¿Ñee nánnaluʼ pora nga cayábicabe lii ni dxandíʼ ne pora nga cusiguiicabe lii la?

1. ¿Xi runi sentirluʼ pur ni dxandíʼ?

CA XPINNI Jehová nadxiinu ni dxandíʼ ni zeeda lu Stiidxaʼ Dios ne runi crenu ni de guidubi ladxidoʼno (Rom. 10:17). Nuunu seguru gudixhestí Jehová congregación casi ti columna «ni runi apoyar ne runi defender ni dxandíʼ» (1 Tim. 3:15). Ne rinándanu guiráʼ ni gabi cani zániru ndaaniʼ xquidxi Dios purtiʼ rusiénecabe ni dxandíʼ zeeda lu Biblia ne rábicabe laanu xi naquiiñeʼ gúninu para gúninu ca cosa ni riuulaʼdxiʼ Dios (Heb. 13:17).

2. Casi ná Santiago 5:​19, ¿xi racalaʼdxiʼ Binidxabaʼ guni?

² Neca maʼ nánnanu ni dxandíʼ ne rúninu ni rabi xquidxi Dios laanu la? zándaca chuʼ tu gacalaʼdxiʼ guxheleʼ laanu de ni dxandíʼ (biindaʼ Santiago 5:19). Ñuulaʼdxiʼ Binidxabaʼ nusaanaʼ de ñuni crenu ni ná Biblia ne maʼ cadi ninándanu ni gabi xquidxi Jehová laanu (Efes. 4:14).

3. ¿Xiñee cadi naquiiñeʼ guixélenu de ni dxandíʼ? (Efesios 6:​13, 14).

³ (Biindaʼ Efesios 6:​13, 14). Maʼ cadi candaa zusiguii Binidxabaʼ stale guidxi para gucaalucaʼ Jehová (Apoc. 16:​13, 14). Laaca nánnanu zuyubi Binidxabaʼ ximodo quiteʼ ca xpinni Jehová (Apoc. 12:9). Nga runi nabé risaca gánnanu pora nga cayábicabe laanu ni dxandíʼ ne pora nga cusiguiicabe laanu ne cadi gusaana de guni crenu ni dxandíʼ (Rom. 6:17; 1 Ped. 1:22). Ndiʼ nga ti cosa ni naquiiñeʼ gúninu para ganda guilanu lu gran tribulación.

4. ¿Xi zazíʼdinu lu artículo riʼ?

⁴ Lu artículo riʼ, zadúʼyanu chupa cualidad ni naquiiñeʼ gusihuínninu para gánnanu gunáʼ nga ni dxandíʼ ni zeeda lu Biblia ne laaca zacanécani laanu para chinándanu ni gabi xquidxi Jehová laanu. Laaca zadúʼyanu chonna cosa ni naquiiñeʼ gúninu para guinaaze dxiichinu ni dxandíʼ.

CUALIDAD NI NAQUIIÑEʼ GUSIHUÍNNINU PARA GÁNNANU XII NGA NI DXANDÍʼ

5. ¿Xi zúninu pa ridxíbinu Jehová?

⁵ Guidxíbinu Jehová. Guidxíbinu Jehová riníʼ ni gannaxhiinu laabe ne qué chuʼ dxi gúninu xiixa ni qué riuuláʼdxibe. Racaláʼdxinu gánnanu gunáʼ nga ni jneza ne ni cadi jneza, gunáʼ nga ni dxandíʼ ne gunáʼ nga ni cadi dxandíʼ ti chuulaʼdxiʼ Jehová ca cosa ni rúninu (Prov. 2:​3-6; Heb. 5:14). Qué chuʼ dxi gudiʼnu lugar guchibi binni laanu ne dede gusaana de gannaxhiinu Jehová purtiʼ binni racalaʼdxiʼ si gúninu ni riuuláʼdxicaʼ ne cadi gúninu ca cosa ni riuulaʼdxiʼ Jehová.

6. ¿Xi bizaaca chii de ca hombre que pur bidxíbicaʼ binni ora yegundaachicaʼ layú que?

