Ximodo zanda guidxélaluʼ ti binni biaʼsi para guichaganaluʼ

1, 2. a) Pa cá ique ti xpinni Cristu guichaganáʼ, ¿xi naquiiñeʼ guiníʼ ique ante? b) ¿Xi riénenu zeeda gaca ti noviazgu? (Biiyaʼ «Idea risaca»).

¿ÑUULÁʼDXILUʼ nichaganaluʼ la? Neca cadi caquiiñeʼ guichaganáʼ tuuxa para guibani nayecheʼ la? peru stale hermanu ne hermana de gadxé gadxé iza nápacaʼ gana guichaganacaʼ. Peru ante guiníʼ íqueluʼ guichaganaluʼ la? naquiiñeʼ chuʼluʼ gaxha de Jehová, gunibiáʼ chaahuiluʼ lii ne gánnaluʼ laaca riquiiñeʼ ni bueltu (1 Cor. 7:36).a Pa guiníʼ íqueluʼ ca cosa ni bizéʼtenu riʼ la? zándaca jma galán guibanineluʼ xheelaluʼ.

² Ni dxandíʼ la? raca nagana guidxela tuuxa ti binni ni biaʼsi peʼ para guichaganáʼ (Prov. 31:10). Ne pa rábiluʼ nuu tuuxa ni racaláʼdxiluʼ gunibiaʼluʼ jma la? zándaca cadi fácil nga guzulutu gácatu novio.b Lu artículo riʼ zadúʼyanu xi zacané ti solteru pa cá ique gapa novia. Ne laaca zadúʼyanu ni naquiiñeʼ guni ca hermanu de congregación para gacanecaʼ ca ni racalaʼdxiʼ guichaganáʼ.

XI ZACANÉ LII GUIDXÉLALUʼ TI BINNI BIAʼSI PEʼ PARA LII

3. ¿Xi naquiiñeʼ guiníʼ ique ti xpinni Cristu ante guzulú guyubi tuuxa para guichaganáʼ?

³ Ante guiníʼ íqueluʼ gápaluʼ novio o novia la? guníʼ ique xi cualidad ñuuláʼdxiluʼ ñapa binni ni chiguichaganaluʼ ca. Purtiʼ zándaca guyadxiluʼ tuuxa ni cadi biaʼsi para lii o zándaca guzululuʼ guireeneluʼ tuuxa ni qué gapa ca cualidad ni cabézaluʼ. Ti cosa ni cadi naquiiñeʼ guiaandaʼ lii nga naquiiñeʼ gácabe ti Testigu ni maʼ guyuunisa (1 Cor. 7:39). Peru nga cadi caníʼ diʼ tu tiica binni ni maʼ guyuunisa biaʼsi para lii. Galán guiníʼ íqueluʼ ca pregunta riʼ: «¿Gunáʼ nga ca meta ni napaʼ? ¿Xi cualidad naquiiñeʼ gapaʼ binni ni cuyubeʼ? ¿Ñee stale peʼ cabeza de binni ni cuyubeʼ ca la?».

4. ¿Xii nga ni huanabaʼ caadxi solteru lu oración?

⁴ Pa nuuluʼ guichaganaluʼ, zándaca maʼ biʼniʼ orarluʼ Jehová ne gúdxiluʼ ni laabe (Filip. 4:6). Dxandíʼ, Jehová qué huayuni prometer diʼ zudii tuuxa ti xheelaʼ. Peru rizaaláʼdxibe ni runi sentirluʼ ne nánnabe xi caquiiñeluʼ, zanda gacanebe lii para guidxélaluʼ tuuxa para guichaganaluʼ. Nga runi cadi gusaana de guni orarluʼ ne gudxi Jehová ni runi sentirluʼ (Sal. 62:8). Gunabaʼ laabe gudiibe lii paciencia ne guendabiaaniʼ (Sant. 1:5). John,c ti hermanu solteru de Estados Unidos guníʼ xi rinabaʼ lu ca oración stiʼ. Laabe nabe: «Rabeʼ Jehová xii nga ca cualidad ni racalaʼdxeʼ gapa hermana ca. Rinabaʼ laabe ganda gunebiaʼyaʼ tuuxa. Ne laaca rabeʼ laabe gacanebe naa gapaʼ ca cualidad ni gacané naa ti guneʼ tratar xheelaʼ galán para ora guichaganaʼyaʼ». Ti hermana láʼ Tanya de guidxi Sri Lanka ná: «Rinabaʼ Jehová cadi guixeleʼ de laa, chuaaʼ nayecheʼ laga cabezaʼ guneʼ biaʼyaʼ binni ni guichaganaʼyaʼ». Yanna, ¿pa maʼ gudiʼdiʼ tiempu de cuyúbiluʼ ne caʼruʼ guidxélaluʼ guirutiʼ yaʼ? Cadi guiaandaʼ lii cayabi Jehová lii zudiibe ni caquiiñeluʼ ne zaguixhedxibe ladxidoʼloʼ (Sal. 55:22).

