Cadi gusaana de guni predicarnu pur guendarannaxhii

1. ¿Xi bizíʼdinu lu reunión anual stiʼ iza 2023?

¡AQUE sicarú guca reunión anual stiʼ iza 2023!a Luni bisiene chaahuicabe laanu caadxi cosa ni runi crenu ne gudiʼdiʼ caadxi anunciu ni caníʼ de predicación stinu. Raqué nga bisiénecabe laanu zándaca ziuu binni ni zuni ni ná Jehová despué de guinitilú Babilonia guidxi roʼ. Laaca lu reunión ca nga gúdxicabe laanu dede lu beeu noviembre de 2023, maʼ qué zuni informarnu guiráʼ ni rúninu ora guni predicarnu. Yanna, pur guiráʼ ni maʼ bidxaa ca, ¿ñee cayabi nga laanu maʼ cadi naquiiñeʼ guni predicarnu né stale gana casi bíninu ni dxiqué la? ¡Coʼ, cadi zacá ni!

2. ¿Xiñee jma nagueenda naquiiñeʼ guni predicarnu cada dxi tidiʼ? (Marcos 13:10).

² Cada dxi tidiʼ, jma nagueenda caquiiñeʼ guni predicarnu. ¿Xiñee yaʼ? Purtiʼ jma maʼ huaxiéʼ tiempu riaana. Guiníʼ íquenu ximodo guníʼ Jesús zaca predicar lu ca últimu dxi riʼ casi ná Marcos 13:10 (Biindaʼ ni). Mateo laaca bicaa ca diidxaʼ ni guníʼ Jesús ca, ne bicaabe guníʼ Jesús zaca predicar ca noticia nacubi ne galán ca lu guidubi naca Guidxilayú ante gueeda «fin» (Mat. 24:14). Ni caníʼ ca diidxaʼ riʼ nga ora guinitilú guidxilayú malu stiʼ Binidxabaʼ. Maʼ gudixhe Jehová «padxí ne pora» chiguizaaca guiráʼ cosa ni guníʼ (Mat. 24:36; 25:13; Hech. 1:7). Jma huaxiéʼ dxi riaadxaʼ para gueeda fin (Rom. 13:11). Peru laga caʼruʼ gueeda fin ca la? cadi naquiiñeʼ gusaana de guni predicarnu.

3. ¿Xiñee runi predicarnu?

³ Nuu ti cosa nabé risaca ni caquiiñeʼ guiníʼ ique guiranu: ¿Xiñee runi predicarnu ca noticia galán? Rúninu ni pur guendarannaxhii. Nga runi, ora runi predicarnu rusihuínninu risaca ca noticia galán ca para laanu, nadxiinu binni ne nadxiinu Jehová ne labe. Guidúʼyanu cada tobi de laacani.

RUNI PREDICARNU PURTIʼ RISACA CA NOTICIA GALÁN CA PARA LAANU

4. ¿Xi runi sentirnu ora gábicabe laanu ti noticia galán?

⁴ Guníʼ ique últimu biaje bidiicabe lii ti noticia galán. Zándaca gúdxicabe lii gule ti baʼduhuiiniʼ ndaaniʼ familia stiluʼ, o bidxélaluʼ ti dxiiñaʼ ni maʼ xadxí de cuyúbiluʼ. ¿Ximodo biʼniʼ sentirluʼ? Zándaca guizáʼ biécheluʼ dede pa ñanda si maʼ ñábiluʼ ni ca binnilídxiluʼ ne ca xhamíguluʼ. ¿Cadi dxandíʼ nga ca nga ni biʼniʼ sentirluʼ dxi binadiágaluʼ ca noticia galán ni jma galán huayábicabe lii la? Xi laacani yaʼ: laacani nga ca noticia galán stiʼ Reinu stiʼ Dios

5. ¿Xi biʼniʼ sentirluʼ dxi bíʼndanécabe lii Biblia? (Biiyaʼ ca imagen ca).

⁵ Guníʼ ique xi biʼniʼ sentirluʼ dxi cayuundanécabe lii Biblia. Biziidiluʼ nadxii Jehová lii ne racaláʼdxibe chuʼluʼ lade ca binni ni runi adorar laabe, ne laaca maʼ guniʼbe zabeebe yuubaʼ ne guiráʼ ni runiná binni ne ndaaniʼ guidxilayú cubi ca zandísabe ca binnilídxiluʼ ni maʼ guti (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). Yendá guiráʼ ni ndaaniʼ ladxidoʼloʼ (Luc. 24:32). Bizulú gunnaxhiiluʼ guiráʼ cosa risaca ni caziidiluʼ ne pa ñanda si maʼ ñábiluʼ ni guiráʼ xixé binni (bichaaga ni né Jeremías 20:9).

