¡Zanda gúniluʼ ni jneza!: Ni rinanda stale binni

Stale binni nanna nuu cosa ni jneza ne ni cadi jneza. Nabé ridxiichi binni ora rilaxoocabe tuuxa, ora ruuticabe binni ne ora rilaxoocabe ca xcuidihuiiniʼ. Peru nabé riuuláʼdxicaʼ ora gúʼyacaʼ nachaʼhuiʼ tuuxa o nabé racané xcaadxi binni ne laaca riuuláʼdxicaʼ gaca ni jneza. Peru, ¿laga xcaadxi decisión ni ricaa binni lu xquendanabani yaʼ? Casi ora guiníʼ ique tuuxa tu gapané relación sexual, o pa zaníʼ ni dxandíʼ o pa coʼ o ximodo gusiniisi binni ca xiiñiʼ. Stale binni riníʼ ique jneza nga guni intiica cosa ne gastiʼ ti regla ni gabi binni ti tipu si decisión naquiiñeʼ guicaa lu guiráʼ cosa. Nga runi nuu stale binni ricaa xiixa decisión según ni riníʼ ique o ni riníʼ ique xcaadxi binni. Peru ¿ñee jneza gúninu zacá la?

NI JNEZA PARA TI BINNI

Stale biaje la? para guicaanu decisión rúninu ni ná xquendabiaaninu o conciencia stinu, laani nga ni rabi laanu xii nga ni jneza ne ni cadi jneza (Romanos 2:​14, 15). Dede ca xcuidi ca nánnacaʼ ora cayaca xiixa ni cadi jneza, ne ora rúnicaʼ xiixa ni cadi jneza la? runi sentircaʼ nápacaʼ donda. Ne ora maʼ ziniisinu la? nuu caadxi cosa ni ruchaa modo riníʼ íquenu o conciencia stinu, casi religión stinu, ra biniisinu, ni bisiidiʼ familia stinu laanu, ca compañeru stinu, ca maestru stinu o ca vecinu stinu. Nga runi, ora maʼ gucuaanu ti decisión la? maʼ conciencia ca nga rabi laanu pa gucuaanu ni según ni maʼ bisiidicabe laanu o pa coʼ.

Ne laaca conciencia stinu nga ni rucaa laanu gacanenu xcaadxi binni, gudiʼnu xquixe peʼ, gúninu ni jneza ne guianu binni. Laaca zanda gacaneni laanu para cadi gúninu xiixa ni guniná ca binni ni nadxiinu, o ni gusituí lunu o ni gucaa laanu guni sentirnu nápanu donda.

¿Ñee ni riníʼ íquenu nga ni jma jneza gúninu la? Guidúʼyanu xi bizaaca Garrick, dxi nahuiinibe bibánibe modo ná íquebe. Peru despué, biiyabe cadi galán diʼ nabánibe pur zinándabe modo ná íquebe. Purtiʼ biábabe lu caadxi cosa ni cadi jneza, sicaríʼ guniʼbe: «Casi ñaca ñuaaʼ lu ti neza nacahuidóʼ, guyuaaniáʼ ni cadi xheelaʼ, guduʼbaʼ droga, guxudxeʼ ne nabé bicaaluaʼ binni».

NI JNEZA PARA XCAADXI BINNI

Aparte de gúninu ni ná xquendabiaaninu o conciencia stinu ora chiguicaanu ti decisión, nuu biaje laaca riníʼ íquenu ximodo guʼyaʼ binni ni chigúninu ca. Pa gúninu zacá la? zazíʼdinu xi huayacané xcaadxi binni. Pa gúninu ni jneza para familia stinu, ca xhamígunu ne ca vecinu stinu la? zuni respetárcabe laanu.

¿Ñee galán nga gúninu ni ná xcaadxi binni guiráʼ biaje la? Guidúʼyanu ni bizaaca Priscila, dxi nahuiinibe rúnibe ni runi ca xhamígube; para laacaʼ la? gastiʼ naca nga gapa tuuxa relación sexual ante guichaganáʼ. Peru despué, bidiibe cuenta cadi nabánibe nayecheʼ pur zinándabe modo riníʼ ique xcaadxi binni. Sicaríʼ guniʼbe: «Cumu yenandaʼ ni ná xcaadxi binni la? qué ñuneʼ sentir galán. Gucuaa decisión huati ne guluaaʼ guendanabani stinneʼ ra naxoo».

¿ÑEE NUU MODO ZANDA GÁNNANU PA JNEZA NI CHIGÚNINU LA?

Para gánnanu pa jneza ni chigúninu la? risaca nga ni riníʼ íquenu ne ni riníʼ ique xcaadxi binni, peru pa ngasi nga ni riníʼ íquenu para guicaanu decisión la? zándaca qué zaree ni laanu galán. Ne nuu biaje qué randa ridúʼyanu pabiáʼ zuniná ca decisión stinu laanu o pabiáʼ zuniná ca ni xcaadxi binni (Proverbios 14:12). Ne pa nuu xiixa ni rábinu jneza o ni riníʼ ique xcaadxi binni jneza la? zándaca laaca cadi biaʼsi peʼ ni ne qué gánnanu pa zuchaa ni ra zidiʼdiʼ dxi. Purtiʼ dxiqué la? nuu caadxi cosa ni ruuyaʼ binni cadi jneza, peru yanna para stale binni la? maʼ gastiʼ naca pa gúninu ca ni. Ne caadxi cosa ni runi binni dxiqué, para laacaʼ normal ca ni, peru yanna maʼ cadi jneza modo ruuyaʼ binni ca ni.

Peru ¿ñee nuu xiixa ni zanda gacané laanu para gánnanu xii nga ni jneza ne ni cadi jneza la? ¿Ñee nuu caadxi cosa ni zanda guizíʼdinu para gacané laanu guicaanu decisión ni qué zuniná laanu la?

Nuu xiixa ni qué ruchee, ne zanda gacané ni laanu, biaʼ tiica iza nápanu ne ra tiica nuunu. Zacané sti artículo ca laanu gunibiaʼnu xiixa ni zacané laanu gúninu ni jneza lu guendanabani stinu.