5. ¿Xi zacané ca solteru gunibiaʼcaʼ binni ni nadxii Jehová? (1 Corintios 15:58; biiyaʼ imagen ca).

⁵ Ruzeeteʼ Biblia cadi gusaana de gúninu «xhiiñaʼ Señor» (biindaʼ 1 Corintios 15:58). Pa chinándaluʼ conseju riʼ, zápaluʼ oportunidad de gunibiaʼluʼ stale hermanu ne hermana. Zaca xhamíguluʼ laacabe ne laaca zunibiaʼluʼ xcaadxi xpinni Cristu solteru ni cayúnicaʼ xhiiñaʼ Jehová. Ne cumu laaca cayúniluʼ guiráʼ ni nuu lu naluʼ para gusiécheluʼ Jehová la? dxandíʼ peʼ ziuuluʼ nayecheʼ.

6. ¿Xi cadi naquiiñeʼ guiaandaʼ ca solteru ni cuyubi guichaganáʼ?

⁶ Peru pa cá íqueluʼ guidxélaluʼ ti binni la? biʼniʼ ni, peru cadi gudiiluʼ lugar gácani ni jma risaca lu xquendanabániluʼ (Filip. 1:10). Ni rusiecheʼ ti xpinni Cristu nga gaca xhamigu Jehová ne cadi pa maʼ bichaganáʼ o pa solteru laa (Mat. 5:3). Laga caʼruʼ guichaganaluʼ zándaca gápaluʼ jma tiempu para gúniluʼ jma lu xhiiñaʼ Jehová (1 Cor. 7:​32, 33). Nga runi biquiiñeʼ tiempu stiluʼ jneza laga caʼruʼ guichaganaluʼ. Jessica, ti hermana de guidxi Estados Unidos, bichaganabe dxi mayaca gusaabe 40 iza, laabe nabe: «Ni gucané naa chuaaʼ nayecheʼ, neca napaʼ gana guichaganaʼyaʼ, nga gudixheʼ iqueʼ guneʼ predicar jma».

BIIYAʼ CHAAHUIʼ XIMODO LAABE

7. ¿Xiñee galán nga guʼyaʼ chaahuiluʼ tuuxa ante gábiluʼ laa xi runi sentirluʼ? (Proverbios 13:16).

⁷ Yanna pa maʼ bidxélaluʼ tuuxa ni ruluíʼ zanda guenda gaca xheelaluʼ yaʼ. ¿Ñee oraqueca zieluʼ zitídxiluʼ laabe nápaluʼ gana né laabe la? Rusiidiʼ Biblia ti binni nuu xpiaaniʼ la? primeru riziidiʼ ne despué runi xiixa (biindaʼ Proverbios 13:16). Nga runi galán gunibiaʼluʼ binni ca sin gudii cuenta, ante gábiluʼ laa ni runi sentirluʼ. Ti hermanu láʼ Albert ni nabeza Países Bajos guníʼ: «Yannadxí zanda guni sentirluʼ xiixa pur tuuxa peru zándaca guixíʼ maʼ coʼ. Nga runi jma galán cuézaluʼ ne gunibiáʼ chaahuiluʼ binni ca ne cadi casi zeluʼ guzululuʼ ti relación». Purtiʼ ra guʼyaʼ chaahuiluʼ laabe la? zándaca racá nga gudiiluʼ cuenta cadi laabe nga para lii.

8. ¿Xi zanda guni ti solteru pa cayuuyabe ximodo naca ti binni ni nuube gunibiaʼbe? (Biiyaʼ imagen ca).