6. ¿Xi rusiidiʼ ni bizaaca Ernest ne Rose laanu?

⁶ Guidúʼyanu ni bizaaca ti hermanu láʼ Ernest.b Laabe nabe dxi nápabe chii iza, guti bixhózebe. Ne ndiʼ nga ni guniʼbe: «Riníʼ iqueʼ: “¿Ñee zebe guibáʼ la?”. “¿Ñee maʼ qué ziuuruʼ dxi guuyaʼ laabe la?”. Ridxiicheʼ ora ruuyaʼ ca baʼduhuiiniʼ nabani bixhoze ne jñaa». Casi guiráʼ dxi riebe ra baʼ stiʼ bixhózebe, ruzuxíbibe ne runi orarbe: «Dios, canabaʼ lii gaʼbuʼ naa para nuu bixhozeʼ». Dxi maʼ nápabe biaʼ 27 iza, gudxi ca Testigu laabe pa zuundanecaʼ laabe Biblia, ne nagueenda guniʼbe zanda. Guizáʼ biéchebe ora biziidibe maʼ qué ganna ca binni ni maʼ guti ca gastiʼ, casi ñaca nisiaasicaʼ, ne rusiidiʼ Biblia zedandá dxi ziásacaʼ (Ecl. 9:​5, 10; Hech. 24:15). ¡Raqué ruʼ nga biziidibe xiñee rizaaca ca cosa ni qué rusisiaasiʼ laabe que! Nabé nayecheʼ guyuube pur guiráʼ ni caziidibe. Despué, Rose, xheelabe laaca bizulú cayuni estudiar Biblia ne laaca guizáʼ cayuulaʼdxiʼ guiráʼ ni caziidiʼ que. Despué, lu iza 1978, guyuunisa guirópacabe. Cumu nabé nuucabe gana la? bizulú caniʼnécabe ca binnilídxicabe de ca ni runi crécabe, ca xhamígucabe ne tutiica si náʼ gucaadiaga laacabe. Ne dede dxiqué hasta yanna, maʼ gucané, Ernest ne Rose jma de 70 binni para gunibiaʼcaʼ Jehová ne chuʼnísacaʼ.

7. ¿Xi zúninu pa dxaʼ tipa ladxidoʼno de guendarannaxhii pur ni cazíʼdinu lu Biblia? (Lucas 6:45).

⁷ Nga runi, pa dxaʼ tipa ladxidoʼno de guendarannaxhii pur guiráʼ ni cazíʼdinu de lu Biblia la? nga nga ni zucaa laanu gábinu ni binni (biindaʼ Lucas 6:45). Runi sentirnu ni biʼniʼ sentir ca xpinni Cristu ni bibani lu primé siglu, dxi guniʼcaʼ: «Qué zusaanadu de guinidu de ca cosa ni maʼ bidúʼyadu ne ni maʼ binadiágadu» (Hech. 4:20). Nabé rusisácanu guiráʼ ni maʼ bisiidiʼ Jehová laanu, ngue runi racaláʼdxinu gábinu ni guiráʼ binni.

RUNI PREDICARNU PURTIʼ NADXIINU BINNI

8. ¿Xi rucaa laanu chinenu ca noticia galán ca ra nuu binni? (Biiyaʼ cuadru ni láʼ: «Gunnaxhii binni: bisiidiʼ laacabe»; biiyaʼ imagen ca).

⁸ Laanu laaca nadxiinu binni cásica Jehová ne Jesús (Prov. 8:31; Juan 3:16). Rianu ca binni ni qué gapa esperanza ne ni qué runibiáʼ Dios (Efes. 2:12). Zanda guininu cayáticabe guiiguʼ, pur guiráʼ problema ni nuu lu xquendanabani binni ne laanu nga canacaanu salvavida ni caquiiñecabe: laani nga ca noticia galán stiʼ Reinu stiʼ Dios. Cumu nadxiinu binni ne rianu laacaʼ la? nga nga ni rucaa laanu gúninu guiráʼ ni nuu lu nanu para ganda gucaadiágacabe stiidxaʼ Dios. Nabé risaca ca noticia galán riʼ purtiʼ zanda gacané ni binni gatadxí ladxidóʼ, zacané ni laacaʼ guibánicaʼ nayecheʼ nagasi ne zanda gápacaʼ ti oportunidad despué para guicaacaʼ «guendanabani ni dxandíʼ guendanabani» ndaaniʼ guidxilayú cubi (1 Tim. 6:19).

9. ¿Xi ritídxinu binni chiguizaaca ne xiñee? (Ezequiel 33:​7, 8).