⁶ Pa gudiʼnu lugar guchibi binni laanu maʼ qué zadxíbinu Jehová ne zándaca zuni crenu cosa ni cadi zeeda de Jehová. Guínninu de ca doce hombre ni yegundaachiʼ layú ni biʼniʼ prometer Jehová ca israelita zudii laacaʼ. Chii de ca hombre ni guyé que nabé bidxíbicaʼ ca cananeu ne pur ngue bisaanacaʼ de gannaxhiicaʼ Jehová ne guniʼcaʼ: «Qué zanda diʼ quíbanu para gucáʼlunu ca binni ca, purtiʼ jma nadípacabe que laanu» (Núm. 13:​27-31). Dxandíʼ jma nadipaʼ ca cananeu qué ca israelita que peru ra guníʼcabe qué zanda gucaalúcabe ca enemigu stícabe, casi ñaca cusiaandacabe Jehová. Lugar de ngue la? niníʼ íquecabe xi racalaʼdxiʼ Jehová guni ca israelita. Laaca galán ñetenaláʼdxicabe xi guiráʼ maʼ biʼniʼ Jehová pur laacabe, pa ñúnicabe ndiʼ la? nudiicabe cuenta qué ñanda diʼ ñuni ganar ca cananeu que Dios ni jma nandxóʼ. Peru maʼ gadxé guca Josué ne Caleb, laacaʼ nápacaʼ fe ne racaláʼdxicaʼ gúnicaʼ ni riuulaʼdxiʼ Dios, ngue runi gúdxicabe guidxi que: «Pa cayechené Jehová laanu, dxandíʼ peʼ zinebe laanu lu layú ca ne zudiibe ni laanu» (Núm. 14:​6-9).

7. ¿Xi zacané laanu cadi gusaana de guidxíbinu Jehová? (Biiyaʼ imagen ca).

⁷ Ti cosa ni zacané laanu cadi gusaana de guidxíbinu Jehová nga gánnanu gunáʼ nga ca cosa ni riuuláʼdxibe ante guicaanu ti decisión (Sal. 16:8). Ora maʼ cayuundaluʼ ti relatu ni zeeda lu Biblia guníʼ ique: «¿Xi ñuneʼ pa ñuaaʼ racá yaʼ?». Guzéʼtenu ti ejemplu, bixuiʼlú cucaadiágaluʼ chii de ca hombre que. ¿Ñee ñuni creluʼ ni caníʼcabe que ne laaca nidxíbiluʼ la? ¿O nusihuínniluʼ nadxiiluʼ Jehová ne ñúniluʼ xiixa para nusiécheluʼ laabe? Guca nagana para guidxi Israel nudiicaʼ cuenta dxandíʼ ngue ni caníʼ Josué ne Caleb. ¿Xi bizaaca yaʼ? Qué ñuu ca israelita que lu Tierra Prometida (Núm. 14:​10, 22, 23).

8. ¿Xi cualidad naquiiñeʼ gusihuínninu, ne xiñee?

⁸ Gácanu humilde. Ruluíʼ Jehová ni dxandíʼ ca ni naca humilde (Mat. 11:25). Dxi bizíʼdinu ni dxandíʼ gúcanu humilde ne bidiʼnu lugar gacané xcaadxi laanu (Hech. 8:​30, 31). Neca zacá, naquiiñeʼ gápanu cuidadu cadi gácanu orgulloso purtiʼ ti binni zacá riníʼ ique biaʼca risaca ni riníʼ ne ca principiu zeeda lu Biblia ne ni rabi xquidxi Jehová laanu.

9. ¿Xi zacané laanu para cadi gusaana de gácanu humilde?

⁹ ¿Xi zacané laanu para cadi gusaana de gácanu humilde? Naquiiñeʼ guietenaláʼdxinu gastiʼ nga laanu de biaʼ nandxóʼ Jehová (Sal. 8:​3, 4). Laaca zanda guni orarnu Jehová para gacané laanu gácanu humilde ne gudiʼnu lugar gusiidibe laanu. Laaca zacanebe laanu guiníʼ íquenu modo riníʼ íquebe ra guidúʼndanu Stiidxabe ne ra chinándanu ni gabi xquídxibe laanu ne cadi gúnisinu ni racaláʼdxinu. Ora guidúʼndanu Biblia guyúbinu prueba ni gusihuinni riuulaʼdxiʼ Jehová gaca binni humilde ne nanaláʼdxibe ca orgulloso, ca ni rudxiibaʼ laca laa ne ca ni ruyubi guniná stobi. Ne pa nápaluʼ xiixa responsabilidad gupa cuidadu cadi gusaana de gácaluʼ humilde.

XI NAQUIIÑEʼ GÚNINU PARA GUINAAZE DXIICHINU NI DXANDÍʼ

10. ¿Tuu nga ca ni maʼ gulí Jehová para sánirucaʼ ndaaniʼ xquídxibe?