⁸ Zándaca guiníʼ íqueluʼ sicaríʼ: «¿Xi zanda guneʼ para guuyaʼ chaahueʼ modo naca tuuxa yaʼ?». Zándaca ora maʼ nuube ra Yoo stiʼ Reinu, o ra cayaca ti reunión social zuuyaluʼ ximodo laabe, xi rúnibe o pabiáʼ nadxiibe Jehová. ¿Tuu nga ca xhamígube yaʼ? ¿Xii nga ni jma riniʼbe? (Luc. 6:45). ¿Ñee ngueca meta nápatu la? Laaca zándaca guiníʼneluʼ ca ancianu de ra congregación stibe o xcaadxi xpinni Cristu ni maʼ ziné iza ndaaniʼ xquidxi Jehová ne ni runibiáʼ chaahuiʼ laabe, ne guinabadiidxaluʼ laacaʼ xcaadxi cosa de laabe (Prov. 20:18). Zanda guinabadiidxaluʼ ca hermanu ca ximodo runibiáʼ binni laabe ne xii nga ca cualidad ni nápabe (Rut 2:11). Nga runi pa cayuuyadxiluʼ ti binni para gunibiáʼ chaahuiluʼ ximodo laa la? biiyaʼ cadi guni sentirbe nisi laabe cayuuyadxiluʼ o casi ora cundaachiluʼ laabe. Cadi gúniluʼ xiixa ni gucaa sti binni ca guni sentir mal, biʼniʼ respetar laabe ne cadi nisi maʼ nuuluʼ gánnaluʼ xi guiráʼ chiguni binni ca.

9. ¿Xii nga ni caquiiñeʼ gánnaluʼ ante gábiluʼ tuuxa xi runi sentirluʼ pur laa?

⁹ Yanna, ¿pabiáʼ tiempu nga caquiiñeʼ gúʼyaluʼ ximodo laabe ante gábiluʼ laabe riuuláʼdxiluʼ gunibiaʼluʼ laabe yaʼ? Pa gábiluʼ ni laabe nagueendaca la? zándaca zaníʼ íquebe qué riníʼ ique chaahuiluʼ ante gúniluʼ xiixa (Prov. 29:20). Peru pa maʼ bidii binni ca cuenta riuuláʼdxiluʼ laa ne qué naluʼ gábiluʼ ni laabe la? zándaca guiníʼ íquebe qué gánnaluʼ guicaaluʼ decisión (Ecl. 11:4). Cadi guiaandaʼ lii cadi tisi gábiluʼ tuuxa xi runi sentirluʼ pur laa maʼ caníʼ nga maʼ chiguichaganaluʼ laabe. Peru naquiiñeʼ chuʼluʼ seguru maʼ nuuluʼ listu para guendaxheelaʼ ne zándaca binni ca nga ni guichaganaluʼ.

10. ¿Xi naquiiñeʼ gúniluʼ pa gudiiluʼ cuenta riuulaʼdxiʼ tuuxa lii peru lii qué runi sentirluʼ gastiʼ pur laabe yaʼ?

¹⁰ Yanna, ¿pa gudiiluʼ cuenta riuulaʼdxiʼ tuuxa lii yaʼ? ¿Xi zanda gúniluʼ? Pa qué runi sentirluʼ xiixa pur laabe la? galán gusialuʼ diidxaʼ. Purtiʼ cadi jneza diʼ gúniluʼ xiixa ni gucaa binni ca guiníʼ ique riuuláʼdxiluʼ laa pa nánnaluʼ cadi zacá ni (1 Cor. 10:24; Efes. 4:25).

11. ¿Xi naquiiñeʼ gánnanu pa nabézanu ti lugar ra rinanda binni costumbre ni riete lu párrafo riʼ?

