda gúniluʼ xhiiñaʼ Jehová de tiempu completu. Jma stale hermana nga runi predicar lu guidubi guidxilayú (Sal. 68:11). ¿Ñee zanda quixheʼ íqueluʼ gúniluʼ xhiiñaʼ Jehová de tiempu completu la? Zanda gácaluʼ precursora, gúniluʼ dxiiñaʼ lu construcción o cheluʼ Betel. ¿Xi zanda gacané lii ugaandaluʼ meta stiluʼ yaʼ? Biʼniʼ orar Jehová, guniné ca ni maʼ cayuni dxiiñaʼ de tiempu completu ne biyubi gánnaluʼ gunáʼ nga ca requisitu para ganda gúniluʼ ni. De racá bicaa xi caquiiñeʼ gúniluʼ para ugaandaluʼ meta ca. Pa gúniluʼ dxiiñaʼ de tiempu completu, zápaluʼ stale oportunidad para gúniluʼ jma lu xhiiñaʼ Jehová.

18. ¿Xiñee risaca nga guʼyaʼ chaahuiʼ ti hermana tu guichaganáʼ? (Biiyaʼ imagen ca)

¹⁸ Zanda quixhe íqueluʼ guichaganaluʼ. Ca cualidad ne ca habilidad ni maʼ bidúʼyanu hasta nagasi zanda gacané ca ni lii gácaluʼ ti buena gunaa para xheelaluʼ. Dxandíʼ, pa racaláʼdxiluʼ guichaganaluʼ, zanda gápaluʼ cuidadu ora cuiʼluʼ tu guichaganaluʼ. Naca ni tobi de ca decisión jma risaca lu xquendanabániluʼ. Cadi guianda lii, hombre ni chichaganaluʼ nga chigaca xaíque ndaaniʼ lídxiluʼ (Rom. 7:2; Efes. 5:​23, 33). Nga runi, galán pa guiníʼ íqueluʼ: «¿Ñee nácabe ti xpinni Cristu ni maʼ biniisi ndaaniʼ xquidxi Dios la? ¿Ñee ni jma risaca lu xquendanabánibe nga ca cosa stiʼ Dios la? ¿Ñee jneza ca decisión ricaabe la? ¿Ñee rudiibe cuenta ra rucheebe la? ¿Ñee runi respetarbe ca gunaa la? ¿Ñee zanda gudiibe naa ni caquiiñeʼ para chuaaʼ gaxha de Dios, ni caquiiñeʼ para guibaneʼ ne para guneʼ sentir galán la? ¿Ñee runi cumplirbe ca dxiiñaʼ ni maʼ gucuaabe ndaaniʼ xquidxi Dios casi ca privilegiu nápabe ne ximodo runi cumplirbe ca ni la?» (Luc. 16:10; 1 Tim. 5:8). Nga runi, pa racaláʼdxiluʼ guidxélaluʼ ti buen hombre para guichaganaluʼ naquiiñeʼ gúniluʼ stipa para gácaluʼ ti buena gunaa.

19. Ora racané ti gunaa xheelaʼ, ¿xiñee zanda guininu nácani ti ndaayaʼ?

¹⁹ Biblia ruzeeteʼ ti buena gunaa nga tobi ni racané xheelaʼ (Gén. 2:18). ¿Ñee runi nga menu ti gunaa la? Coʼ xa, nácani ti ndaayaʼ para laabe. Biblia ná naca Jehová ti Dios ni «racané» (Éx. 14:4; Heb. 13:6). Ti gunaa ni dxandíʼ peʼ racané xheelaʼ runi apoyar ca decisión ni ricaabe ndaaniʼ familia ne riree guirá ca ni jneza. Cumu nadxii gunaa riʼ Jehová la? ruyubi ximodo cadi guiníʼ binni mal de xheelaʼ (Prov. 31:​11, 12; 1 Tim. 3:11). Pa caníʼ íqueluʼ guichaganaluʼ la? zanda gúniluʼ guiráʼ ni nuu lu naluʼ para gannaxhiiluʼ Jehová jma ne dede ca yanna zanda gúniluʼ stipa para gacaneluʼ ndaaniʼ lídxiluʼ ne ndaaniʼ congregación.

20. ¿Ximodo zanda gacané ti gunaa familia stiʼ?

²⁰ Zanda gápaluʼ xiiñiluʼ. Pa guichaganaluʼ, zanda gueeda gápaluʼ xiiñiluʼ (Sal. 127:3). Nga runi, galán guiníʼ íqueluʼ ximodo zanda gusiniisiluʼ xiiñiluʼ jneza. Ca cualidad ne ca habilidad ni bidúʼyanu lu artículo riʼ, guizáʼ zacané ca ni lii. Pa gannaxhiiluʼ, gácaluʼ nadóʼ, ne gápaluʼ paciencia la? zacaneluʼ chuʼ familia stiluʼ nayecheʼ ne zacá zaniisi ca xiiñiluʼ galán ne zuni sentircaʼ nadxiiluʼ laacaʼ (Prov. 24:3).

21. ¿Pabiáʼ rusisácaluʼ ca hermana stinu ne xiiñeʼ? (Biiyaʼ ca imagen ni zeeda lu portada).

²¹ Hermana joven, guizáʼ nadxiidu laatu pur guiráʼ ni rúnitu pur Jehová ne pur xquidxi (Heb. 6:10). Rúnitu stipa pur gápatu cualidad galán, riziiditu xiixa dxiiñaʼ ni gacané laatu, ne gacané ca ni nuu gaxha de laatu ne riuutu listu para ca cosa ni zándaca guizaaca despué. ¡Guizáʼ risácatu para xquidxi Jehová!