⁹ Laaca guendarannaxhii ca nga rucaa laanu quíxhenanu binni zedandá dxi zanitilú guidxilayú malu riʼ (biindaʼ Ezequiel 33:​7, 8). Nabé riuʼnu triste ora ridúʼyanu qué rudii ca binni ni nabeza lu territorio stinu cuenta, ne nin ca binnilídxinu ni cadi testigu xi guiráʼ chiguizaaca huidxe si. Mateo 24:21 rabi laanu «ziuu stale yuubaʼ» o ti gran tribulación ne «dede dxi bizulú guidxilayú hasta nagasi, qué huayuu dxi chuʼ yuubaʼ casi laani ne maʼ qué ziuuruʼ dxi gaca ni sti biaje». Racaláʼdxinu gánnacabe xi guiráʼ chiguizaaca lu tiempu de juiciu ca: primé zanitilú guiráʼ religión ni qué rusiidiʼ ni dxandíʼ ne despué zanitilú guidxilayú malu stiʼ Binidxabaʼ lu Armagedón (Apoc. 16:​14, 16; 17:​16, 17; 19:​11, 19, 20). Nga runi, rinábanu Jehová chuʼ stale binni ni gucaadiaga laanu ne gúnicaʼ ni nabe cásica cayúninu ni nagasi. Peru, ¿xi guizaaca ca binnilídxinu ne ca binni ni qué naʼ gucaadiaga stiidxaʼ Reinu tiempu riʼ yaʼ?

10. ¿Xiñee risaca cadi gusaana de quíxhenanu binni?

¹⁰ Casi bizíʼdinu lu artículo ni gudiʼdiʼ ca, zándaca quixheʼ ique Jehová gulá ca binni ni guchaa modo nabani ora gúʼyacaʼ guinitilú Babilonia guidxi roʼ. Cumu zándaca zacá nga gaca ni la? nga racané laanu guiénenu yanna nga jma nagueenda caquiiñeʼ quíxhenanu binni. ¿Xiñee yaʼ? Guiníʼ íquenu ndiʼ: ni gábinu laacabe nagasi la? zándaca nga nga ni guietenaláʼdxicabe huidxe si (bichaaga ni né Ezequiel 33:33). Zándaca ca dxi ca guedasilú laacabe guiráʼ ni gúdxinu laacabe ne quixheʼ íquecabe gúnicabe ni ná Jehová cásica cayúninu ni ante gueeda fin. Zándaca guizaaca ni casi bizaaca xa hombre ni rapa ra cárcel ndaaniʼ guidxi Filipos que. Gúcabe xpinni Cristu despué de guca ti xu nabé naroʼbaʼ, nagasi zándaca nuu binni que naʼ gaca xpinni Cristu peru zándaca gácacabe ni ora guiniibi dxacha Guidxilayú riʼ ra guiaba Babilonia guidxi roʼ (Hech. 16:​25-34).

RUNI PREDICARNU PURTIʼ NADXIINU JEHOVÁ NE LÁ

11. ¿Ximodo nga rudiʼnu Jehová «gloria, honra ne poder»? (Apocalipsis 4:11; biiyaʼ ca imagen ca).

¹¹ Ndiʼ nga razón ni jma risaca nápanu ne pur laani nga runi predicarnu ca noticia galán ca: nadxiinu Jehová ne labe ni nayaguieʼ. Para laanu rusisácanu Dios ni nadxiinu nga ora runi predicarnu. Ne guiranu nannaʼ dxíchinu Jehová nga runi merecer guicaa «gloria, honra ne poder» (biindaʼ Apocalipsis 4:11). ¿Ximodo ndiʼ rudiʼnu Jehová gloria ne honra yaʼ? Rúninu ni ora guluinu binni prueba ni gucaa laa guni cré Jehová nga bizáʼ guiráʼ cosa ni nuu ne laa nga bidii laanu guendanabani. ¿Ne ximodo nga rudiʼnu laabe poder o stipa stinu yaʼ? Rúninu ni ra iquíʼñenu tiempu stinu, stipa stinu ne guiráʼ ni nápanu para guni predicarnu binni biaʼ zanda gúninu ni (Mat. 6:33; Luc. 13:24; Col. 3:23). Ni caninu raríʼ nga riuuláʼdxinu guinínenu binni de Dios ni nadxiinu. Peru laaca riuuláʼdxinu guininu de labe ne xi riníʼ ni. ¿Xiñee yaʼ?

12. ¿Ximodo runi santificarnu lá Jehová ora runi predicarnu?