¹¹ Nuu chupa chonna lugar la? bixhoze ne jñaa binni o sti binnilidxi nga ribí tu guichaganáʼ. Nuu xcaadxi lugar la? familia stiʼ hombre o gunaa ca nga ruyúbicaʼ ti binni ni zándaca guichaganácabe, despué rúnicaʼ xiixa para gunibiáʼcabe ne maʼ de laacabe riaana pa guzulúcabe ti relación. Nga runi pa guinábacabe laanu gúninu xiixa casi ni guninu ca la? galán guiníʼ íquenu xi riuulaʼdxiʼ hombre ca ne gunaa ca ne xi caquiiñecaʼ. Yanna, pa rábinu maʼ bidxélanu ti binni biaʼsi peʼ para ti xhamígunu o ti familia stinu la? galán gunibiáʼ chaahuinu ximodo binni ca, xii nga ca cualidad ni nápabe ne ni jma risaca pabiáʼ nadxiibe Jehová. Purtiʼ pa nadxii binni ca Jehová la? nga nga ni jma risaca ne cadi pa nápabe bueltu, pa guzabe scuela o pa zeedabe de ti familia risaca. Peru cadi guiaandaʼ laanu ti cosa risaca, hombre ni naca solteru ne gunaa ni naca soltera ca nga guiniʼcaʼ pa zachaganacaʼ o pa coʼ (Gál. 6:5).

XIMODO GUZULÚ TUUXA GAPA NOVIO O NOVIA

12. Pa maʼ racaláʼdxiluʼ guzulú gunibiaʼluʼ tuuxa, ¿ximodo zanda gábiluʼ ni binni ni riuuláʼdxiluʼ ca yaʼ?

¹² Pa maʼ nápaluʼ gana guzulú gunibiaʼluʼ tuuxa, ¿ximodo zanda gábiluʼ ni binni ni riuuláʼdxiluʼ ca yaʼ?d Zándaca naquiiñeʼ guiníʼneluʼ laabe, ¿ximodo yaʼ? zanda gúnitu ni ti lugar ra nuu stale binni o guiníʼneluʼ laabe pur teléfono o gúnitu ti videollamada. Bisiá diidxaʼ ne guníʼ riuuláʼdxiluʼ laabe ne nuuluʼ gunibiáʼ chaahuiluʼ laabe (1 Cor. 14:9). Pa gábibe lii caquiiñeʼ guiníʼ íquebe ni la? bidii laabe tiempu ni caquiiñebe (Prov. 15:28). Ne pa gábibe lii qué gápabe gana gápabe novio la? biʼniʼ respetar ni nabe ca.

13. ¿Xi zanda gúniluʼ pa gabi tuuxa lii riuulaʼdxiʼ lii? (Colosenses 4:6).

¹³ ¿Xi zanda gúniluʼ pa gabi tuuxa lii riuuláʼdxibe lii yaʼ? Cadi guiaandaʼ lii gúpabe stale valor para gábibe lii xi cayuni sentirbe, nga runi guca nachaʼhuiʼ ne biʼniʼ respetar laabe (biindaʼ Colosenses 4:6). Ne pa caquiiñeluʼ tiempu para guiníʼ íqueluʼ ni la? galán gábiluʼ ni laabe. Cadi gudiiluʼ lugar tidiʼ stale tiempu para gudiiluʼ laabe ti respuesta (Prov. 13:12). Pa qué gápaluʼ gana né binni ca la? gudxi ni laabe né diidxaʼ nadóʼ ne bisiene chaahuiʼ ni laabe. Ndiʼ nga guníʼ ti hermanu láʼ Hans de guidxi Austria, dxi gudxi ti hermana laabe racalaʼdxiʼ gunibiáʼ laabe jma: «Né stale diidxaʼ nadóʼ bisieneʼ laabe naa qué gapaʼ gana gunebiaʼyaʼ tuuxa. Ne bineʼ ni nagueendaca para cadi guiníʼ íquebe racalaʼdxeʼ xiixa né laabe. Ngue runi dede dxi que nabé guyuaaʼ cuidadu para cadi guinieeʼ o guneʼ xiixa ni gucaa laabe guiníʼ íquebe napaʼ gana né laabe». Yanna, ¿pa rábiluʼ zanda gácatu novio yaʼ? Galán gábiluʼ binni ca xi runi sentirluʼ ne ximodo racaláʼdxiluʼ gácatu novio. Nga runi ora maʼ napa tuuxa novio o novia la? gadxé gadxé nga ni zaguixhe íquecaʼ gúnicaʼ según guidxi ra nabézacaʼ.

¿XIMODO ZANDA GACANENU CA SOLTERU?