¹⁰ Gápanu confianza jneza ni rabi xquidxi Jehová laanu gúninu. Tiempu bibani ca israelita gulí Jehová Moisés ne despué gulibe Josué para gábibe ca israelita que xi naquiiñeʼ gúnicaʼ (Jos. 1:​16, 17). Ora ruuyaʼ ca israelita ca hombre riʼ casi ca hombre ni maʼ gulí Jehová la? rieni laacaʼ galán. Ne stale siglu despué, dxi guca primé congregación stiʼ ca xpinni Cristu que biquiiñeʼ Jehová ca doce apóstol para gabi xquidxi xi naquiiñeʼ guni (Hech. 8:​14, 15). Ne despué guyuu xcaadxi ancianu de Jerusalén ne cumu rinanda ca xpinni Cristu ni ná ca hermanu riʼ la? «zeʼ dxi jma naguidxi ziyaca fe stiʼ ca congregación que ne zeʼ dxi jmaruʼ si zidálecaʼ» (Hech. 16:​4, 5). Tiempu riʼ laaca riguu Jehová ndaayaʼ ca ni rinanda ni ná xquídxibe peru ¿ximodo zuni sentir Jehová pa qué guzúʼbanu stiidxaʼ ca hermanu ni zániru ndaaniʼ xquídxibe yaʼ? Para gánnanu ni la? guidúʼyanu xi biʼniʼ ca israelita dxi mayaca chuʼcaʼ lu Tierra Prometida.

11. ¿Xi bizaaca ca binni ni guníʼ mal de ca hombre ni gulí Jehová para sánirucaʼ ndaaniʼ xquidxi? (Biiyaʼ imagen ca).

¹¹ Dxi mayaca chuʼ ca israelita que lu Tierra Prometida caadxi hombre nabé risaca bicaalucaʼ Moisés ne autoridad maʼ bidii Jehová laa ne guniʼcaʼ: «Guidubi guidxi riʼ santo [ne cadi Moisés si], guirácabe ne nuu Jehová ládecabe» (Núm. 16:​1-3). Para Jehová la? «guidubi guidxi que» santo laacaʼ peru maʼ gulibe Moisés para sániru lu ca israelita que (Núm. 16:28). Nga runi ra caníʼcabe mal de Moisés casi ñaca laaca caníʼcabe mal de Jehová. Qué niníʼ íquecabe xi racalaʼdxiʼ Jehová sínuque biyubisícabe ni racaláʼdxicabe ne laani nga gápacabe jma autoridad ne gusisaca binni laacabe. Binitilú Jehová ca hombre riʼ pur bicaalucaʼ laa ne laaca binitilube stale israelita purtiʼ guyuucaʼ pur ca hombre riʼ (Núm. 16:​30-35, 41, 49). Zanda chuʼnu seguru tiempu riʼ laaca qué riuulaʼdxiʼ diʼ Jehová ca ni qué runi respetar ca ni zániru ndaaniʼ xquídxibe.

12. ¿Xi razón nápanu para gápanu confianza xquidxi Jehová?

¹² Nápanu stale razón para gápanu confianza xquidxi Jehová. Ora ruuyaʼ ca hermanu ni zániru ndaaniʼ xquidxi Dios caquiiñeʼ guiene chaahuinu xiixa ni zeeda lu Biblia o caquiiñeʼ gaca xiixa cambiu de modo rúninu dxiiñaʼ, nagueenda rúnicabe xiixa para guchaacabe cani (Prov. 4:18). Ne rúnicabe ni purtiʼ racaláʼdxicabe gúnicabe ni riuulaʼdxiʼ Jehová. Laaca rúnicabe stipa iquiiñecabe Stiidxaʼ Dios ante guicaacabe decisión, ne laaca ngaca nga naquiiñeʼ guni ca xpinni Jehová.

13. ¿Xii nga «ejemplu de ni naquiiñeʼ gúniluʼ», ne xiñee naquiiñeʼ chinándaluʼ cani?

¹³ «Yenanda guiráʼ ca cosa galán bisiideʼ lii, purtiʼ zeeda gácacani ti ejemplu de ni naquiiñeʼ gúniluʼ» (2 Tim. 1:13). Peru ¿xii nga «ejemplu de ni naquiiñeʼ gúniluʼ» yaʼ? Laani nga ca cosa galán ni zeeda lu Biblia (Juan 17:17). Ne racanécani laanu para guinaaze dxiichinu ni runi crenu. Ne huasiidiʼ xquidxi Jehová laanu chinándanu ca cosa galán riʼ. Pa siempre chinándaluʼ cani la? zieni lii galán.