¹² Cumu nadxiinu Jehová la? racaláʼdxinu guni santificarnu labe (Mat. 6:9). Ni caninu nga racaláʼdxinu gacanenu para guiá labe de guiráʼ cosa ni cadi dxandíʼ riníʼ Binidxabaʼ rúnibe (Gén. 3:​1-5; Job 2:4; Juan 8:44). Nga runi ora runi predicarnu né stale gana, runi defendernu Jehová ne rábinu ca binni ni riuulaʼdxiʼ gucaadiaga laanu ni dxandíʼ de laabe. Racaláʼdxinu ganna guiráʼ binni Dios nga guendarannaxhii, jneza modo runi mandarbe ne maʼ cadi candaa zunitilú Reinu stibe guiráʼ ni cayuniná binni ne zacanebe chuʼ paz ne guendanayecheʼ lu Guidxilayú riʼ (Sal. 37:​10, 11, 29; 1 Juan 4:8). Ora rúninu ca cosa ni bizéʼtenu ca, ora ca nga cayuni santificarnu o cusianu lá Jehová. Peru laaca ridxá tipa ladxidoʼno de guendanayecheʼ purtiʼ nánnanu cayúninu dxiiñaʼ ni bisaanané Jehová ca Testigu stiʼ. ¿Xiñee caninu ndiʼ yaʼ?

13. ¿Xiñee rusisácanu privilegiu ni nápanu de guiree lanu testigu stiʼ Jehová? (Isaías 43:​10-12).

¹³ Maʼ gulí Jehová laanu para gácanu ca testigu stiʼ (biindaʼ Isaías 43:​10-12). Ndiʼ nga ni gudxi Grupu ni Zániru laanu raca chupa chonna iza lu ti carta ni bicaa: «Ni jma risaca para laanu nga guiree laanu testigu stiʼ Jehová».c Guzéʼtenu ti ejemplu. Guiníʼ íquenu yenécabe laanu neza lu justicia purtiʼ guni tuuxa cayúninu xiixa cosa malu, ne caquíʼñenu ti testigu ni guiníʼ pur laanu. Zándaca gusendacanu ti binni ni runibiáʼ chaahuinu, ti binni de confianza, ti binni ni nabani jneza ti ganda guni crécabe ni guiníʼ. Zacaca nga Jehová, maʼ gulibe laanu para guininu ni dxandíʼ de laabe ne guininu laabe nga tobi lucha Dios ni dxandíʼ, purtiʼ runibiáʼ chaahuibe laanu ne nápabe confianza laanu. Para laanu nabé risaca nga gácanu testigu stiʼ Jehová, nga runi cadi gunítinu tiempu para gábinu binni tu labe ne guininu cadi dxandíʼ ca cosa malu ni riníʼcabe de laabe. Zacá nga zúninu dxiiñaʼ stinu: gácanu testigu stiʼ Jehová (Sal. 83:18; Rom. 10:​13-15).

QUÉ ZUSAANA DE GUNI PREDICARNU DEDE ORA GUEEDA FIN

14. ¿Xi guiráʼ cosa sicarú cabézanu guizaaca?

¹⁴ ¡Guizáʼ galán guiráʼ ni cabézanu guizaaca! Ne ndaayaʼ stiʼ Jehová cabézanu chuʼ jma binni guiziidiʼ ni dxandíʼ ante guzulú gran tribulación. Ne laaca riéchenu purtiʼ neca nagana nga guiráʼ ni chitidiʼ binni lu gran tribulación ca, zándaca chuʼruʼ binni ni guiree lu guidxilayú yooxhoʼ stiʼ Binidxabaʼ ca ne chuʼcaʼ ládenu para gusisácacaʼ Jehová (Hech. 13:48).

15, 16. ¿Xi qué zusaana de gúninu ne dede padxí?

¹⁵ Peru laga guedandá dxi ca, nápanu ti dxiiñaʼ ni gúninu. Gúninu dxiiñaʼ ni jma risaca ne ni qué ziuuruʼ dxi gaca, laani nga guni predicarnu ca noticia galán stiʼ Reinu stiʼ Dios lu guidubi Guidxilayú. Ne laga cayúninu ni la? cadi naquiiñeʼ gusaana de quíxhenanu binni maʼ zedayuba dxi guinitilú guidxilayú malu stiʼ Binidxabaʼ riʼ. Ora guedandá ora guni juzgar Jehová binni, óraque nga gudiicabe cuenta stiidxaʼ Jehová ngue yeguni predicarnu ra nuucabe (Ezeq. 38:23).

¹⁶ Nga runi, ¿xi naguixhe íquenu gúninu yaʼ? Cumu nabé rusisácanu ca noticia galán ca, nadxiinu binni, nadxiinu Jehová ne labe la? qué zusaana de guni predicarnu nagueendaca ne zúninu ni né stale gana dede ora guiníʼ Jehová: «¡Maʼ de raca si!».