14. ¿Xi caquiiñeʼ gúninu pa dxandíʼ racaláʼdxinu gacanenu ca solteru?

¹⁴ ¿Xi zanda gúninu para gacanenu ca solteru ni napa gana guichaganáʼ? Primé la? chuʼnu cuidadu xi rábinu laacabe (Efes. 4:29). Guiníʼ íquenu ndiʼ: «¿Ñee rinieeʼ xiixa chiste ni zándaca guniná laacabe la? Ora guuyaʼ maʼ caniʼné ti solteru ti soltera, ¿ñee nagueendaca riníʼ iqueʼ maʼ nuu xiixa entre laacabe la?» (1 Tim. 5:13). Peru laaca cadi guininu xiixa ni gucaa ti hermanu guni sentir cayaadxaʼ xiixa lu xquendanabani purtiʼ si caʼruʼ guichaganáʼ. Ndiʼ nga ni guníʼ Hans, hermanu ni bieeteʼ lu párrafo ni gudídinu ca: «Nuu chupa chonna hermanu riniʼcaʼ: “¿Xiñee caʼruʼ guichaganaluʼ pue? Biiyaʼ na? maʼ ziniisiluʼ, biiyaʼ qué chiguiaanaluʼ na?”. Pa guiníʼ tuuxa zacá, zucaabe ca solteru ca guni sentircaʼ qué risácacaʼ purtiʼ si caʼruʼ guichaganacaʼ ne zándaca guni sentircaʼ guiuba caquiiñeʼ guichaganacaʼ». Raca ridúʼyanu, ni jma galán nga guininu xiixa cosa ni cuʼ gana laacabe (1 Tes. 5:11).

15. a) Casi ná Romanos 15:​2, ¿xi naquiiñeʼ gúʼyanu ante gacanenu tuuxa para guidxela tu guichaganáʼ? (Biiyaʼ imagen ca). b) ¿Xi jma guyuuláʼdxiluʼ de videu ca? (Biiyaʼ nota ca).

¹⁵ Yanna, ¿pa guiníʼ íquenu galán peʼ pa nichaganáʼ ti hermanu tuuxa hermana yaʼ? Rusiidiʼ Biblia galán guiníʼ íquenu xi runi sentir xcaadxi binni (biindaʼ Romanos 15:2). Stale solteru qué riuuláʼdxicaʼ guni presentar tuuxa laacaʼ ti binni ni zanda gueeda gaca xnóviacaʼ ne galán nga guni respetarnu decisión sticaʼ (2 Tes. 3:11). Nuu tu laa la? ziuulaʼdxiʼ gacanécabe laa, peru zanda gúninu ni pa laapecabe guinábacabe ni laanu (Prov. 3:27).e Ne laaca nuu tu laa riuulaʼdxiʼ gacanécabe laa peru cadi para guni presentárcabe laa tuuxa. Ti hermana soltera láʼ Lydia de guidxi Alemania ná: «Zanda guni invitarluʼ hermanu ca ne hermana ca ora chizaneluʼ xcaadxi hermanu xiixa lugar. Lii biʼniʼ xiixa para chúʼcabe juntu ne maʼ lu nácabe riaana gacabiáʼcabe».

16. ¿Xi cadi naquiiñeʼ guiaandaʼ ca solteru ne soltera?

¹⁶ Pa solteru laanu o pa maʼ bichagananu, guiranu zanda guibáninu nayecheʼ (Sal. 128:1). Nga runi, pa racaláʼdxiluʼ guichaganaluʼ ne caʼruʼ guidxélaluʼ binni ni biaʼsi para guichaganaluʼ la? galán quixhe íqueluʼ gúniluʼ jma lu xhiiñaʼ Jehová. Ti hermana láʼ Sin Yi de guidxi Macao ná: «Ndaaniʼ Paraísu la? pa siempre nga zabanineluʼ xheelaluʼ. Nga runi, bisisaca tiempu nácaluʼ solteru ne guyuu nayecheʼ purtiʼ ti tiempu si rindaa ni». Peru ¿pa maʼ bidxélaluʼ ti binni ne maʼ bizulú cayunibiaʼluʼ laabe yaʼ? Lu sti artículo ca zaninu ximodo zanda cueenduluʼ ni galán ora canazaluʼ de novio.