14. ¿Xi biʼniʼ caadxi xpinni Cristu de primé siglu ni bisihuinni maʼ cadi zinándacaʼ ca cosa galán ni naquiiñeʼ chinándanu?

¹⁴ ¿Xi zanda gueeda guizaacanu pa gusaana de chinándanu ca cosa galán ni naquiiñeʼ chinándanu yaʼ? Guidúʼyanu xi bizaaca lu primé siglu. Caadxi xpinni Cristu caniʼcaʼ maʼ bedandá dxi stiʼ Jehová. Zándaca biindacaʼ ti carta ni ná dxandíʼ ngue, ne según apóstol Pablo bicaani. Peru lugar de ñuuyacabe pa dxandíʼ ni ná carta que la? biʼniʼ cré ca xpinni Cristu de Tesalónica ni nani ne dede gúdxicabe ni xcaadxi. Zándaca qué ñábacabe lu trampa riʼ pa ñetenaláʼdxicabe ni gudxi Pablo laacabe dxi nuu ra nuucabe que (2 Tes. 2:​1-5). Maca gudxi apóstol Pablo laacabe cadi casi zécabe guni crécabe ni gabi binni laacabe. Ne para cadi guizaacacabe ni sti biaje la? bicaa Pablo ca diidxaʼ riʼ ra maʼ ziluxe guiropa carta stiʼ, nani: «Naa, Pablo, naa piaʼ cucaaʼ diuxi riʼ para laatu. Sicaríʼ rucaaʼ lu guiráʼ carta stinneʼ» (2 Tes. 3:17).

15. ¿Xi naquiiñeʼ gúninu para cadi guiábanu lu ca trampa stiʼ ca enemigu stinu? Bizeeteʼ ti ejemplu. (Biiyaʼ ca imagen ca).

¹⁵ ¿Xi rizíʼdinu de ca diidxaʼ ni bicaa Pablo ra nuu ca xpinni Cristu de Tesalónica? Rusiidini laanu pa málasi gabi tuuxa laanu o gunadiáganu caníʼcabe xiixa ni qué huadúʼndanu lu Biblia, cadi casi ziuunu guni crenu ni. Tiempu guyuu Unión Soviética, gudiiziʼ ca enemigu stinu ti carta, ni nácabe zeeda de central mundial, ra canábacabe ca hermanu que gúnicaʼ sti grupu de xpinni Dios. Neca ruluíʼ dxandíʼ ni ná carta que, ca hermanu ni zuhuaa dxiichiʼ lu ni runi cré qué ñábacaʼ lu trampa riʼ. Bidiicaʼ cuenta cadi ngue nga ni huaziidicaʼ lu Biblia. Tiempu riʼ, laaca riquiiñeʼ ca enemigu stinu tecnología para gucaacaʼ laanu guni dudarnu o para guni dividircaʼ laanu. Nga runi naquiiñeʼ gápanu laanu para cadi quítecabe laanu, ne ora gunadiáganu o guidúʼndanu xiixa, primeru guiduʼyaʼ chaahuinu pa nuuni tobi si né ni huazíʼdinu lu Biblia (2 Tes. 2:2; 1 Juan 4:1).

16. Casi ná Romanos 16:​17, 18, ¿xi naquiiñeʼ gúninu né ca ni rixeleʼ de ni dxandíʼ?

¹⁶ Chuʼnu tobi si né ca ni qué rixeleʼ de Jehová. Racalaʼdxiʼ Dios chuʼnu tobi si né ca hermanu stinu para guni adorarnu laa, ne zanda gúninu ni pa guinaaze dxiichinu ni runi crenu. Ca ni rixeleʼ de ni dxandíʼ, runi dividircaʼ congregación. Nga runi rinabaʼ Dios laanu cadi guidxaaganu laacabe para cadi guxhélecabe laanu de ni dxandíʼ (biindaʼ Romanos 16:​17, 18).

17. ¿Xi zazaaca pa nánnanu xii nga ni dxandíʼ ne guinaaze dxiichinu ni?

¹⁷ Pa nánnanu xii nga ni dxandíʼ ne guinaaze dxiichinu ni, ziuʼnu jma gaxha de Jehová ne zaca fe stinu jma naguidxi (Efes. 4:​15, 16). Qué zudiʼnu lugar quite Binidxabaʼ laanu ne laaca qué ziábanu lu ca trampa stibe. Cadi guiaandaʼ laanu zapa Jehová laanu lu gran tribulación, nga runi guinaaze dxiichinu ni dxandíʼ «ne Dios ni riguixhedxí ladxidoʼno» qué ziuu dxi gusaana laanu (Filip. 4:​8, 9).